Julai

Vyonsi vino Yesu walandanga nu kucita kumwi sile ni vizungusyo vino wacitanga, vyalangililanga vino Isi akaelenganya na vino akayuvwa. (Yoa. 14:9) Ivyani vino tungasambilila uku vizungusyo vino Yesu wacisile? Yesu na Isi yatutemwa sana. Lino Yesu wali pano nsi walangilile ukuti watemilwe sana antu ukupitila muli vino waomvyanga amaka yakwe aakucita ivizungusyo ku kuteekezya antu aculanga. Apa nsita imwi, aonsi yaili impafu yamupapasile ukuti ayapozye. (Mate. 20:​30-34) Lolini ukuti “Yesu uvwile uluse” nupya wayapozizye. Izwi ilyaomviwa paa, ilyasenulwa kufuma mu Cigliki ilyakuti “wayuvwilile uluse” lingalozya ku kuya sana ni cikuuku. Icikuuku ca musango uu icayamo nu kutemwa i calenzile Yesu aliisye antu ali ni nzala nu kupozya umonsi uwalwile tembwe. (Mate. 15:32; Mako 1:41) Vino Yeova waya sana nu “luse” na vino umwanakwe watutemwa vikalenga tusininkizye ukuti yakauvwa sana uyi nga tukucuula. (Luka 1:78; 1 Pet. 5:7) Yakalondesya ukufumyapo iviipe vyonsi ivikacuzya antunze! w23.04 3 ¶4-5

Tulinzile ukwezya na maka ukukanabelenga nanti ukukutika uku vintu iviipe ivyaseeka sana mu nsi ii yakwe Satana. Tungaya na melenganyo asuma nga tukubelenga nu kuisambilizya Baibo. Ukuzanwa umu kulongana nu kuombako umulimo wa kusimikila nako kwene kulatwazwa ukulaelenganya ivisuma. Nupya Yeova watulaya ukuti atalaleka tweziwe ukucila pali vino tungazizimizya. (1 Kol. 10:12) Pakuti tutwalilile ukuya acisinka kuli Yeova umu manda yaa aakusyalikizya, tulinzile ukulapepa sana. Yeova akalonda twapepa kuli aliwe nu kumulondolwela vino tukuyuvwa. (Masa. 62:8) Mwalumbanya nu kutaizya Yeova pali vino akacita. Mwamulenga ukuti amwazwa ukuya asipe lino mukusimikila. Mwamulenga ukuti amwazwa ukuzizimizya intazi nu kumwazwa ukucimvya mezyo. Mutalinzile ukuleka icili consi nanti sile umuntu aliwensi ukumulesya ukulapepa kuli Yeova. w23.05 7 ¶17-18

U mulandu ci uno tukazanilwa umu kulongana? Cintu icikalamba, tukaya umu kulumbanya Yeova. (Masa. 26:12; 111:1) Nupya tukazanwa umu kulongana pakuti twakomelezyanya umu nsita zii izitale. (1 Tesa. 5:11) Tukacita ivintu vii viili ndi cakuti tukwasuka pa kulongana. Nomba lino tukulonda ukwasukapo, kungaya ivingalenga citutalile: Intete zya kwasukapo. nanti limwi tungalonda ukwasukapo nomba limwi yatanga yatusonte. I vyani ivingatwazwa ndi cakuti ivya musango uu vikutucitikila? Mutumwa Paulo watiile tulinzile ukwika mano ‘uku kukomelezyanya.’ Ndi cakuti twiusya ukuti yauze umwi umba yamakomeleziwa nanti cakuti twasuka icasuko iciipi, tutalauvwa intete izya kwasuka. Nupya ndi cakuti yatatusonsile lino twimika ikasa, tungaya ni nsansa ukumanya ukuti yauze yamakwata isyuko ilya kwasukapo.—1 Pet. 3:8. w23.04 20 ¶1-3

Umwene walanzile ukuti Aina Izlaeli yaswilile uku Izlaeli. Ayuda aasenzilwe umu uzya uku Babiloni pa myaka 70, yaswilile uku myao uku Izlaeli. (Ezila 1:​2-4) Yeova u wali nu kulenga sile cii ukucitika. Aina Babiloni yatali nu kuleka Aina Izlaeli ukuswilila uku myao. (Eza. 14:​4, 17) Uteeko wa Babiloni wizile iusila maka, nupya umwene umupya wizile anena Ayuda ukuti nga yakulonda yangapita. Ayuda yonsi sana sana imitwe ya ndupwa ukusoololapo ndi cakuti yali nu kwikala umu Babiloni nanti nga yali nu kuswilila uku myao. Citaali icanguke ukupingulapo ivya kucita. Pa mulandu na vino aingi walanga iyakota, yelenganyanga pa ntazi izyali nu kucitika lino yakuswilila uku Izlaeli. Nupya pa mulandu wakuti Ayuda aingi yavyalilwe umu Babiloni, ali mpanga sile ino yamanyile. Ana aavyalilwe umu Babiloni, yelenganyanga ukuti impanga iya Izlaeli yali i mpanga iyavikolwe vyao. Ayuda yamwi izile iyakwata sana ivyuma umu Babiloni, fwandi cayatalile ukusya mang’anda yao asuma nu uculuzi uno yacitanga nupya yataelizye imikalile iya ku mpanga yuze. w23.05 14 ¶1-2

