Yelemiya
48 Yeova wa maumba, Leza wakwe Izlaeli walanda ukulozya kuli Moabu wati:
“Kalanda kuli Nebo pano wataononwa!
Kilyataimu watazewana nu kupokwa.
Incende zya kuutukilako izizewana nupya izyononwa.
2 Kusi aakulumbanya Moabu.
Iyamupangila uku Hesyiboni iyati:
‘Twapiteni tukamonone pakuti atatwalilila ukuya uluko.’
Namwe kwene mwe ya ku Madimeni mwikale mya,
Pano ulupanga lukumwizila.
3 Uku Holonaimu kukuvwika impooma,
Pa mulandu nu wononesi ni ntazi zipisye izyatiziyaponela.
4 Moabu wataononwa.
Ana yakwe anono yakuloosya.
5 Yakuloosya pa kulemela ukuya uku Luiti.
Nupya lino yakwikilila ukufuma uku Holonaimu yakuvwa kuno antu yakuloosya pa mulandu ni ntazi zipisye.
6 Utukini pakuti mupusuke!
Mulinzile ukuya wa muti wa yunipa umu lwanga.
7 Pa mulandu wakuti mwataila imilimo inu ni vyuma vinu,
Nu kucimviwa kwene mulacimviwa.
Nupya Kemosyi alasendwa umu uzya,
Kumwi na ya simapepo yakwe na ya cilolo yakwe.
8 Aakaonona aliza umu misumba yonsi,
Nupya kusi umusumba ulapusuka.
Mukonko ulalowa,
Ni mpanga itambalale ilononwa wakwe viivi kwene vino Yeova walanzile.
9 Ikilini Moabu icimanyililo,
Pano lino alaaononwa antu yakwe yalutuka,
Nupya imisumba yakwe ilaya ica kuseka,
Mutalaikala ali wensi.
10 Watiipwa umuntu aakaomba ukasu ukasu mulimo uno Yeova wamupeela!
Watiipwa umuntu aasiomvya ulupanga lwakwe uku kukomelako!
11 Aina Moabu yataatala yaakwatapo intazi ukufuma uku wance wao,
Wakwe waini uwikala sile.
Yaya wakwe waini aatatala witulwilwa umu civiya cuze,
Yataatala yaya umu uzya.
Ali mulandu uno yayela sile icili cimwi
Yasisenuka.
12 “‘Fwandi lolini! Manda yakwiza,’ avino Yeova walanda, ‘lino ndatuma aonsi aalaitulula wakwe waini. Yalaitulula nu kusya iviya vyao umwaula cimwi, nupya yalatamola insembo zyao izikalamba. 13 Aina Moabu yaluvwa insonyi pa mulandu na Kemosyi, wakwe vino amu ng’anda yakwe Izlaeli yakuvwa insonyi pa mulandu na Betele wino yaataile.
14 Mukweti insambu ci zya kulanda muti: “Sweswe yasilika ya maka aaipekanya ukuya umu ulwi”?
15 ‘Moabu wataononwa,
Misumba yakwe yaticimviwa,
Aonsi yakwe aamaka sana iyayakoma,’
Avino Umwene wino izina lyakwe a Yeova wa maumba walanda.
16 Intazi ikwiza zuwa pa Ina Moabu,
Nu kucimviwa kwao kukupalama zuwa zuwa.
17 Yonsi kwene ayazinguluka yatalayuvwila uluse,
Yonsi kwene aayamanya.
Uyanene uti: ‘Iyee vino intuwa ya maka nupya iyembe yatikontoka!’
18 Fuma pa cifulo cako icicindame,
Uwikale pansi, we mwanaci aakaikala umu Diboni,
Pano aakonona Moabu watakwizila,
Nupya alonona incende zyako izicingililwe.
19 Imilila umu mbali ya museo wemuno ukaikala umu Aloeli uwalola ivikucitika.
Uzya umonsi nu mwanaci aakupuuka uti, ‘I vyani vyativicitika?’
20 Moabu watazewana nupya ali ni ntete.
Lila nu kuloosya.
Manyisya umu Alinoni uti Moabu wataononwa.
21 “Leza watapingula impanga itambalale, watapingula Holoni, Yahazi, na Mefaati; 22 watapingula Diboni, Nebo, na Beti-dibulataimu; 23 watapingula Kilyataimu, Beti-gamuli, na Beti-meoni; 24 watapingula Kelioti na Bozila; alino ni misumba yonsi ya mu mpanga ya Moabu, iya kutali ni ya mupiipi.
25 ‘Maka yakwe Moabu iyasila;
Ikasa lyakwe ilikontoka,’ avino Yeova walanda.
26 ‘Lekini akoleke, pano wataikuzya ukucila Yeova.
Moabu akuivumvunya umu malusi yakwe,
Nupya yakumutumfya.
