Umwanaci pa Cisima

Pa cisila ica kuzevya Ucilo, Yesu na asambi yakwe yapisile umu Samaliya pa kuswilila uku Galili. Lino yaali umupiipi nu musumba uwa Sika, Yesu wapuuzile pa ncende iyamwanga ukuti cisima cakwe Yakobo. Lino wapuuzanga, asambi yakwe yaile umu musumba umukukala ivyakulya.

Umwanaci umwi wizile uku cisima uku kutapa manzi. Yesu wamuneenyile ati: “Mpeko manzi akumwa.” Nawe watiile: ‘U mulandu ci uno ukulandila nani? Nene umwanaci Umwina Samaliya. Ayuda yasiuvwana na Ina Samaliya.’ Yesu nawe wamuneenyile ati: ‘Ndi cakuti umanya wino ukulanda nawe, nga watundenga manzi nupya nani nga inkupeela manzi akapeela umi.’ Umwanaci uzizye ati ‘walozya mwi? Utakweti ni ca kutapilamo manzi.’ Yesu watiile: ‘Wensi akamwa manzi yano nkapeela atalatala auvwepo ulusala.’ Mwanaci nawe watiile: “Musambazi, mpeele manzi yayo.”

Lyene Yesu wamuneenyile ati: ‘Kalete uwako uku cisima.’ Nawe watiile: ‘Ntakwata uwane.’ Lyene Yesu wamuneenyile ati: ‘Vino ukulanda ivya cumi. Watwalwapo uku yonsi 5 nupya wino ukwikala nawe asi uwako.’ Umwanaci nawe watiile: ‘Lyene namanya ukuti wewe kasesema. Antu yane yazumila ukuti tungaapepela Leza uku mwamba kwene uu, lelo Ayuda yene yakati tungaapepela sile uku Yelusalemu. Nataila ukuti lino Mesiya aliza alatulanga inzila iya kupepelamo.’ Lyene Yesu walanzile icintu cimwi cino atatazile aneenepo ali wensi, watiile: ‘Neene Mesiya.’

Mwanaci waile zuwa zuwa umu musumba nu kuneena Aina Samaliya ati: ‘Ninzana Mesiya. Atamanya vyonsi pali neene. Twapiteni mukamulole.’ Yamulondiile uku cisima nu kuyakutika kuli vino Yesu wasambilizyanga.

Aina Samaliya yaamile Yesu kuti aikale umu musumba wao. Wasambilizye umu musumba uwa apa manda yaili, nupya antu aingi yaamutaile. Yaneenyile umwanaci Umwina Samaliya ati: ‘Pa cisila ica kukutika kuli vino muntu wii akusambilizya, itusininkizya ukuti, umu cumi alatuula antu aa mu nsi.’