Izwi Lyakwe Leza likatukomelezya ukuti tulinzile ukulazizimizya, ukuya ni cikuuku, alino kutemwa. Pali Luka 21:19 pakati: “Nga mwazizimizya alino mulapusuka.” Na pali Kolose 3:12 pakati: “Zwalini . . . cikuuku.” Alino pali 1 Tesalonika 4:​9, 10 pakati: “Leza wamusambilizya ukuti mulinzile ukutemwana. . . . Lelo ina itu, tukumukonkomezya ukuti mutwalilile ukucita vivyo kwene nu kucilapo.” Ivipande vii vyonsi vyalembiilwe uku yasambi alanganga ukuzizimizya, icikuuku, alino nu kutemwa. Nanti ciye vivyo yalondekwanga ukutwalilila ukuya ni miyele kwene yii. Vikwene avino naswe tulinzile ukucita. Pakuti mumanye vino mungacita, sambililini vino Aina Klistu aakutandikilako yatwalilile ukuya ni miyele kwene yii. Lyene mumalola vino mungasambilila kuli aliyo alino na vino mungasininkizya ukuti imuipekanya uku ucuzi ukalamba. Lyene lino ucuzi ukalamba ulatandika, mulatwalilila ukuzizimizya pano ala mwasambilila mpiti ivya kuzizimizya. w23.07 3 ¶4, 8

Asi mulandu sweswe yapakwe nanti amu “mfwele nazyuze,” swensi kwene tulinzile ukutwalilila ukupita umu “Museo wakutungulula kuli Umuzilo” ulatwazwa ukulapepa Yeova ndakai nu ku nkoleelo lino Uwene wakwe Leza ulaleta ivisuma pano nsi. (Yoa. 10:16) Ukufuma umu 1919 C.E., aonsi aingi, anaci, na ana yafuma muli Babiloni Mukalamba ukupepa kwa ufi ukwaya umu nsi yonsi nu kutandika ukupita umu museo uu uwa unkolanya. Lino Ayuda yaswililanga uku Izlaeli, Yeova wasininkizye ukuti kusi icili consi ica kuyapumvyanya lino yakupita. (Eza. 57:14) Nga ndakai, i vyani vino Yeova akasininkizya ukuti vyacitika umu “Museo wakutungulula kuli Umuzilo” uwayako ndakai? Imyaka iingi uku cisila lino umwaka wa 1919 utatala wafika, Yeova waomvizye antu aamutiinanga ukwazwa yauze ukufuma muli Babiloni Mukalamba. (Loliniko na Ezaya 40:3.) Yaombisye pakuti yangacita ivintu ivingaca vilenge cangukile antu aakalondesya ukumanya Yeova ukufuma muli Babiloni Mukalamba nu kuya muli paladaise uwa unkolanya muno ukupepa kwa cumi kwakwe Yeova kwaweziwe. w23.05 15-16 ¶8-9

Yeova akalonda twaya ni nsansa lino tukumuombela alino nu kuitemelwa. (2 Kol. 9:7) Uzye fwandi, tulinzile ukutwalilila ukuombesya ukufikilizya uyo nanti cakuti tatautemilwe? Uvwini vino Paulo walanzile. Watiile: “Nkacuzya umwili wane nu kuuteeka uuzya.” (1 Kol. 9:​25-27) Paulo wezyanga apapezile amaka yakwe ukucita ivisuma nanti cakuti umwili wakwe walondanga ukucita iviipe. Uzye Yeova wazangilanga muli vino Paulo wacitanga? Ee. Nupya Yeova wamupaazile pa kuombesya kwakwe. (2 Tim. 4:​7, 8) Vikwene avino caya, Yeova akauvwa ningo sana nga walola tukulonda ukufikilizya uyo nanti cakuti tusikulondesya. Akaya ni nsansa pa mulandu wakuti tusilonda ukufikilizya uyo pa mulandu wakuti ituutemwa, lelo a pa mulandu na vino twamutemwa. Wakwe vino Yeova wapaazile Paulo, naswe kwene alatupaala pa kuombesya kwitu. (Masa. 126:5) Nupya nga twalola vino Yeova akutupaala, tungatandika ukulondesya ukuomba. w23.05 29 ¶9-10

Mutumwa Paulo wakolinye antu aatalapusuka pa wanda wakwe Yeova uku yantu atiyalaala. Antu atiyalaala yasimanya ivikucitika nanti sile avino insita ikupita. Fwandi yasimanya ndi cakuti kukucitika ivintu ivya mpomvu nanti sile ukuombako ivintu kwene vivyo. Ndakai, antu aingi yaya kwati aantu atiyalaala. (Loma 11:8) Yatasininkizya ukuti ivintu ivikacitika vikalangilila ukuti tukwikala umu “manda aakusyalikizya” nu kuti likwene sile kwasya kuye ucuzi ukalamba. (2 Pet. 3:​3, 4) Lelo cila wanda, uwanda wakwe Yeova ukaya ukupalamilako sile.(1 Tesa. 5:6) U mulandu ci uno tulinzile ukuya ateekele nupya? aacenjele? Pano cingalenga ukuti tutaya umu vikanza vya miteekele nanti sile u mu vikanza vya mu nsi. Lino uwanda wakwe Yeova ukuya ukupalama, tungapatikiziwa ukuya umu vikanza vya miteekele nanti umu vikanza vya mu nsi. Lelo, tutalinzile ukulasakamikwa sana pali vino tulacita lino yakutupatikizya. Umupasi wakwe Leza ulatwazwa ukuya ateekele, ukuya na melenganyo asuma alino nu kulapingula ningo pa vintu.—Luka 12:​11, 12. w23.06 10 ¶6-7

