Ezekeli

31 Mu mwaka uwalenga 11, mu mwezi wakwe citatu pa wanda wa kutandikilako, nupya kwene Yeova wanenyile ati: 2 “We mwana wa muntu uzya Falao umwene wa ku Ijipti na asilika yakwe uti,

‘A weni wino ungalingana nawe maka?

 3 Kwali Umwina Asilya, kuli kuti umukedali uwa mu Lebanoni

Uwakweti imisambo isuma wa mutengo umwaya sana icisaao;

Nupya wali utali, wafisile nu mu makumbi.

 4 Manzi yalenzile ukule, inguzi zizike zyalenzile utalimpe.

Pano walemilwe paali inguzi;

Amanzi alimo yakontelelanga imiti yonsi iya mu mpanga.

 5 Ali mulandu uno watalimpiile ukucila imiti yonsi iya mu mpanga.

Misambo yavuzile nupya yatalimfile

Pa mulandu na manzi aingi aali umu nguzi izyauzingulwike.

 6 Ivyunyi vyonsi ivya mwi yulu vyapangiile ivinsanzo uku misambo ya mukedali uwo,

Inyama zyonsi izya mu mpanga zyavyalilanga umwisika lya misambo ya muti uwo,

Ni nko zyonsi zikalamba zikalanga umu cisaao ca muti kwene uwo.

 7 Wayemvile sana nupya wakweti imisambo ikome,

Pano imisisi iingile umu manzi aingi.

 8 Kusi umukedali uze uwa mu calo cakwe Leza uwalingine nao.

Nupya kutaali umuti wa yunipa uwakweti misambo wa mukedali uwo,

Nupya kusi umuti uze uwakweti misambo iingi wa mukedali uwo.

Kutaali umuti uli onsi uwa mu calo cakwe Leza uwalingine ukuyemba nu muti uwo.

 9 Naulenzile ukuya uyembe nu kukwata mafwa aingi,

Nupya imiti yonsi iya mu Edeni, kuli kuti icalo cakwe Leza wa cumi yauvwilanga uzuwa.’

10 “Fwandi Yeova Umwene wa Papelapela walanda wati: ‘Pa mulandu wakuti watalimfile nu kufika umu makumbi, nupya wizile iuya ni cilumba pa mulandu nu kutalimpa, 11 ndaupeela kuli kateeka wa nko uwa maka. Alaufulula, nupya ndaukana pa mulandu ni viipe vino wacita. 12 Nupya antu aku mpanga zyuze, kuli kuti inko izyaya sana nu unkalwe, yalaukoma nu kuusya pa myamba, na mafwa yalaponela umu mikonko yonsi, nupya imisambo ilaponela umu nguzi zya mu mpanga zyonsi. Antu yonsi amu nsi yalafuma umu cisaao ca muti uwo nu kuusya. 13 Ivyunyi vyonsi ivya mwi yulu vilaikala pa cimuti icipone, ni inyama zyonsi izya mu mpanga zilaikala pa misambo ya cimuti cico. 14 Cilaya vivyo pakuti kutaca kuye umuti uuli onsi uwaya umupiipi na manzi nanti uukakontelelwa ningo uwakuti uce utalimpe kufika umu makumbi. Pano imiti yonsi ilafwa, ilaziikwa wakwe vino antu yonsi aafwe yakaziikwa.’

15 “Yeova Umwene wa Papelapela walanda wati: ‘Mu wanda uno icimuti cilaziikwa umwi Lindi,* ndalenga kuye ukuloosya. Ndacilika inguzi zizike pakuti manzi yataca yapita. Ndalenga umu Lebanoni muye imfinzi pa mulandu wa cimuti cico, ni miti yonsi iya mu mpanga iluuma. 16 Pa mulandu ni congo icilayako lino icimuti cico cilapona, ndalenga inko ukuzakaza lino ndacitwala uku Malindi* pamwi na antu yonsi aafwa, nupya imiti yonsi iya mu Edeni, imiti isuma iya mu Lebanoni, ni miti yonsi iikakontelelwa ningo ilateekeziwa uku Malindi. 17 Wakwe aliwe, nayo kwene yaaya uku Malindi* ku yantu aakomwa nu lupanga kumwi na amutungililanga aikalanga umu cisaao cakwe umu nko.’

18 “‘Kusi umuti uli onsi uwa mu Edeni uwali ucindame nupya ukalamba wakwe wewe. Lelo ulaziikwa umu malindi pamwi ni miti ya mu Edeni. Ulaziikwa pamwi na antu atazembululwa aakomilwe nu lupanga. Vikwene i vilacitikila Falao na asilika yakwe yonsi,’ avino Yeova Umwene wa Papelapela walanda.”