Twalililini Ukuya Cuza Wakwe Leza Manda Pe!

Mulinzile ukuombesya pa kuti muzane icuza; mufwile ukukomapo pa kuti ucuza utwalilile. Ndi mwakomapo kuti mwalukuya cuza wakwe Leza mulapolelelwa cuze. Yesu wanenyile yonsi yano yamutaile ati: “Icumi cilamukulula.” (Yoane 8:32) Uzye icintu cii cilozile mwi?

Mungaya antungwa ndakai. Mungakululwa uku visambilizyo vya ufi nu usomvi uno Satana wasansanta. Mungakululwa nu ku ulanda uno antu aingi atamanya Yeova yayamo. (Loma 8:22) Yacuza yakwe Leza yakululwa nu ku ntete zya kuutuka imfwa.—Ayebulai 2:14, 15.

Mungaya nu untungwa umu nsi ipya yakwe Leza. Cumi kwene, ku manda ya ku nkolelo mulakululwa wakwe cimwi! Lino insi ilaya Paladaise, mutalaya inkondo, ni ndwala, nu upondo. Mutalaya upiina ni nzala. Ukote ni mfwa vilasila. Mutalaya intete, kutitikizya antu nu lufyengo. Baibolo ikalanda pali Leza ati: ‘Wewe ukafumbatula iminwe yako, nu kwikusya ukulonda kwakwe vyonsi vya umi.’—Masamu 145:16.

Yacuza yakwe Leza yalikala amanda pe. Leza alapeela yonsi aakalonda ukuya yacuza yakwe uwiila ucindame sana, nu wiila wuwo, uumi wa pe. (Loma 6:23) Mutale mwelenganye vino cingaya ukuya umuumi amanda yonsi!

Mulakwata insita ya kuomba ivintu ivingi sana. Limwi mukalonda ukumanya ukulizya icinanda. Nanti manye mukalonda ukumanya ukulenga ivikope nanti ukuya kawaza. Limwi mungatemwa ukumanya inyama nanti imiti. Nandi limwi mungatemwa ukuya umu kutandala ku mpanga zyuze ukwaya antu apusanepusane. Vintu vyonsi vii vilacitika pano tulaya nu umi wa manda pe!

Mulakwata insita ikalamba iya kupanga ivyuza ivingi. Mulamanyana na yacuza yakwe Leza aingi sana, pano mulikala amanda pe. Mulamanya amano yano yakwata a kuombelamo ivintu ni miyele yao isuma, kapya na yo kwene yalaya yacuza inu. Mulatemwana. (1 Kolinto 13:8) Uumi wa pe ulalenga mupange icuza na yonsi aalikala umu nsi! Ni cilazipisya ica kuti lino imyaka ilaapita, ucuza winu na Yeova ulaakomelako sile. Si mungalukuya cuza wakwe Leza amanda pe!