I vyani vino mukaelenganyapo nga muvwa izina lyakuti Samusoni? Limwi mukaelenganya pa monsi uwali sana na maka. Kwene ica cumi. Lelo Samusoni atapingwilepo ningo pa vintu, i calenzile ukuti acuule sana. Nanti ciye vivyo, Yeova wisile mano kuli vino Samusoni wali uwa cisinka, nupya walenzile ukuti alembwe muli Baibo pakuti twasambililako. Yeova waomvizye Samusoni ukuomba imilimo iya kuzunguka pakuti aazwe antu yakwe asoololwe Aina Izlaeli. Imyaka ingi pa cisila ca mfwa yakwe Samusoni, Yeova walenzile umutumwa Paulo ukulumbula Samusoni pamwi na aonsi aali nu utailo. (Aeb. 11:​32-34) Vino Samusoni wacisile vingatukomelezya. Wataile sana Yeova na lino ivintu vyatazile. Tungasambilila ivingi nu tungakomeleziwa kuli vino Samusoni wacisile. w23.09 2 ¶1-2

Tungatwalilila ukuzizimizya ndi cakuti lyonsi tukunena Yeova ivikutusakamika. (1 Tesa. 5:17) Limwi pa nsita yii mutakweti intazi ikome. Nomba uzye mukapepa kuli Yeova ukuti amwazwe lino imusoka, lino imuvulunganyiziwa nanti lino mutamanyile ivya kucita? Ndi cakuti ndakai mukapepa lyonsi kuli Yeova lino imukwata intazi izinono, cilamwangukila ukulapepa kuli aliwe na lino mulakwata intazi izikulu uku nkoleelo. Lyene mungasininkizya ukuti wamanya lino mungalondekwa uwazwilizyo alino nu wazwilizyo uno mungalondekwa. (Masa. 27:​1, 3) Ndi cakuti tukuzizimizya intazi ndakai cilatwangukila ukuzizimizya ucuzi ukalamba uuli uku nkoleelo. (Loma 5:3) U mulandu ci uno twalandila vivyo? Aina na ya nkazi aingi yazana ukuti lyonsi lino yazizimizya intazi ikome, cikayazwa ukuzizimizya intazi na yuze ino yangakwata. Nga yazizimizya, utailo wao ukakomelako nu kumanya ukuti Yeova waiteyanya nupya akalondesya ukuyazwa. Pa mulandu wakuti yataila Yeova, yazizimizye intazi na zyuze zino yakweti.—Yako. 1:​2-4.w23.07 3 ¶7-8

Cikuuku cino Yeova wakwata alino na vino waicefya vikalenga ataumilila sile pali vino akwelenganya. Wakwe, Yeova walangilile ukuti wali u muicefye lino wali umupiipi nu konona antu aacitanga iviipe umu musumba wa Sodoma. Yeova wanenyile ya malaika ukuyanena Loti uwali umulungami ukuti autukile uku ncende ya myamba. Nomba Loti atalondanga ukuyako. Fwandi wapaapasile Yeova ukuti wene pamwi nu lupwa lwakwe yutukile uku Zoali umusumba uwali unono uno Yeova walondanga ukononela kumwi. Yeova nga atemwa nga wapatikizye Loti ukuti alondele vino watamunena. Yeova wazumilizye vino Loti walanzile, nupya vii vyalenzile ukuti atonona umusumba uwa Zoali. (Utan. 19:​18-22) Lino papisile imyaka iingi, Yeova walangilile ukuti wali ni cikuuku uku Ina Ninive. Watumile kasesema Yona ukuyanena antu aku Ninive aacitanga iviipe ukuti umusumba wao wali nu kononwa. Lelo lino Ina Ninive yalapiile, Yeova wayuvwilile uluse nupya atononyile umusumba.—Yona 3:​1, 10; 4:​10, 11. w23.07 21 ¶5

