2 Milandu

3 Lyene Solomoni watandike ukukuula ing’anda yakwe Yeova umu Yelusalemu pa Mwamba wa Moliya, pano Yeova walolekiile kuli Devedi isi, kuli kuti pa ncende ino Devedi wapekinye pa lwano lwakwe Onani Umwina Yebusi. 2 Watandike ukukuula pa wanda wakwe ciili, umu mwezi wakwe ciili umu mwaka uwalenga 4 kufuma pano watandikile ukuteeka. 3 Umufula wa ng’anda yakwe Leza wa cumi uno Solomoni wakuuzile wali mamita 27 umu utali, umu kusaalala namo mamita 9, ukulingana na vino yapimile pa kutandika. 4 Umuputule uwali apa kwingilila wali mamita 9 umu utali, walingine nu kusaalala kwa ng’anda, ukuya umupela watalimfile mamita 9;* nupya umukasi wakambatikemo goldi umwengululwe ningo. 5 Uku ng’anda iyakweti umuputule wa muzilo sana wakambatikeko vipampa vya muti wa yunipa lyene wakambatikeko goldi umwengululwe ningo, nupya wayemvizyeko nu twali wa tumiti twa tuncindu nu twali wa tumaceni. 6 Uku ng’anda wisileko na mawe asuma aamutengo, nupya goldi wino waomvizye wafumile uku Palavaimu. 7 Uku ng’anda, kuli kuti uku mbao zya kupaalikila, uku ciumba nu ku visaasa wakambatikeko goldi; nupya uku viumba wayemvizyeko na ya kelubi.

8 Lyene wapanzile umuputule wa Muzilo Sana; mu utali wali mamita 9 ukulingana nu kusaalala kwa ng’anda, umu wipi namo kwene mamita 9. Wisileko na goldi umwengululwe ningo amatalanti* 600. 9 Goldi wino yaomvizye uku nsunga wafinyile masyekele* 50; nupya umu miputule iya papela wakambatikemo goldi.

10 Lyene umu muputule wa Muzilo Sana wapanzilemo ya kelubi yaili nupya wisileko na goldi. 11 Maapa yakwe ya kelubi yatalimfile mamita 9; ikwapa lyakwe kelubi wa kutandikilako lyali mamita yaili nu kucilapo nupya lyakonzolwilwe ukufika nu ku ciumba, ikwapa lyuze lyakwe kelubi nalyo kwene lyatalimfile mamita yaili nu kucilapo nupya lyakonzolwilwe ukufika na kuli kelubi muze. 12 Ikwapa lyonga lyakwe kelubi na muze nalyo kwene lyatalimfile mamita yaili nu kucilapo nupya lyakonzolwilwe kufika nu ku ciumba ca muputule wa muzilo sana, ni kwapa lyuze kwene lyatalimfile mamita yaili nu kucilapo nupya lyakumizye ukwi kwapa lyakwe kelubi wa kutandikilako. 13 Maapa yakwe ya kelubi yayo yakonzolwilwe ukufika uku mamita 9, nupya ya kelubi iimilile ala iyalozya umukasi.*

14 Wapanzile ketani ukuomvya kotoni wakwe bulu, kotoni umuyenzulukile, kotoni umuyenzu, ni nsalu isuma, nupya walenzilepo ni vikope vyakwe ya kelubi.

15 Lyene wapanzile incesi ziili pa nkoleelo ya ng’anda izyatalimfile mamita 15 na afu, ivyali wa ntendo vino isile papela yakwe cila lucesi, vyatalimfile ukucila pa mamita yaili. 16 Wapanzile nu tumaceni utwalolekanga wa viyembelo vya mu nsingo nu kutwika papela ya ncesi nupya wapanzile mapomegilaneti 100, nu kuika uku tumaceni. 17 Wisile incesi pa nkoleelo yi tempele, longa ukwi lunji* nu luze kuli cimani;* watemiile ulucesi ulwali kwi lunji izina ilyakuti Yakini,* ulwali kuli cimani nalo walutemiile ukuti Boasi.*