Sepetemba

Leza wapeela Yesu amaka ya kufumyapo intazi zyonsi zino antu yakakwata. Lino Yesu wacitanga ivizungusyo walangilile ukuti angafumyapo intazi zyonsi zino swe yantu tutanga tufumyepo. Wakwata amaka ya kufumyapo vyonsi ivikalenga antu yacuula ukwikako sile ni vikafuma mu luyembu kuli kuti ukulwala ni mfwa. (Mate. 9:​1-6; Loma 5:​12, 18, 19) Ivizungusyo vino wacitanga vyalangililanga ukuti wakwata amaka ya kupozya “ndwala zya misango yonsi” kumwi sile nu kutuutulula afwe. (Mate. 4:23; Yoa. 11:​43, 44) Nupya wakwata na maka pa muza alino nu kucingilila antu ku mipasi iipe. (Mako 4:​37-39; Luka 8:2) Cikatukomelezya sana ukumanya ukuti Yeova wapeela umwanakwe amaka yonsi yaa! Tungasininkizya ukuti vyonsi ivisuma vino Leza watulaya vilafikiliziwa umu Wene wakwe. Ivizungusyo vino Yesu wacisile vikatulangilila ivintu ivingi vino Yesu alacita lino Uwene wa kwe Leza uwa kwi yulu ulateeka. w23.04 3 ¶5-7

Ndi cakuti mwaya umu cilongano muno ya kasimikila aingi, yakaimika makasa icakuti ni kasa linu iyafilwa ukulilola, limwi mungatandika ukulayuvwa ukuti mumaleka ukwimika ikasa. Nomba mutalinzile ukuta ukwimika ikasa. mwapekanya ivyasuko ivingi mungaya mukasuke pa kulongana. Lyene ndi cakuti yatamusonsile lino mwatanzika ukusambilila icipande, limwi mungasuka umu mapalaglafu aalondelapo. Lino mukupekanya isambililo lya Lupungu, mwalola vino palaglafu yonga na yonga ikulemenkana ni sambililo lyonsi. Nga mukucita vivyo, mulakwata ivisinka na vyuze vino mungalandapo umwi sambililo. Na vyuze vino mungacita, ukupekanya palaglafu umuli ivisinka ivitale ukulondolola. U mulandu ci uno mulinzile ukucitila vivyo? A pa mulandu wakuti limwi antu anono sile aangatemwa ukwasukapo. Nomba i vyani vino mungacita ndi cakuti mwezya inzila zyonsi zii nomba ala yasikumusonta pakuti mwasuke pa kulongana? Munganena katungulula iuzyo lino mukulonda mwize mwasuke lino ukulongana kutatala kwatandika. w23.04 21-22 ¶9-10

Jozefu waitemelwanga ukulondela vino Yeova wamunenanga, na cii calenzile ukuti aye iya musuma. Pa nsita imwi, Leza wamunenyile vino wali nu kusunga ulupwa lwakwe. Lyonsi lino wapokelela utunguluzi ukufuma kuli Leza, walondelanga papo kwene nanti cakuti icimutalila ukucita vivyo. (Mate. 1:20; 2:​13-15, 19-21) Ukulondela utungulula wakwe Leza, kwalenzile Jozefu ukucingilila Maliya, kumusakamala, alino nu kumupeela vino walondekwanga. Vino Jozefu wacitanga vyalenzile Maliya ukumutemwa nu kumucindika sana. Mwe ya iya, mungakolanya Jozefu lino mukulondela ukusunda ukwa muli Baibo na lino mukusakamala indupwa zinu. Ndi cakuti mukulondela ukusunda ukwa muli Baibo nanti cakuti cingalondekwa ukuti musenuke muli vimwi, mulalangilila ukuti mwatemwa ya winu nupya mulalenga icupo cinu ukukomelako. Nkazi uwa ku Vanuatu uwikala umu cupo pa myaka 20, watiile: “Ndi cakuti ya wane yakulondela utunguluzi wakwe Yeova, nkayacindika sana. Nkayuvwa umucingililwe nupya nkataila vino yakupingulapo.” w23.05 21 ¶5