I vyani vino tungasambilila kuli vino Yoasyi wacisile? Wali wa muti uwakwata imisisi ikulondekwa ukutungililwa ni cimuti cuze. Lino Yeoyada wafwile uwali wa cimuti icatungililanga Yoasyi, Yoasyi wizile atandika ukupandwa mano na asangu nupya walesile ukuya uwa cisinka kuli Yeova. Cii cikululangilila sile ukuti tutalinzile ukuya na katiina kuli Leza pa mulandu wakuti ya lupwa itu alino na ina na ya nkazi yaya ni miyeele isuma. Pakuti tutwalilile ukuya aakome muli ukapepa, tulinzile ukulakomya ucuza witu na Leza ukupitila umu kuisambilizya Baibo lyonsi, kwelenganya pali vino tukuisambilizya, alino nu kulapepa (Yele. 17:​7, 8; Kolo. 2:​6, 7)Yeova asitwenekela ukucita vino tutanga tukwanisye. Lelo vino akalonda vyaya api lembo lyakwe Kasambilizya 12:​13, apakati: “Uwaoopa Leza nu kuyela amasunde yakwe, pano acino antunze yaumbilwe.” Nga tukuvwila Leza, cilalenga ukuti tukacimvye amezyo yano tuli nu kukwata uku nkoleelo wakwe vino Obadiya na Yeoyada yacisile. Kusi icili consi icilalenga ucuza uno twakwata na Yeova ukononeka. w23.06 19 ¶17-19

Icikomo 5 catandikilako na mazwi akuti: “Uwikala pa cilimba ca wene walanzile ati.” (Kuso. 21:5a) Amazwi yaa yacindama sana pano yakalangilila amazwi yano Yeova umwineco walanzile umu vilolwa pa miku itatu umwi buku lya Kusokolola. Usininkizyo uu utapeezilwe ukupitila muli ya malaika nanti muli Yesu, lelo Yeova umwineco u wapeezile. Cii cikalenga tutaile amazwi alondelelapo umu cikomo cii. U mulandu ci? Pano “Leza aatanga abepe.” (Tito 1:2) Amazwi yaa yakalenga tusininkizye ivyalembwa pali Kusokolola 21:​5, 6. Elenganyini pa mazwi yano Yeova walanzile akuti “Lolini!” Izwi lino yasenula umu Cigiliki lyakuti “lolini!” lyaomviwa imiku ingi umwi buku lya Kusokolola. I vyani vino Leza walanzile ivyalondelela api toni lii? Walanzile ukuti: “Nkupanga ivintu vyonsi ukuya ivipya.” Icacumi ukuti Yeova alacita ivintu vii uku nkoleelo, lelo pa mulandu wakuti wasininkizya ukuti alafikilizya ulayo uu walanzile kwati ivintu vivyo vyatandika ukucitika.—Eza. 46:10. w23.11 3-4 ¶7-8

Mutumwa Petulo watwalilile ukulwisyanya nu utonte. Lolini vimwi ivyamucitikiile. Lino Yesu wayanenyile pali vino wali nu kucuula nu kufwa pakuti afikilizye usesemo wa muli Baibo, Petulo wamukalipile. (Mako 8:​31-33) Pa miku ingi, Petulo na atumwa yauze yapazyanyanga pali wino wali umukalamba. (Mako 9:​33, 34) Apa wanda wa kusyalikizyako usiku lino Yesu atatala wafwa, Petulo waputwile ikutwi ilya monsi umwi. (Yoa. 18:10) Apa wanda kwene uwa usiku, Petulo wali sana ni intete icalenzile ukuti akane Yesu imiku itatu. (Mako 14:​66-72) Na cii calenzile ukuti Petulo alile sana. Yesu atatazyezile Petulo pali vino wacisile. Pa cisila cakuti Yesu watuutululwa, wapeezile Petulo isyuko ilyakulanga vino wamutemilwe. Yesu wanenyile Petulo ukulacema utwana twakwe utwa mfwele. (Yoa. 21:​15-17) Petulo waiteinye ukucita vino Yesu wamunenyile. Petulo wali umu Yelusalemu apa wanda wa Pentekosti nupya wali pa yantu atandikilepo ukupakwa nu mupasi wa muzilo. w23.09 22 ¶6-7

“Petulo wanenyile ya eluda yauze ukuti: “Mwacema imfwele zyakwe Leza.” (1 Pet. 5:​1-4.) Ndi cakuti mwemwe ya eluda, twamanya ukuti mwatemwa aina na ya nkazi nupya mukalonda ukuyasakamala. Lelo insita zimwi mungayuvwa ukuti imupamviwa sana nanti imutonta sana icakuti mutanga mukwanisye ukuomba umulimo uwo. Mungacita uli nga caya vivyo? Mwanena Yeova vyonsi ivikumusakamika na vino mukulondesya ukwazwa aina na ya nkazi. Petulo walemvile ukuti: “Ndi cakuti umwi akuombela auze, lekini acita vivyo wa muntu uwataila maka yano Leza akapeela.” (1 Pet. 4:11) Aina na ya nkazi yangakwata intazi zino zitange zisile pali ino nsita. Lelo mwaiusya ukuti “kacema mukalamba,” Yesu Klistu angayazwa. Angacita vivyo ndakai alino nu mu nsi ipya. Leza akalonda ukuti ya eluda yatemwa aina na ya nkazi, ukuyasakamala, alino nu kulenga ‘imfwele zyayakolanya.’ w23.09 29-30 ¶13-14

