Uwene Uulayako Amande Pe

Wanda umwi usiku, Umwene Nebukadineza walosiile iciloto cino ataamanyile muno calozile. Ciloto cico camusakamike sana icakuti ataakaswile. Wamile aacitanga ivya malele nu kuyaneena ati: ‘Ndondolwelini upiliulo wa ciloto cino inalota.’ Nayo yamuneenyile iyati: ‘Mwene, tuneene vino iwalota.’ Lelo Nebukadineza wayaneenyile ati: ‘Awe! Mwemwe neenini vino inalota, nga mutacisile vivyo nimamikoma.’ Nupya kwene yamuneenyile iyati: ‘Tuneene vino iwalota naswe tumakulondolwela upiliulo wa ciloto cico.’ Nawe watile: ‘Mwensi sile mukunjezya. Nenini vino inalota.’ Nayo yaneenyile umwene iyati: ‘Kutaya umuntu angacita vivyo. Vino ukutuneena vitanga vicitike.’

Nebukadineza wasosiile sana icakuti walanzile ukuti aonsi yonsi aa mano aali umu mpanga iya yakomwe. Pali yayo pali na Danieli, Syadilaki, Mesyaki, na Abedinego. Danieli waneenyile umwene ukuti ayapeeleko akasita. Lyene Danieli na auze yapefile kuli Yeova ukuti ayazwe. Uzye Yeova wacisile uli?

Yeova walangizye Danieli icilolwa umwali ciloto cino Nebukadineza walosile alino nu upiliulo. Uwanda uwalondeliilepo, Danieli waile uku muomvi uwa mwene nu kumuneena ati: ‘Utakoma umonsi wa mano ali wensi. Nimalondolola upiliulo wa ciloto ica mwene.’ Muomvi watwazile Danieli kuli Nebukadineza. Lyene Danieli waneenyile umwene ati: ‘Leza atasokolola ivili nu kucitika uku nkoleelo. Ciloto cino iwalota aeci: ‘Iwalola icilubi cikulu icali cikweti umutwe wakwe goldi, cisao na makasa navyo ivili ivyakwe siuva, ulunda ni mpamba ivili ivyakwe koopa, maulu iyali a cela, ingazo nazyo izili izisankanyiziwemo icela ni ivu. Lyene iwe ilyafuma ukumwamba nupya iliza lyatama ingazo izya cilubi. Cilubi icavungoka casanguka lukungu nu kusendwa nu muza. Ni iwe nalyo ilyasanguka umwamba ukulu nu kukumana insi yonsi.’

Lyene Danieli walanzile ati: ‘Uu ali upiliulo wa ciloto cino iwalota: Uwene wako ali mutwe wakwe goldi. Siuva u wene uulalondelela pali wewe. Lyene palaya uwene uze uulaya wakwe koopa, uulateka insi yonsi. Lyene palalondelela uwene uulaya ukome wa cela. Nu mukusyalikizya, kulaya uwene uulankanikana, kulusansa longa ulaya ukome wa cela nu luze ulaya utontekane wi ivu. Iwe ilyali lyakula nu kuya umwamba, u Wene Wakwe Leza. Uwene uu ulonona mawene yonsi nupya ulayako amanda pe.’

Nebukadineza waponyile pansi ala afupime pa nkoleelo yakwe Danieli. Walanzile ati: ‘Leza wako aatakusokolwela ciloto cii. Kutaya Leza uwaya wakwe aliwe.’ Nebukadineza ataakomile Danieli, lelo wamucisile ukuya umukalamba pali yonsi aa mano nu kuya kateeka umu citungu ica Babiloni. Uzye utulola vino Yeova waswike ipepo lyakwe Danieli?