Ya Malaika Yamanyisya pa Kuvyalwa Kwakwe Yesu

Kateka uwa ku Loma, Agusto wisileko isunde lyakuti Ayuda yonsi yaswilile kumwao mu kulembwa. Fwandi Jozefu na Maliya yaswilile uku Betelemu, ukwafumile ulupwa lwakwe Jozefu. Maliya wali umupiipi nu kukwata umwana.

Lino yafisile umu Betelemu, incende sile ino yazanyile umwakwikala, icikulwa muno yakasungila yapunda ni nyama zyuze (vikulwa vivyo vyapusana nu uluwa nanti citata pano vyene vikaloleka kwati ing’anda.) Mumukwene amuno Maliya wavyalile Yesu. Wamupomvile umunsalu nu kumwika umu mulangu (muno yakaikila ivitekwa ivyakulya).

Ya kacema yamwi yaali umu mpanga usiku onsi ala yakucema imfwele mupiipi nu musumba uwa Betelemu. Ukwaula ukwenekela, malaika wimilile pa nkoleelo yao nupya uluswepo ulwa lulumbi lwakwe Yeova lwayazingulwike. Ya kacema yatiinyile, nomba malaika wayaneenyile ati: ‘Mutuvwa intete. Imuletela ilyasi lisuma. Uwanda wi lelo Mesiya watavyalwa umu Betelemu.’ Papo kwene sile, kwalolike ya malaika aingi ukwi yulu, iyapunda iyati: ‘Ululumbi luye kuli Leza uwa mwi yulu nu mutende uye pa yantu apano nsi.’ Lyene ya malaika yafumilepo. Uzye ya kacema yacisile uli?

Ya kacema yatandike ukulanzyanya iyati: ‘Twapiteni uku Betelemu likwene.’ Yapisile uku Betelemu zuwa zuwa nupya yazanyile Jozefu na Maliya ala yali nu mwana umu cikulwa muno yakasungila yapunda ni nyama zyuze.

Yonsi auvwile vino ya malaika yaneenyile ya kacema yazungwike. Maliya welenganyanga sana pa mazwi yano malaika wamuneenyile nupya atatazile ailile. Ya kacema yaswilile umu kucema imfwele zyao, ala yakutaizya Yeova pali vyonsi vino yuvwile na vino yaweni.