Yelemiya

41 Mu mwezi uwalenga 7 Isumaeli mwana Netaniya mwana Elisyama, uwali uwa mu lupwa lwa mwene nupya uwali pa yonsi acindame aamwene, wizile na aonsi yauze 10 kuli Gedaliya mwana Ahikamu ku Mizipa. Lino yalyanga uku Mizipa, 2 Isumaeli mwana Netaniya na aonsi 10 yano wali nayo yakatwike nu kukoma Gedaliya mwana Ahikamu mwana Syafani nu lupanga. Fwandi wakomile umuntu wino umwene wa ku Babiloni wasile wasonta kuti aangalila impanga. 3 Nupya Isumaeli wakomile Ayuda yonsi aali na Gedaliya uku Mizipa kumwi na asilika Ina Kalideya aali kuuku kwene.

4 Pa wanda wakwe ciili pa cisila cakuti Gedaliya wakomwa, lino ali wensi atatala wamanya, 5 aonsi 80 aafumile uku Syekemu, ku Syilo, nu ku Samaliya izile. Yaali apeele ivilezu, yalepozile ivyakuzwala vyao, yaicembozile, nupya yaali nu upe wa vyakulya ni vinunkile ivya kutwala uku ng’anda yakwe Yeova. 6 Lyene Isumaeli mwana Netaniya wafumile uku Mizipa aya ayakomenkanya nupya walilanga lino akupita. Lino wayazanyile wayanenyile ati: “Izini kuli Gedaliya mwana Ahikamu.” 7 Lelo lino yafisile umu musumba, Isumaeli mwana Netaniya na asilika yakwe yayakomile nu kuyasumbila umu cisima.

8 Lelo kwali aonsi 10 pali aliyo aanenyile Isumaeli iyati: “Mutatukoma pano itukwata ivyakulya vino twafisa umu mpanga, kuli kuti ingaano, baale, mafuta, nu uci.” Fwandi ataayakomile kumwi na ina yao. 9 Vitumbi vya yantu yano Isumaeli wakomile wavisumbiile umu cisima cikalamba cino Umwene Asa wimvile pa mulandu na Baasya umwene wa ku Izlaeli. Cikwene ali cisima cino Isumaeli mwana Netaniya wazuuzizyemo ivitumbi vya yantu yano wakomile.

10 Isumaeli wasenzile antu yonsi asyazile umu Mizipa umu uzya kumwi na ana ya mwene akazyana na antu yonsi aasile umu Mizipa yano Nebuzaladani umukalamba wa yalinzi wapeezile kuli Gedaliya mwana Ahikamu kuti aayasakamala. Isumaeli mwana Netaniya wayasenzile umu uzya nu kuya uku Ina Amoni.

11 Lino Yoanani mwana Kaleya na akalamba ya yasilika yonsi yano wali nayo yuvwile pa viipe vyonsi vino Isumaeli mwana Netaniya wacisile, 12 yasenzile aonsi yonsi iyaya umu kumulwisya nupya yamuzanyile uku Gibyoni ukwali manzi aingi.

13 Antu yonsi yano Isumaeli wali nayo yatemilwe sana lino yaweni Yoanani mwana Kaleya na akalamba ya yasilika yonsi yano wali nayo. 14 Lyene antu yonsi yano Isumaeli wasenzile ukufuma uku Mizipa yapiliwike nu kuswilila pamwi na Yoanani mwana Kaleya. 15 Lelo Isumaeli mwana Netaniya na aonsi 8 yano wali nayo yapuusile Yoanani iyaya uku Ina Amoni.

16 Yoanani mwana Kaleya na akalamba ya yasilika yonsi yano wali nayo yasenzile antu asyazile uku Mizipa, yano yapuswisye kuli Isumaeli mwana Netaniya pa cisila cakuti wakoma Gedaliya mwana Ahikamu. Yawezizye aonsi, asilika, anaci, ana na aomvi ya kwi sano ukufuma uku Gibyoni. 17 Yapisile nu kuyaikala pa ncende ya kupuuzilapo yakwe Kimuamu mupiipi nu ku Betelemu, ala yakulonda ukuya uku Ijipti 18 pa mulandu na Ina Kalideya. Pano yayatiinanga pa mulandu wakuti walanga Isumaeli mwana Netaniya watakoma Gedaliya mwana Ahikamu wino umwene wa ku Babiloni wasonsile ukuti aangalila impanga.