Ayuda aaswilile uku Izlaeli izile iyaya “antu ya muzilo” kuli Leza. (Malan. 7:​6, NWT.) Cico citapiliulanga ukuti yayo asyazile uku Babiloni yatalondekwanga ukusenuka muli vimwi pakuti yazanzya Yeova. Ayuda aingi yavyalilwe umu Babiloni, nupya aingi yaelizye imikalile ni micitile iya Ina Babiloni. Lino papisile imyaka iingi, Neemiya wizile azunguka lino wamanyile ukuti ana aavyalilwe umu Izlaeli yataamanyile ululimi lwa ya Yuda. (Malan. 6:​6, 7; Neem. 13:​23, 24) Uzye ana yaa aatamanyile ululimi lwa Ciebele muno Izwi Lyakwe Leza lyalembiilwemo, yali nu kutemwa uli Yeova alino nu kulamupepa? (Ezila 10:​3, 44) Fwandi Ayuda yaa yalondekwanga sana ukusenuka nupya cali nu kuyangukila ukusenuka lino yali umu Izlaeli muno ukupepa kwa cumi kwaweziwanga panono panono.—Neem. 8:​8, 9. w23.05 15 ¶6-7

Kwene insita izingi nanti cakuti tukulondesya ukufikilizya uyo, kungaya vimwi ivingalenga tufiilwe ukufikilizya. Wakwe, ivintu ivikacita ukwaula ukwenekela vingalenga tufilwe ukufikilizya uyo uno twimika. (Kasa. 9:11) Tungakwata intazi izingalenga tutoovoke nu kuulilwa amaka. (Mapi. 24:10) Ukukanamalilika nako kungalenga tucite vimwi ivingalenga tufilwe ukufikilizya uyo. (Loma 7:23) Nanti sile limwi ukutoonta. (Mate. 26:43) I vyani ivingatwazwa ukucimvya ivingalenga tufilwe ukufikilizya uyo uno twimika? Mwaiusya ukuti nga kwaya vimwi ivyalenga cimutalile ukufikilizya uyo ale cisikupiliula ukuti imufilwa. Baibo ikalanda ukuti tungakwata intazi pa nsita izingi. Lelo ikatunena nu kuti tungezya na maka ukufikilizya uyo witu . Ndi cakuti mukutwalilila ukuombesya asi mulandu ni vya kupumvyanya, mulalangilila ukuti mukalondesya ukuzanzya Yeova. Yeova akauvwa ningo sana nga walola vino mukwezya na maka pakuti mufikilizye uyo uno mwimika. w23.05 30 ¶14-15

Upainiya ukaazwa acance ukumanya ivyakuomba ningo na antu apusane pusane. Nupya upainiya ukaazwa umuntu ukumanya ivyakusunga impiya ni vyakuziomvya ningo. (Filipi 4:​11-13) Inzila yonga ingamwazwa ukutandika umulimo wa nsita yonsi u kuomba upainiya wa nsita inono. Ukucita vii, kukaazwa umwi ukuipekanya ukwizaomba upainiya wa nsita yonsi. Upainiya wa nsita yonsi ungalenga mukwate isyuko lya kuomba imilimo na yuze umu mulimo wa nsita yonsi, wakwe ukuombela mu makuule alino na pa Betele. Aina yonsi yalinzile ukukwata uyo uwakufikapo ukuya ya eluda. Baibo ikalanda ukuti ndi cakuti umwi akulondesya umulimo uu “ala akulonda umulimo usuma.” (1 Tim. 3:1) Inkoleelo, umwina alinzile ukulinga ukuya muomvi aakatumikila. Aomvi aakatumikila yakaazwa ya eluda umu nzila izingi. Ya eluda na aomvi aakatumikila yakaicefya lino yakuombela aina na ya nkazi nupya yacincila umu mulimo wa kusimikila. w23.12 28 ¶14-16