Tutalinzile ukuya ni myelenganyizizye ya antu aatacindika masunde yakwe Yeova. Ndi cakuti tukwelenganya wa yantu aatacindika masunde yakwe Yeova, naswe kwene tungata ukuyacindika. (1 Kol. 3:19) “Amano ya mu nsi yii” yakalenga antu ukukanauvwila Leza. Aina Klistu yamwi aikalanga umu Pegamu nu mu Tiyatila izile iyatandika ukuya ni miyele iipe ino antu aliko pa nsita iiya yakweti wakwe ukucita uzelele alino nu kupepa utulubi. Yesu wakalipiile sana amu vilongano vii pa mulandu wakuti izile iyatandika ukuya ni miyele iipe. (Kuso. 2:​10-20) Ndakai, antu amu nsi yii yakatupatikizya ukucita iviipe. Ya lupwa ni vyuza yangatunena ukuti twakomya sile ivintu nu kutupatikizya ukuti tute ukulondela masunde yakwe Yeova. Wakwe, limwi yangatunena ukuti asi lyonsi lino cacindama ukulondela masunde yakwe Leza nu kuti masunde amu Baibo yata ukuomba. Insita zimwi, tungatandika ukwelenganya ukuti ivintu vino Yeova akatunena vitacindama. Limwi tungatunkwa ukuti ‘tucile umu vyalembwa.”—1 Kol. 4:6. w23.07 16 ¶10-11

Maliya nyina wakwe Yesu, walondekwanga ukukomeleziwa. Pa nsita ii walanga atatala watwalwa, nomba wali nu kukwata inda. Atamanyile ivili vyonsi pa kukuzya ana, lelo wali nu kulasakamala umulumendo uwali nu kwizaya Mesiya. Nupya pa mulandu wakuti atatazile alalepo nu monsi, wali nu kulondolwela uli Jozefu uwamutaisye? (Luka 1:​26-33) Uzye Maliya wapokeelile uli amaka? Walenzile uwazwilizyo ukufuma kuli yauze. Wakwe, wanenyile Gabilieli ukumunena ivyeo na vyuze apa mulimo uno wamupeezile. (Luka 1:34) Lyene pa cisila, waile “uku mpanga iyayeliile umu myamba,” uku Yuda umu kutandalila lupwa wakwe Elizabeti. Elizabeti wataizye Maliya nupya Yeova wamulenzile ukulanda amazwi ausesemo apa mwana wino Maliya wali nu kukwata. (Luka 1:​39-45) Maliya walanzile ukuti Yeova “wacita ivintu vya maka uku maka yakwe.” (Luka 1:​46-51) Yeova wakomelizye Maliya ukuomvya Gabilieli na Elizabeti. w23.10 14-15 ¶10-12

Impendwa sile inono iya asambi yakwe Klistu ali yano yapakwa nu mupasi wa muzilo, nupya yakaipakizya ucuza uiyele na Yeova. Ya 144,000 yaa yalaomba umulimo wakwe usimapepo ukwi yulu pamwi na Yesu. (Kuso. 14:1) Muputule Uwa Muzilo umwi tenti lya kupepelapo ukaimililako, ya 144,000 asoololwa ukuya ana yakwe Leza aacili pano nsi. (Loma 8:​15-17) Mwa Muzilo Sana umwi tenti lya kupepelapo mukaimililako iyulu, muno Yeova akaikala. “Ketani” iyapatukiinye Umwa Muzilo nu Mwa Muzilo Sana ikaimililako umwili wakwe Yesu uwa untunze uwalenganga atingila umwi yulu nga Simapepo Mukalamba umwi tempele lya unkolanya. Lino Yesu wapeezile umwili wakwe wi lambo pa mulandu wa yantunze, wayuzile inzila iya kuya nu umi wa kwi yulu uku Ina Klistu apakwe. Nayo kwene pakuti yapokelele icilambu cao ica kuya ukwi yulu, yalinzile ukusya imili yao iya untunze.—Aeb. 10:​19, 20; 1 Kol. 15:50. w23.10 28 ¶13

Gidyoni waicefizye lino Aina Efulemu yamususiizye. (Yakapi. 8:​1-3) Atayaswike uyi uyi. Walangilile ukuti wali u muicefya lino wakutiike kuli vino yailizyanyanga na lino wali ni cikuuku lino walandanga nayo, na cii calenzile ukuti yateeke imyenzo. Ya eluda aicefya yakakolanya Gidyoni lino yakukutika nu kuya aafuuke lino yakwasuka kuli vino aakuyasuusya yakulanda. (Yako. 3:13) Nga yakucita vivyo, yakalenga umu cilongano imuya umutende. Lino Gidyoni walumbanyiziwe pali vino wacimvizye Aina Midyani, walesile ululumbi ukuya kuli Yeova. (Yakapi. 8:​22, 23) Uzye aina asontwa yangakolanya uli Gidyoni? Nayo kwene yangaleka ululumbi lwaya kuli Yeova pa milimo ino yakaomba. (1 Kol. 4:​6, 7) Wakwe, ndi cakuti yamwi yataizya eluda pali vino akasambilizya ningo, limwi eluda angalanda ukuti tukafumya sile utunguluzi umwi Izwi lyakwe Leza nu kuti swensi kwene tukasambilila sile ukufuma ukwi iuvi lyakwe Yeova. Ya eluda yangelenganya pa misambilizizye yao ndi cakuti ikalenga Yeova ukucindikwa nanti yakalonda sile ukuvwisya ningo antu. w23.06 4 ¶7-8