27 Uzye asi a wewe watumfyanga Izlaeli?
Uzye Izlaeli wali pa yapuupu,
Pakuti uwakunta umutwe nu ukulanda iviipe pali aliwe?
28 Fumini umu musumba nu kuyaikala uku ciliwe mwemuno mukaikala umu Moabu,
Nupya muye wa nkunda iyapangila icinsanzo mu mbali ya ciliwe.’”
29 “Tuvwa pa cilumba cakwe Moabu, waya sana ni cilumba
Tuvwa pali vino akaitutumula, kuyuvwa, kuituntumba, nu kuikuzya.”
30 “Yeova walanda wati, ‘Namanya vino wakalipa,
Lelo imilandile yakwe ilaya iya sile sile.
Atalacita nanti acimwi.
31 Ali mulandu uno ndaloosezya pali Moabu,
Ndalila pa mulandu na Ina Moabu yonsi
Nupya ndalila pa mulandu na antu ya mu Kili-halesi.
32 Nkuloosya sana pali wewe kucila vino ningaloosya pali Yazeli,
We mwangazi wa ku Sibima.
Misambo yako ilembe yafika kuli yemba.
Yalamba yemba ukufika nu ku Yazeli.
Uwa konona ivintu onona ivizao vyako ivya cisanya
Ni myangazi ino wazombola
33 Luzango nu kusansamuka ivisila umu calo ca miti ya vizao
Nu mu mpanga iya Moabu.
Indenga ukuti waini ate ukufuma umu ca kufenelamo.
Kusi alaafena ni nsansa.
Yalaapunda lelo asi ukupunda kwa nsansa.’”
34 “‘Kuloosya kukuvwika ukufuma uku Hesyiboni kufika uku Eleale.
Mazwi yao yakuvwika ukufika uku Yahazi,
Yakulila ukufuma uku Zoali ukufika uku Holonaimu nu ku Egilati-syelisyiya.
Nanti sile a manzi ya mu Nimulimu yalapwa.’”
35 Yeova walanda wati: “Ndalenga umu Moabu,
Mutaya uwa kuleta upe pa ncende zino yakalola ukuti izya muzilo
Nu wakupeela malambo kuli leza wakwe.
36 Ali mulandu uno ndaloosezya pali Moabu wakwe vino umutolilo ukalila,*
Nupya ndaloosya pa yantu ya mu Kili-halesi wakwe viivi kwene vino umutolilo ukalila.
Pano ivyuma vino yakwata vilalowa.
37 Pano yonsi iyapela mapala,
Nupya iyapela ivilezu.
Ku makasa yao yonsi kuli ivicembole,
Nupya yonsi iyazwala ivyakuzwala vya kulangilamo ulanda!”
38 “‘Pa mapaala ya mang’anda yonsi amu Moabu
Nu mu ncende zyakwe zyonsi umukazanwa sana antu,
Muli ukuloosya kutupu
Pano intama Moabu
Wa nsembo,’ avino Yeova walanda.
39 ‘Iyee vino ali ni ntete! Na vino akuloosya!
Moabu watazewana!
Yakumutumfya!
Nupya wataya icintu ca kutiinya kuli yonsi amuzinguluka.’”
40 “Yeova walanda wati:
‘Lolini! Wakwe viivi kwene vino lyang’anda akazuka watauwa pa kuwa,
Avino nawe alakonzolwela maapa yakwe pali Moabu.
41 Imizi yakwe ilapokwa,
Ni ncende zyakwe kwene izicingililwe zilapokwa.
Mu wanda uuwa asilika Aina Moabu
Yaluvwa intete wa mwanaci aali pa kupaapa.’”
42 “‘Nupya Moabu alaloviwa,
Pano waikuzya ukucila pali Yeova.
43 Intete, viwina ni viteyo vikumuloleela
Mwe ikazi ya mu Moabu,’ avino Yeova walanda.
44 ‘Wensi aalutuka icongo ca kutiinya alaponela umu ciwina,
Nupya wensi aalafuma umu ciwina alalemya umu citeyo.’
‘Pano ndapingula antu ya mu Moabu,’ avino Yeova walanda.
45 ‘Aakutukila uku Hesyiboni kuti yacingililwe, yatalavwiwa.
Pano umoto ulafuma umu Hesyiboni
Ni cimbilimbili umu Sihoni.
Uloca icipuma cakwe Moabu
Ni vipanga vya yasilika aaya nu unkalwe.’
46 ‘Kalanda kuli wewe, we Moabu!
Antu yakwe Kemosyi iyalowa.
Pano ana yako aonsi iyasendwa umu uzya,
Kumwi na ana yako akazyana kwene.’
47 Yeova walanda wati, ‘Lelo ndakolonganika antu ya mu Moabu aasendwa umu uzya umu manda ya kusyalikizya.
Paa apapelela upinguzi wakwe Moabu.’”