Yosiya wali ni myaka 16 lino watandike ukulonda Yeova. Walondanga ukusambilila pali Yeova nu kucita ukulonda kwakwe. Lelo ivintu vitangupile uku mwene wii uwacance. Pa nsita iya antu yapepanga ya leza ya ufi, fwandi Yosiya walondekwanga ukuya umusipe pakuti angayazwa ukutandika ukupepa Yeova nupya. Nupya wakwanisye ukucita vivyo. Yosiya watandiike ukusisya ukupepa kwa ufi umu Ina Izlaeli ala atatala wakwata imyaka 20 (2 Mila. 34:​1, 2) Nanti cakuti mwemwe yacance, mungakolanya Yosiya ndi cakuti mukusambilila pali Yeova na pa miyele yakwe. Kucita vivyo kulalenga mwalondesya ukuipeela kuli aliwe. Uzye ukuipeela kulalenga umi winu ukuya uli? Lino Luke wabatiziwe ni myaka 14 watile, “Ukutandika ilelo, ukuombela Yeova ali cintu icimaya icicindamisye umu umi wane nupya namaombesyanga ukulamuzanzya.” (Mako 12:30) Ndi cakuti ali vino namwe mukulondesya ukucita, mulaya sana ni nsansa. w23.09 11 ¶12-13

Lino Paulo walembiile icilongano ca mu Tesalonika kalata, ala nu mwaka utatala wapita ukufuma pano capangiilwe. Cifwile aonsi aatungululanga umu cilongano cii yataamanyile ivingi nupya limwi yaluvyanyanga. Nanti ciye vivyo, yalondekwanga ukuyacindika. Vino ucuzi ukalamba ukuya ukupalama, tulinzile ukuya sana ni cuvwila kuli ya eluda aaya umu cilongano cino twayamo ukucila na vino cali mpiti. Limwi tutanga tukwate isyuko ilya kupokelela utunguluzi ukufuma uku maofesi yakalamba mu nsi yonsi nanti uku musambo; ali mulandu uno icicindamila ndakai ukuya nu kutemwa alino nu kucindika ya eluda yano twakwata umu cilongano. Asi mulandu ni vingacitika, lekini twatwalilila ukuya na mano, ukukanaika mano kuli vino yakaluvyanya, alino nu kutwalilila ukwika mano kuli vino Yeova akatungulula aonsi yaa aacisinka ukupitila muli Klistu. Wakwe vino icisote cikacingilila umutwe wa musilika, ali vino nu upaalilo ukacingilila melenganyo itu. Ndi cakuti tuli nu upaalilo ukome, tulamanya ukuti ivintu vyonsi ivya mu nsi i vya silesile. (Filipi 3:8) Upaalilo witu ungatwazwa ukuya ateekele alino nu kuya aiteyanye. w23.06 11-12 ¶11-12

Yayo aakakutika uku mwanaci umuwelewele yakalondekwa ukusoololapo ndi cakuti yamazumila ulwamo nanti foo. Kwaya umulandu ucindame ulinzile ukutulenga ukutaluka uku uzelele. Umwanaci iciwelewele walondololwa ukuti: “Amanzi akwiya aasuma.” (Mapi. 9:17) Uzye “amanzi akwiya” ali cani? Baibo ikakolanya ukupanga icupo ukwa yantu atwalane uku manzi aakalenga umwili ukuvwa ningo. (Mapi. 5:​15-18) Iya nu muci aatwalana ukulingana ni sunde yakwata insambu izya kupanga icupo. Nomba vii vyapusanako na “manzi aakwiya.” “Manzi aakwiya” yakalozya uku kucita uzelele. Aakacita uzelele yakacita umu umfisolo wakwe vino aapupu yakaiya usiku. Manzi aakwiya yangaloleka kwati aalyompe ndi cakuti aakucita uzelele yakwelenganya ukuti kusi aalamanya. Yakaibepa pa mulandu wakuti Yeova akalola vyonsi. Icintu icipisye icikafumamo umu kucita uzelele, Yeova akata ukutupaala nupya mutaya ‘icisuma’ icili consi icikafumamo.—1 Kol. 6:​9, 10. w23.06 22 ¶7-9