Ndi cakuti vino tukupepelapo visikucitika, tungayuzya sweineco ukuti, ‘Uzye vikwene avino ndinzile ukupepelapo?’ Ilingi tukaelenganya ukuti itumanya ivingatuzipila. Nomba insita zimwi tungapepela pa vintu ivitanga vitwazwe pa nsita itali. Insita zimwi tungapepela apa nzila yakumalilamo intazi imwi ala kuli ni nzila yuze isuma ino intazi iyo ingasililamo. Nupya insita zimwi vino tukupepelapo vingapusana nu kulonda kwakwe Leza. (1 Yoa. 5:14) Wakwe, elenganyini pa yavyazi. Yapepanga ukuti Yeova akazwe umwana wao ukutwalilila ukuya umu cumi. Yalolanga kwati ukucita vii kwali sile ningo. Nomba, Yeova asipatikizya ali wensi ukumuombela. Akalonda swensi kwene, kumwi sile na ana, twaisoolwela ukumupepa. (Malan. 10:​12, 13; 30:​19, 20) Fwandi avyazi yaa yalinzile ukulenga Yeova ukuti ayazwe ukwazwa umwana wao ukutemwa Yeova nu kuya cuza wakwe.—Mapi. 22:6; Efes. 6:4. w23.11 21 ¶5; 23 ¶12

U mulandu ci uno ukuteekezya yauze kukalangila ukuti twayatemwa? Kulingana nu lupapulo lumwi ulwa kulondelezyamo ivyeo ulukalanda pali Baibo, izwi lino Paulo waomvizye ilyakuti “kuteekezya” likapiliula “ukuya umupipi nu muntu umwi lino akuzizimizya intazi.” Fwandi ndi cakuti twazwa kapepa munji lino ali ni ntazi, ala tukumwazwa ukutwalilila ukupita umu nzila ya ku umi. Fwandi lyonsi lino twateekezya umwina nanti nkazi, ala tukulanga ukuti twamutemwa. (2 Kol. 7:​6, 7, 13) Uluse nu kuteekezya vyalemana sana. U mu nzila ci? Uluse u lukalenga umuntu ukuteekezya umwi nu kumwazwa lino akucula. Fwandi tukatandikilapo ukuvwila umwi uluse, alino itumuteekezya. Paulo walanzile ukuti uluse luno Yeova wakwatila antu u lukalenga ukuti ayateekezya. Paulo walondolwile Yeova ukuti a “Tata uwaya nu luse nupya Leza aakateekezya muli vyonsi.”—2 Kol. 1:3. w23.11 9-10 ¶8-10

Alondezi yakwe Klistu yonsi yalinzile ukwenekela ukukwata macuzi. Elenganyini pali vino vyacitikiile umutumwa Paulo. Wanenyile aali umu Tesalonika ukuti: “Pano lino twali namwe, twamunenelanga limwi ukuti tuli nu kucula, nupya vikwene i vyatucitikile, wakwe vino namwe kwene mwamanya.” (1 Tesa. 3:4) Nupya walembiile Aina Kolinto ukuti: “Ina itu tukulonda kuti mumanye amacuzi yano twakweti . . . Tutaamanyile ndi cakuti twali nu kupusuka nanti foo.” (2 Kol. 1:8; 11:​23-27) Na ndakai kwene, Aina Klistu yalinzile kwenekela ukukwata intazi. (2 Tim. 3:12) Lino mukulondela Yesu nu kumutaila, limwi Ya lupwa na ya cuza yangamicuzya. Insita zimwi yangamicitila ivintu iviipe. Nanti limwi yano mukaomba nayo yakamicuzya pa mulandu wakuti mwatwalilila ukuya acisinka. (Aeb. 13:18) Uzye yatala yamicuzyapo uku amu uteeko pa mulandu wakunenako yauze pa upaalilo winu? Paulo walanzile ukuti lino yakutucuzya tulinzile ukutwalilila ukuya ni nsansa. w23.12 10-11 ¶9-10

Yakobo wazizimizye intazi na zyuze. Ana yakwe Yakobo, Simeoni na Levi, yalesiile umuzewanya pa lupwa na pi zina lyakwe Yeova. Nupya umuci wakwe ciili wino watemilwe sana, Lakeli, wafwile pa kupaapa umwana wakwe ciili. Alino pa mulandu ni cipowe, Yakobo wafumile kuno wikalanga nu kuya uku Ejipti ala umukote. (Utan. 35:​16-19; 37:28; 45:​9-11, 28) Asi mulandu ni ntazi zino wakweti, atatazile ate ukutaila Yeova na malayo yakwe. Yeova walangilile Yakobo ukuti wamusakamalanga. Asi mulandu na vino Labani wacitilanga Yakobo, Yeova wapeezile Yakobo ivyuma ivingi. Nupya Yakobo wataizye sana Yeova lino waloline na Jozefu wino welenganyanga ukuti wafwa. Pa mulandu wakuti Yakobo wali a cuza wakwe Yeova, calenzile azizimizye intazi zino wakweti. (Utan. 30:43; 32:​9, 10; 46:​28-30) Naswe kwene nga twatwalilila ukuya ya cuza na Yeova, tungazizimizya intazi izingiza ukwaula ukwenekela. w23.04 15 ¶6-7

