Yeova Wacingilile Yesu

Umu mpanga iyaelile uku ufumondaka uwa mpanga iya Izlaeli mwali antu aataile ukuti intanda zingayatungulula. Wanda umwi usiku, aonsi aa ku Ufumondaka yaweni ulutanda ulwakanga sana ala lukupita umwi yulu, nupya yalulondiile. “Lutanda” lulo lwayatungulwile uku Yelusalemu. Aonsi yatandike ukuzya antu iyati: ‘Uzye umwana aalaya umwene uwa Yayuda alikwi? Itwiza ukuti tumufukamile.’

Lino Helodi, umwene uwa mu Yelusalemu, uvwile ilyasi pa mwene umupya, wasakamile sana. Uzizye intunguluzi zyakwe ya simapepo ati: ‘Uzye umwene wii ali nu kuvyalilwa kwi?’ Nayo yamuneenyile iyati: ‘Yakasesema yasoowile ukuti ali nu kuvyalilwa umu Betelemu.’ Fwandi Helodi wamile aonsi afumile uku Ufumondaka nu kuyaneena ati: ‘Yangini uku Betelemu mukalonde umwana wii. Ndi cakuti mwamuzana mukize mukaneene kuno ali. Nani nkulonda nkaye nkamufukamile.’ Nomba uu wali ufi.

Nupya kwene “ulutanda” lwatandike ukupita. Aonsi yalulondiile ku Betelemu. “Ulutanda” lwaile ulwimilila papela iya ng’anda umwali Yesu. Lyene aonsi yaa ingile nu kuzana Maliya nu mwanakwe Yesu. Yafukamile umwana wii nu kumupeela ivya upe apaali goldi, ubani ni vinunkile. Uzye umu cumi a Yeova u watumile aonsi yaa kuti yakalonde Yesu? Awe foo.

Uwanda kwene uwa usiku Yeova waneenyile Jozefu mu ciloto ati: ‘Helodi akulonda ukukoma Yesu. Senda umuci wako nu mwana muye uku Ijipti. Ukikale kuuku kufikila lino ndakuneena ukuti uwele.’ Lilyo kwene sile, Jozefu nu lupwa lwakwe yaile uku Ijipti.

Yeova waneenyile aonsi afumile uku Ufumondaka kuti yataswilila kuli Helodi. Lino Helodi wilwike ukuti aonsi yaya yasikuswilila kuli aliwe, wasosile sana. Lino wafizilwe ukumanya ukwali Yesu, wapingwile ukuti ana yonsi aonsi aa musiku wakwe Yesu yakomwe. Nomba Yesu wali umucingililwe pano wali uku Ijipti ukutali.

Lino papisile insita, Helodi wafwile. Fwandi Yeova waneenyile Jozefu ati: ‘Lyene ungaswilila.’ Jozefu, Maliya na Yesu yaswilile uku Izlaeli nupya yaile iyakuula ing’anda mu musumba uwa Nazaleti.