2 Milandu
4 Lyene wapanzile ulambo wakwe koopa uwatalimfile mamita 9 umu utali, mamita 9 umu kusalala na mamita 4 na afu kuya umupela.
2 Wapanzile itanki lyakwe koopa ilyali ilizinguluke nupya lyali mamita 4 na afu, ukuya umupela namo lyali mamita yaili; intambo ingalizinguluka ingaya mamita 13. 3 Nupya lwa mwisika yaliyemvizye ukuomvya inkolo ukulizinguluka, inkolo zyali umu milaini iili, nupya apali masentimita 44 na afu payanga inkolo 10. Zyapangiilwe kumwi ni tanki. 4 Yaliteesile pali ya cipambasi 12, ya cipambasi yatatu yalozizye uku katutu, yauze yatatu yalozizye uku uwondaka, lyene yauze yatatu yalozizye uku kaeya, alino asyala yatatu nayo yalozizye uku ufumondaka, yonsi yalozizye ica musinda umukasi. 5 Nupya itanki lyali ilitimbe wa cizanza nupya lyakweti umulomo kwati uwakwe kapu, wi luwa iliwalule. Lyali ilikulu ilyakuti lingingizya malita 66,000 aamanzi.
6 Nupya wapanzile mabeseni 10 aakwikamo manzi aakufulila nu kwika aali 5 ukwi lunji na aali 5 kuli cimani. Yaomvyanga manzi yayo uku kufulila ivintu vino yaomvyanga uku malambo ya koca. Lelo manzi ayanga umwi tanki, ya simapepo aliyo yaomvyanga uku kufulala.
7 Lyene wapanzile ivya kuteekapo ya lampi vyakwe goldi ivili 10, kulingana na vino vyalinzile ukupangwa nupya wavisile umwi tempele, ivili 5 vyali ukwi lunji ni vili 5 vyali kuli cimani.
8 Wapanzile na matebo 10 nu kuika umwi tempele, aali 5 yaali ukwi lunji, aali 5 nayo kuli cimani; nupya wapanzile imbale zyakwe goldi 100.
9 Lyene wapanzile umusolo wakwe ya simapepo nu musolo ukalamba* alino ni visaasa vya pa milyango iya kwingilila umu musolo uuwo nupya uku visaasa vivyo wakambatikeko koopa. 10 Lyene wisile Itanki ukwi lunji lwa ku kaeya.
11 Hilamu wapanzile ni mbeketi, ya fosyolo, ni mbale.
Lyene wamazile ukupanga vyonsi vino wali nu kupangila Umwene Solomoni pa ng’anda yakwe Leza wa cumi, kuli kuti 12 incesi ziili, intendo ziili izyali papela ya ncesi, nu tupikule twili utwa kwika umu mbali ya ntendo zizyo; 13 mapomegilaneti 400 aakwika uku tupikule, cila kapikule kakwatanga imilaini iili iya mapomegilaneti aakuzingulusya uku ntendo izyali pa ncesi; 14 vya kusendelapo ivintu 10 na mabeseni 10 aakwikapo; 15 itanki na ya cipambasi 12 aali umwisika yi tanki lilyo; 16 ni mbeketi, ya fosyolo, ya foloko, ni viya vyonsi vino Hilamu-abivu wapangiile Umwene Solomoni ukuomvya koopa umuyengese ivya kwika umu ng’anda yakwe Yeova. 17 Vyonsi vii umwene wavipangiile umu citungu ca Yodani ukuomvya ivikombole ivyapangilwe ni ivu pakasi ka ncende ya Sukoti na Zeleda. 18 Solomoni wapanzile ivintu vii vyonsi ivingi sana; ukufina kwakwe koopa wino yaomvizye kutaamanyikwe.
19 Solomoni wapanzile iviya vyonsi ivya kuomvya umu ng’anda yakwe Leza wa cumi, kuli kuti ulambo wakwe goldi, matebo apa kwika umukate wa muzilo; 20 ivya kuteekapo ya lampi na ya lampi yakwe goldi umwengululwe ningo aali nu kulaaka pa nkoleelo ya muputule wa mukasi sana ukulingana na masunde; 21 na maluwa, ya lampi, ni vya kulemelako umoto, iviya vyonsi vyali vyakwe goldi umwengululwe ningo; 22 vya kuzimizyako umoto, imbale, makapu, ni vya kusendelako umoto, vii vyonsi vyali vyakwe goldi umwengululwe ningo; visaasa vya pa milyango ya kwingilila umu Muputule wa Muzilo Sana ni vya pa milyango ya kwingilila umwi tempele, vii vyonsi vyali ivyakwe goldi.