Masamu cipande 23 u lwimbo luno Devedi wimvile muno walondolwile vino Yeova wamutemilwe na vino wamusakamalanga. Mu masamu yaa, Devedi walanzile pali ucuza uwali pali aliwe nu Mucemi wakwe, Yeova. Devedi walesile ukuti Yeova amutungulula nupya wasintilile pali aliwe, na cii calenzile ayuvwa ukuti wacingililwa. Devedi wamanyile ukuti Yeova wali nu kulamulanga ukutemwa cila wanda umu umi wakwe onsi. I vyani ivyalenzile ayuvwa vivyo? Devedi wayuvwanga ukuti Yeova wamusakamalanga pano lyonsi wamupeelanga vyonsi vino walondekwanga. Nupya Devedi wamanyile ukuti wali a cuza wakwe Yeova nu kuti wamutemilwe. Nupya vii vyalenzile asininkizye ukuti asi mulandu ni vyali nu kumucitikila uku nkoleelo, Yeova wali nu kumusakamala. Pa mulandu wakuti Devedi wataile ukuti Yeova wamutemilwe nupya wamusakamalanga, atasakamikwanga pa cili consi lelo wali ni nsansa nupya wateesile umwenzo kuli vino wakweti.—Masa. 16:11. w24.01 29 ¶12-13

Ukutandika lino kwali nkondo ya nsi yonsi yako cili antu yakwe Yeova yatwalilila ukuya ni nsansa alino nu untungwa lino yakuomba umulimo wa kusimikila umu mpanga izingi. Cii calenga antu ukumanya Yeova nupya aomvi yakwe yakaomba umulimo uu umu nsi yonsi. Na ndakai kwene aina aya Umwi Umba Ilikatungulula yatwalilila ukupokelela utunguluzi ukufuma kuli Klistu. Umulandu uno yakacitila vi yakalonda yapeela utunguluzi ukulingana nu kulonda kwakwe Leza. Yakaomvya angalizi ya viputulwa na ya eluda ukupeela utunguluzi ku amu cilongano. Ya eluda apakwe yaya ‘umwi kasa lyakwe Klistu ili lunji.’ (Kuso. 2:1) Ukwaula nu kutwisika ya eluda yaa yatamalilika nupya yakaluvyanya. Mose na Yoswa nayo kwene yaluvyanyanga wakwe vino cali nu kuyatumwa. (Mpe. 20:12; Yoswa 9:​14, 15; Loma 3:23) Nomba Klistu alatwalilila ukutungulula Umuomvi mutailwe nupya uwa mano alino na ya eluda. Fwandi ukwaula nu kutwisika kusi umulandu ungalenga tutalondela utunguluzi uno tukapokelela ukupitila umu ina asontwe. w24.02 23-24 ¶13-14

Ndakai tungalanga ukuti tukataizya Yeova lino tukulanda pali vino twamutemwa. Lino tukuomba umulimo wa kusimikila cino tukalonda sana ukwazwa antu ukupalama kuli Yeova alino nu ukulalola Tata witu wakwe vino tukamulola. (Yako. 4:8) Tukauvwa ningo lino tukulondolwela antu ukuomvya Baibo pa miyele isuma ino Yeova wakwata wakwe ukutemwa, umulinganya, amano, amaka, alino ni miyele yuze isuma. Tukalumbanya Yeova alino nu kwezya na maka itu ukumukolanya. Nga twacita vii tutalaya wa antu amu nsi. (Mate. 5:​14-16) Lino tukuombela pamwi nayo tukakwata isyuko ilya kuyalondolwela umulandu uno tusicitilako ivintu vimwi vino yakacita. Ci cikalenga yamwi ukutandika ukulondesya ukupalama kuli Yeova. Ndi cakuti tukulumbanya Yeova umu nzila ii tukalenga umwenzo wakwe ukuzanga.—1 Tim. 2:​3, 4. w24.02 10 ¶7

Pakuti muye Aina Klistu aakula muli vyakwe Leza, mulinzile ukusambilila imilimo imwi. Cii cilamwazwa ukuomba ningo imilimo ino mwapeelwa umu cilongano, ukuomba ningo umulimo uulamwazwa ukuisakamala nu kusakamala ulupwa, nupya mulaipakizya ucuza usuma na yauze. Mwasambilila ukubelenga nu kulemba ningo. Baibo ikati umonsi angaya ni nsansa ndi cakuti akubelenga Izwi Lyakwe Leza nu kwelenganyapo. (Masa. 1:​1-3) Nga mukubelenga Baibo cila wanda, mulamanya vino Yeova akaelenganya nupya cilamwazwa ukulaomvya ivisinte lino mukupingula pa vintu. (Mapi. 1:​3, 4) Aina na ya nkazi yakalondekwa aina aakasambilizya ningo nupya angayapanda amano ukufuma muli Baibo. Ndi cakuti mukabelenga nu kulemba ningo, mulapekanya amalyasi ni vyasuko ivingakomelezya yauze. Nupya mulalemba ivyeo ivingamwazwa nu kwazwa yauze lino mukuisambilizya Baibo, vilamwazwa ukukomya utailo winu alino nu kukomelezya yauze. w23.12 26-27 ¶9-11