I vyani vino mungacita ndi cakuti mwazana ukuti musi kupepa amapepo akufuma pansi ya mwenzo, nupya musi kuipakizya umulimo wakwe vino mwaipakizyanga mpiti? Mutalinzile ukulalola kwati Yeova atayanamwe. Pa mulandu wakuti tutamalilika insita zimwi vino tukayuvwa vikasenuka. Ndi cakuti mwalola ukuti mwatandika ukutoovoka mwaelenganya pi lyasi lya mutumwa Paulo. Nanti icakuti Paulo wezyanga ukukolanya Yesu insita zimwi wayuvwanga ukuti atakwanisyanga ukucita vino walondanga ukucita. Paulo watwalilile ukumalilila umulimo asimulandu na vino wayuvwanga insita zimwi. Wakwe Paulo namwe kwene mutapingula pa vintu ukulingana na vino mukuyuvwa. Mwalondesya lyonsi ukucita ivisuma na lino citangwike ukucita vivyo. Ndi cakuti mwatwalilila ukucita ivisuma mulasenuka muli vino mukayuvwa.—1 Kol. 9:16. w24.03 11-12 ¶12-13

Naswe kwene tungalanga ukuti twatemwa aina na ya nkazi ndi cakuti tukwizizya pamwi nayo. (2 Kol. 6:​11-13) Sweingi twaya umu vilongano umwaya aina na ya nkazi aapusana inkulilo nupya aakwata imiyele ipusanepusane. Tungalanga ukuti twatemwa aina na ya nkazi yonsi ndi cakuti tukwika mano uku miyele isuma ino yakwata. Tukalanga ukuti twatemwa antu yauze nga tukuyalola wakwe vino Yeova akayalola. Umu ucuzi ukalamba tulalondekwa ukulaya sana nu kutemwa. Uzye Yeova alatucingilila umu ucuzi ukalamba? Yeova wanenyile antu yakwe lino Aina Babiloni yayazanzile ukuti: “Mwe antu yane aleni ingilini mu ng’anda inu, muyale ni visasa. Mufisame apa kasita kanono cisuke icipyu cakwe Leza cisile.” (Eza. 26:20) Limwi naswe kwene tulalondekwa ukulondela ukucelula kuu umu ucuzi ukalamba. w23.07 6-7 ¶14-16

Mwacita ivintu ivingalenga yauze yalola ukuti musiumilila sile pali vino mukwelenganya. Mungayuzya mweineco ukuti: ‘Uzye antu yakandola ukuti nkaika mano kuli yauze, nsizumila ivili vyonsi nu kuti nsiumilila sile pali vino nkwelenganya? Nanti uzye antu yakandola ukuti natala, nkayuvwa, nanti kuti nakwata icilumba? Nanti uzye nkauvwa kuli vino yauze yakwelenganya ndi cakuti calondekwa ukucita vivyo?’ Nga tukulangilila ukuti tusiumilila pali vino tukwelenganya ala tukukolanya Yeova na Yesu. Tutalinzile sile ukumilila pali vino tukwelenganya na lino ivintu vyasenuka. Ivintu nga vyasenuka cingalenga tukwate intazi zino tutelenganyanga ukuti tungakwata. Limwi tungalwala icipisye ukwaula ukwenekela. Nanti limwi ukusenuka kwa mitengo nanti kusenuka kwa uteeko kungalenga ivintu vitutalile sana. (Kasa. 9:11) Nupya limwi cingatutalila ndi cakuti iuvi lyakwe Yeova lyatunena ukuomba umulimo uze umwi iuvi. Tungacimvya intazi zizyo ndi cakuti tukucita ivintu vii 4 kuli kuti: (1) kuzumila ukuti vintu ivisenuka, (2) kwelenganya pa vya ku nkoleelo, (3) kwika mano pa visuma, na (4) nga tukwazwako yauze. w23.07 21-22 ¶7-8

