Uzye Yesu Wavilwe Umu Dizemba?

BAIBO itaatuneena uwanda uno Yesu wavyalilwepo. Lelo ikatulanga ivisinka ivikatwavwa ukumanya ukuti atavilwe umu Dizemba.

Lekini tulande pali vino umuza ukaya uku Betelemu kuno Yesu wavyalilwe ndi cafika umu Dizemba. Umwezi wa ciYuda uno yatangi Chislev (ndakai ali pakasi kakwe Novemba na Dizemba) wali u mwezi wa mpepo sana ni mvula. Lyene umwezi uwalondelelanga penepo wali a Tebeth (ndakai ali pakasi kakwe Dizemba na Januwale). Ali mwezi uno kwazuukanga sana ukucila imyezi yonsi. Lekini tuvwe na vino Baibo ikalondolola umuza wa ku mpanga iiya.

Kalemba wakwe Baibo uwizina lyakuti Ezila, walangilile ukuti umwezi wakwe Chislev wali u mwezi uzuke wakwe cimwi, nupya wali uwa mvula cuze. Lino Ezila walanzile ukuti kwali antu aakongine umu Yelusalemu, “apa wanda walenga makumi yaili mu mwezi walenga fundimbali [mwezi wakwe Chislev],” walanzile nu kuti antu yaayo “ala yakuzakaza sile pamulandu . . . ni mvula iyatonyizye wakwe cimwi.” Lyene pa mulandu ni mvula ni mpepo iikayako umu myezi iiya, antu aakongine nayo kwene yalanzile yati: “Cicili cisiku, swemo tutanga twimilile pano.” (Ezila 10:9, 13; Yelemiya 36:22) Fwandi ali cino ya kacema ya mfwele aku mpanga iiya yasininkizyanga ukuti ndi cafika umu Dizemba, ala yene pamwi ni viteekwa vyao yafwile ukuya pa mang’anda, asi kuya mu mpanga usiku, awe!

Nomba Baibo yene ikati apa wanda uno Yesu wavilwe usiku kwali ya kacema aasunganga iviteekwa vyao umu mpanga. Nupya Luka walangiliile ukuti apa nsita iiya, “kwali yakacema acitanga uluti lwakulolela viteekwa vyao kunyika usiku” lwapipi nu muzi wa Betelemu. (Luka 2:8-12) Uzye imulola pano pakuti yacitanga uluti lwa kuloleelela ivitekwa usiku? Kulikuti yataali ni viteekwa umusanya ala yakupita sile lwa kunyika. Yene yaaloleelanga iviteekwa vyao usiku. Uzye vwilini umulimo uuwo ungaombekwa umu mwezi wakwe Dizemba lino kukaaya sana impepo ni mvula? Awe foo. Fwandi vino Baibo yalondolola ukuti i vyacitikanga apa nsita ino Yesu wavilwe, vikalangilila ukuti ataviilwe umu Dizemba.a

Izwi lyakwe Leza lyatulondolwela ningo sana pa nsita ino Yesu wafwililepo, lelo lisilondolola lino waviilwe. Na cii cikatwiusya amazwi yakwe Solomoni akuti: “Izina Lisuma lyazipa ukuluta amafuta acinunu cisuma amutengo. Uwanda wa mfwa itu ukazipa ukuluta uwanda uno twavilwepo.” (Kasambilizya 7:1) Fwandi tutanga tuzunguke ukuti Baibo yalondolola ivingi sana pa mulimo wakwe Yesu na pa mfwa yakwe, lelo pa kuvyalwa kwakwe pene italondolola ivingi.