Nga mwatandika ukuvwa intete, mwaelenganya pali vino Yeova alacita uku nkoleelo lino Satana alafumiziwapo. Ukongano uwa citungu uwa mu 2014 walangilile isi akulanzyanya nu lupwa lwakwe pali vino amazwi aakazanwa pali 2 Timoti 3:​1-5 yangaya ndi cakuti yalandanga pali vino Paladaise wali nu kuya, lino watiile, “Manya ukuti umu nsi ipya ivintu vilazipa sana. Pano antu yalatemwa antu yauze, yalatemwa icumi, yalaya aicefye, yalatemwa Leza, yalauvwila avyazi yao, yalaataizya, yalaya acisinka, yaalaika mano uku ya mu lupwa lwao, yaalasunga ivipangano, yalalanda ivisuma lyonsi pali yauze, yaalaikanya, yalatemwa usuma, yalaya akutailwa, yalaya afuke, yalatemwa Leza ukucila ivya kuizanzya, yalaya ni miyele yakwe ukapepa; nupya antu yamusango uu ayano ulazanwa nayo.” Uzye mwatala mwalanzyanyapo na mu lupwa lwinu nanti yakapepa yauzo pali vino umi ulaya umu nsi ipya? w24.01 6 ¶13-14

Tukauvwa ningo sana ukumanya ukuti Yeova akazangila umu antu yakwe. Baibo ikati: “Yawe akazangila mu antu.” (Masa. 149:4) Nomba insita zimwi yamwi yakatwisika, nu kuyuzya ukuti ‘uzye Yeova akazangila muli nene?’ Aomvi yakwe Yeova aingi aliko lino ivyalumbulwa muli Baibo vyacitikanga nayo kwene kwali insita ino yelenganyanga wakwe vikwene. (1 Sam. 1:​6-10; Yobo 29:​2, 4; Masa. 51:11) Baibo ikalanda ukuti naswe ya antu swemuno tutamalilika tungaya ivyuza vyakwe Leza. Tunga cita uli vivyo? Tulinzile ukutaila Yesu Klistu alino nu kubatiziwa. (Yoa. 3:16) Nga twabatiziwa alino tukalanga antu yonsi ukuti twalapila uku membu nupya twalaya Yeova ukuti lyonsi tulacita ukulonda kwakwe. (Mili. 2:38; 3:19) Tukazanzya Yeova ndi cakuti twatandika ukulundulula ucuza witu na aliwe. Ndi cakuti twatwalilila ukuombesya ukwikalilila uku mulapo uno twalafile, Yeova alatwalilila ukuzangila mu sweswe nupya tulatwalilila ukuya ivyuza vyakwe.—Masa. 25:14. w24.03 26 ¶1-2

Tungakolanya asambi ndi cakuti tukutwalilila ukusimikila nanti cakuti aa mu uteeko yatunena ukuti tute. Tungalenga Yeova ukutwazwa ukuomba umulimo witu uwa kusimikila. Fwandi twapepa ukuti tuye asipe alino nu kuya na mano. Nupya mwalenga Yeova amwazwa ukuzizimizya intazi. Swe ingi tukakwata intazi wakwe ukulwalilila, kusakamikwa, kufwilwa aatemwikwa, intazi izya mu lupwa, kucuziwa nanti sile intazi zyuze. Nupya ivintu na vyuze wakwe ivikuko ni zya nkondo alino ni vintu vyuze, vyalenga ivintu ukutalilako sana. Mwanena Yeova vyonsi vino mukuyuvwa. Mwamunena vyonsi ivikumucitikila wakwe vino munganena cuza winu. Mwataila ukuti Yeova alamwazwa. (Masa. 37:​3, 5) Ukupepa lyonsi kulatwazwa ‘ukuzizimizya lino tuli na macuzi.’ (Loma 12:12) Yeova wamanya intazi zino yakapepa yakwe yakakwata nupya “akauvwa ukukuuta kwao.”—Masa. 37:​3, 5. w23.05 5-6 ¶12-15

Nga tukulonda ukupingula pa vintu ivicindame tulinzile ukumanya vino “ukulonda kwakwe Yeova kwaya” nupya tulinzile nu ukusininkizya ukuti vino twapingulapo vikuvwana nu kulonda kwakwe. (Efes. 5:17) Nga twamanya ningo visinte vya muli Baibo alino na vino tulinzile ukuviomvya tulalola ivintu wakwe vino Yeova akavilola. Nga tukulondela visinte vya muli Baibo tulapingula ningo pa vintu. “Mwipe,” kuli kuti umulwani witu Satana akalondesya sana ukuti twalonda ivintu ivya mu nsi ii ivingalenga twaya apamviwe icakuti twavilwa nu ukukwata insita yakuombela Yeova. (1 Yoa. 5:19) Umwina Klistu angatandika ukulonda sana impiya, masambililo ya papela, alino nu kucita ukulonda kwakwe uku cila ukucita ukulonda kwakwe Yeova. Ndi cakuti umuntu watandika ukucita vii ala akulangilila ukuti akaelenganya wa yantu amu nsi ii asiombela Yeova. Ukuya kwene ivintu vii vitiipa nomba asi ali vino tulinzile ukukolezya umu umi witu. w24.03 24 ¶16-17