Kasesema Danieli wali u mwance lino yamusenzile umuuzya uku Babiloni nu kumufumya uku mpanga iya kumwao. Nanti cakuti Danieli wali u mwance, vino wacitanga vyalenzile ukuti aakalamba aku Babiloni yamutemwe. Yailolile ukuti Danieli walolekanga ningo nu kuti wafumile uku lupwa ulucindame. (1 Sam. 16:7) Pa mulandu na vii, Aina Babiloni yapingwilepo ukumusambilizya pakuti aombela ukwi sano. (Dan. 1:​3, 4, 6) Yeova watemilwe Danieli pa mulandu na vino wasoolwilepo ukumuombela. Alino, Danieli afwile wali ni myaka umupiipi na 20 lino Yeova wamulumbwilile pamwi na aonsi yaili kuli kuti Nowa na Yobo, yano yaombisye pa myaka iingi pakuti yaye na ucuza usuma na Leza. (Utan. 5:32; 6:​9, 10; Yobo 42:​16, 17; Ezekelo 14:14.) Nupya Yeova watwalilile ukutemwa Danieli umu umi wakwe onsi.—Dan. 10:​11, 19. w23.08 2 ¶1-2

Ndi cakuti mukulonda ukukala ing’anda, limwi mungika sana mano uku ng’anda iyo lino mutatala mwakala.Vikwene ali vino tungacita lino tukubelenga nu kusambilila Baibo. Ndi cakuti mukubelengamo zuwa zuwa, mungasambilila sile “visambilizyo vya kutandikilako ivya mazwi yakwe Leza.” (Aeb. 5:12) Lelo wakwe vino mungacita pa kukala ing’anda, mulinzile ukwingila “umukasi” pakuti muvwikisye ivyaya muli Baibo. Inzila isuma iya kusambililamo Baibo u kulola vino ivyeo ivyayamo vikauvwana. Mwaombesya ukumanya vino mwazumilamo nu mulandu uno mwazumilila ivyaya muli Baibo. Pakuti tuvwikisye ningo ivyaya umwi Izwi Lyakwe Leza, tulinzile ukuisambilizyapo sana. Umutumwa Paulo wakomeliizye Aina Klistu ukuti yalinzile ukulaisambilizya sana Izwi Lyakwe Leza pakuti yamanye “vino icumi casalala, ukutalimpa, ukusanzama, nu kuzika.” Nga yacita vivyo yali nu kuzyansya nu kulimba imisisi umu utailo. (Efes. 3:​14-19) Naswe kwene ali vino tulinzile ukucita. w23.10 18 ¶1-3

Muli Baibo mwaya malyasi na yauze aingi aakalanda pa yantu ateekile. Uzye citanga ciye ningo ukuisambilizya pa yantu yaa? Wakwe, nanti cakuti Devedi yamupasile ukuya umwene ala acili umwance, walinzile ukuloleela pa myaka ingi pakuti aize aye umwene. Simyoni na Ana yapepanga Yeova na ucisinka lino yaloleelanga Mesiya uwalavilwe. (Luka 2:​25, 36-38) Lino mukuisambilizya pa malyasi yaa, mwalonda amasuko uku mauzyo alondelelapo: I cani icazwile umuntu wii ukuya umutekeele? I visuma ci ivyacitike pa mulandu na vino wali umuteekele? Uzye ningamukolanya uli? Mungasambiliilako nu ku yantu ataali atekeele. (1 Sam. 13:​8-14) Mungayuzya muti: ‘I vyani ivyalenzile ukuti yataya ateekele? Iintazi cii zino yakweti pa mulandu nu kukanaya ateekele?’ w23.08 25 ¶15

Mutumwa Petulo wali na ucisinka; atalesile icili consi cimulenge ukuta ukulondela Yesu. Petulo walangilile ukuti wali na ucisinka pa nsita imwi lino Yesu walanzile vimwi vino asambi yatuvwikisye. (Yoa. 6:68)Ukwaula ukuti yuvwikisye vino Yesu walandangapo, aingi yatile ukumulondela. Lelo Petulo wene atatiile. Wamanyile ukuti Yesu sile u wakweti “mazwi ya umi wa pe.” Yesu wamanyile ukuti Petulo na atumwa yauze yali nu kumusya. Nanti ciye vivyo, Yesu wamanyile ukuti Petulo wali nu kuwela nu kwatwalilila ukuya uwa cisinka. (Luka 22:​31, 32) Yesu wamanyile ukuti “umwenzo wene ukulonda nomba umwili iutonta.” (Mako 14:38) Fwandi na pa cisila lino Petulo wakanyile Yesu, Yesu wene atakanyile Petulo. Pa cisila cakutuutululwa, Yesu waile alolekela kuli Petulo ala Petulo ali wenga. (Mako 16:7; Luka 24:34; 1 Kol. 15:5) Elenganyini pali vino Petulo wakomeleziwe nanti cakuti watoovwike pa mulandu na vino wacisile. w23.09 22 ¶9-10

