Yelemiya
42 Lyene akalamba ya yasilika yonsi na Yoanani mwana Kaleya, Yezaniya mwana Hosyaya, na antu yonsi kutandikila pa munono ukufika pa mukalamba izile 2 kuli kasesema Yelemiya nu kumunena iyati: “Twapaapata, uvwa vino tukulenga, nupya utupepeleko kuli Yeova Leza wako pamwi na antu yaa yonsi asyala, pano antu anono sile aasyala wakwe vino naawe ukulola. 3 Si Yeova Leza wako atunene inzila ino tulinzile ukupitamo na vino tulinzile ukucita.”
4 Kasesema Yelemiya wayaswike ati: “Inuvwa vino imulanda, nupya nimamupepelako kuli Yeova Leza winu kulingana na vino imulenga; nupya vyonsi vino Yeova amalanda nimamunena. Ntakumufisa nanti acimwi.”
5 Nayo yalanzile iyati: “Si Yeova kambone wa cisinka nupya uwa cumi ace atufulule ndi cakuti tutalacita vyonsi vino Yeova Leza wako amatunena ukupitila muli wewe. 6 Tuluvwila vino Yeova Leza witu wino tukukutumako alalanda, viye ivisuma nanti iviipe, pakuti vintu vice vituzipile pa mulandu nu kuvwila mazwi yakwe Yeova Leza witu.”
7 Pa cisila ca manda 10 Yeova walanzile na Yelemiya. 8 Fwandi Yelemiya wamile Yoanani mwana Kaleya na akalamba ya yasilika yonsi aali nawe na antu yonsi, kutandikila pa munono kufika pa mukalamba. 9 Wayanenyile ati: “Yeova Leza wakwe Izlaeli, wino mwantumileko kuti nkamulengele walanda wati: 10 ‘Ndi cakuti mwatwalilila ukwikala umu mpanga yii, ndamukuula nupya ntalamuwisya, ndamulemeka nupya ntalamwipula, pano nduvwa ulanda pa ntazi zino namuletiile. 11 Mutuvwa intete pa mulandu nu mwene wa ku Babiloni wino mukutiina.’
“‘Mutuvwa intete pa mulandu na aliwe pano indi namwe, ndamupususya nu kumupokolola umu minwe yakwe,’ avino Yeova walanda. 12 ‘Nupya ndamuvwila uluse, nawe kwene alamuvwila uluse nu kumuswilizya uku mpanga inu.
13 “‘Lelo nga mwalanda mwati, “Awe, tutalatwalilila ukwikala umu mpanga yii!” nupya mwakana ukuvwila mazwi yakwe Yeova Leza winu 14 nu kulanda imuti, “Awe, tulaya uku mpanga ya Ijipti kuno tutalaalola inkondo, nanti ukuvwa iciunda ci penga nanti ukuya ni nzala; kuuku kwene akuno tulikala,” 15 uvwini mazwi yakwe Yeova mwe yantu ya mu Yuda mwemuno mwasyala. Yeova wa maumba, Leza wakwe Izlaeli walanda wati: “Nga mukulondesya ukuya uku Ijipti nupya kuuku kwene akuno mwaya umu kwikala, 16 lyene uku Ijipti kwene akuno mulakomwa uku lupanga luno mukatiina, ni cipowe cino mukatiina cilamukonka uku Ijipti, nupya kuuku kwene akuno mulafwila. 17 Na aonsi yonsi aakulondesya ukuya umu kwikala uku Ijipti yalakomwa nu lupanga, ni cipowe, ni cikuko. Kusi aalapusuka nanti ukuutuka intazi zino ndaleta pali aliyo.”’
18 “Yeova wa maumba, Leza wakwe Izlaeli walanda wati: ‘Wakwe viivi kwene vino ukali wane ni cipyu vizile pa yantu ya mu Yelusalemu, avino viliza pali mwemwe nga mwaya uku Ijipti, mulaya pa yantu atiipwe, mulaasekwa, nupya mulazewana, mutalatala mulolepo incende yii nupya.’
19 “Yeova watamunena mwe yantu ya mu Yuda asyalako. Mutaya uku Ijipti. Mumanye ukuti ilelo imucelula 20 ukuti imembu zinu zilamuletelela. Pano mwantumile kuli Yeova Leza winu imuti, ‘Tupepeleko kuli Yeova Leza witu, nupya utunene vyonsi vino Yeova Leza witu amalanda, naswe tumacita vivyo kwene.’ 21 Nupya ilelo iimunena, lelo mutaluvwila mazwi yakwe Yeova nanti ukucita vyonsi vino watanena ukuti munene. 22 Nupya mumanye ukuti uku mpanga kwene kuno mukulondesya ukuyaikala akuno mulafwila uku lupanga, ku cipowe, nu ku cikuko.”