2 Milandu
2 Lyene Solomoni walanzile ukuti ing’anda apa kucindikila izina lyakwe Yeova ikuulwe alino ni isano lyakwe. 2 Solomoni wasoolwile aomvi 70,000 aakuomba imilimo ipusanepusane na aomvi 80,000 aaputulanga mawe umu myamba, wasoolwile ni ntunguluzi 3,600 izya kuyangalila. 3 Lyene Solomoni watumile mazwi kuli Hilamu umwene wa ku Tuli ati: “Ncitile vino wacitiile Devedi tata lino wamutumiile imbao zya mikedali izya kukuulila isano lyakwe. 4 Nkukuula ing’anda apa kucindikila izina lyakwe Yeova Leza wane pakuti njipeele kuli aliwe kuti iye apa kocela ivinunkile pa nkoleelo yakwe, apa kupeelela umukate wa muzilo na malambo ya koca katondo na manguzi, pa wanda wi sabata, lino kwaloleka umwezi upya, na lino kwaya ukuzevya mitebeto yakwe Yeova Leza witu. Lii isunde uku Ina Izlaeli amanda pe. 5 Ing’anda ino nkukuula ilaya ikulu, pano Leza witu u mukulu ukucila ya leza yonsi. 6 Nupya a weni angamukuulila ing’anda? Pano nanti sile iyulu litanga limukumane, uzye lyene nene weni uwakuti mukuulile ing’anda? Cino ningacita sile u kukuula pa kupeelela malambo pa nkoleelo yakwe. 7 Ntumile umuntu uwamanya ivya kupangapanga aangapanga ivintu ukuomvya goldi, siuva, koopa, icela, kotoni iyenzulukile, iyenzu na yakwe bulu, nupya uwamanya ukulenga iviyembelo pa vintu. Alaaombela umu Yuda nu mu Yelusalemu pamwi na aonsi yane aamanya ivya kupangapanga yano Devedi tata wasonsile. 8 Utume ni mbao zya mikedali, zyakwe yunipa, ni zya mialigamu ukufuma uku Lebanoni, pano namanya ukuti aomvi yako yamanya ivya kuputula imiti ya ku Lebanoni. Aomvi yane yalaombela pamwi na aomvi yako 9 ku kumpekanyizizya imbao izingi, pano ing’anda ino nkukuula ilaya ikulu sana. 10 Ndapeela aomvi yako aalaputula imiti vyakulya vii, ingaano makilogilamu 3,200,000, baale makilogilamu 3,200,000, waini malita 440,000, na mafuta malita 440,000.”
11 Lino Umwene Hilamu uwa ku Tuli uvwile vivyo walembiile Solomoni mazwi yakuti: “Pa mulandu wakuti Yeova watemwa antu yakwe, wakusoolola ukuya umwene wao.” 12 Walanzile nu kuti: “Si Yeova Leza wa Ina Izlaeli alumbanyiziwe uwapanzile iyulu ni nsi, pa mulandu wakuti wapeela Umwene Devedi umwana wa mano umucenjele nupya aakailuka, aalakuula ing’anda yakwe Yeova nu kuikuulila isano. 13 Nimatuma umonsi uwamanyikisya ivya kupangapanga aakailuka, kuli kuti Hilamu-abi, 14 umwana umonsi uwa mwanaci uwa mu mutundu wakwe Dani lelo wino isi Umwina Tuli; wamanya ivya kupanga ivintu ukuomvya goldi, siuva, koopa, icela, mawe, imbao, kotoni umuyenzulukile, kotoni wakwe bulu, insalu isuma, na kotoni muyenzu. Angayemvya ivintu ivipusanepusane nu kupanga icintu cili consi cino wapeelwa. Alaombela pamwi na aomvi yako aamanyikisya ivya kupangapanga pamwi na aomvi yakwe Devedi umusambazi wane. 15 Fwandi we musambazi wane, tuma ingaano, baale, mafuta na waini vino walavile aomvi yako. 16 Tulakukomela imiti uku Lebanoni ukulingana na ino ukulonda nupya tulainyepelela nu kuleka iyaeleela pali yemba pa kuileta uku Yopa; naawe ulaitwala uku Yelusalemu.”
17 Lyene Solomoni wapenzile aonsi yonsi aafumile uku mpanga zyuze aikalanga umu mpanga ya Izlaeli wakwe vino Devedi isi wacisile, nupya kwali aonsi 153,600. 18 Fwandi wasoolwile aonsi 70,000 aakuomba imilimo ipusanepusane na aali 80,000 aakuputula mawe umu myamba, alino na aali 3,600 aakwangalila antu.