Leza akaelela nanti ukuvimba pa membu zyakwe yayo akamutaila. (Masa. 32:​1, 2) Akayelela nupya asitwalilila ukwiusya vino yaluvinye. Akalola antu yaa ukuti alungami pa mulandu nu utailo wao.Nanti icakuti Abulahamu, Davidi alino na yakapepa yakwe Leza yauze acumi yatali amalilike, Leza wayamile ukuti yali alungami. Nomba pa mulandu wakuti yakweti utailo, Leza wayaweni ukuti yali akaele nga ukuyalinganya uku yantu aatamupepanga. (Efes. 2:12) Wakwe vino umutumwa Paulo walanzile muli kalata wakwe, utailo uukalenga umuntu aye cuza wakwe Leza. Vikwene avino cali kuli Abulahamu na Davidi, nupya avino caya na kuli sweswe. w23.12 3 ¶6-7

Ndakai Aina Klistu yonsi yakwata isyuko ilya kupeela malambo kuli Yeova kupitila umu kuomvya insita yao, amaka, na vino yakwata ku kutungilila Uwene Wakwe Leza. Tungalanga ukuti tukataizya pi syuko lino twakwata ilya kupepa Yeova kupitila umu kumupeela malambo asuma apapezile amaka itu. Umutumwa Paulo walemvile ivintu vimwi vino tulinzile ukulacita lyonsi lino tukupepa Yeova. (Aeb. 10:​22-25) Pa vintu vii paya ukulapepa kuli Yeova, kusimikila, kulazanwa uku kulongana, alino nu kulakomelezyanya “sana sana lino [tukulola] uwanda wakwe Leza ukupalama.” Malaika wakwe Yeova walangilile umulandu uno cacindamila ukupepa lino walanzile imiku iili ukuti: “Pepa Leza!” (Kuso. 19:10; 22:9) Lekini tutwalilile ukulaiusya vino twasambilila api tempele lyakwe Yeova ilya unkolanya nupya tutwalilile ukulataizya api syuko lino twakwata ilya kumupepa. w23.10 29 ¶17-18

Swensi kwene tukalonda ‘ukutwalilila ukutemwana.’ Nomba cacindama ukwiusya vino Yesu watucelwile ukuti “ukutemwa kwa yantu aingi kulacepa.” (Mate. 24:12) Yesu atalandanga ukuti asambi yakwe aingi yali nu kuta ukutemwana. Lelo tulinzile ukucenjele pakuti tutaleka vino amu nsi aataya nu kutemwa yakacita vitulenge ukuta ukutemwa aina itu. Lino tukwelenganya pali vii, lekini twasuke iuzyo lii ilicindame: I vyani ivingatwazwa ukumanya ndi cakuti twatemwa sana aina itu na ya nkazi? I nzila yonga ino tungamanyilamo ndi cakuti twatemwa sana aina itu na ya nkazi, u kulola vino tukacita nga vimwi vyacitika. (2 Kol. 8:8) Conga icingatwazwa ukucita vivyo aeci cino umutumwa Petulo walanzile, watile: “Ni cikalamba pali vyonsi i cakuti, mwatemwana sana, pano ukutemwa kukavimba pa membu izingi.” (1 Pet. 4:8) Fwandi vino tukacita lino aina itu yaluvyanya nanti yacita vimwi ivya kutusosya, vingatwazwa ukumanya ndi cakuti twayatemwa sana nanti foo. w23.11 10-11 ¶12-13

Tutanga tulondele isunde lyakwe Yesu ilya kutemwana ndi cakuti tukutemwa yamwi umu cilongano yamwi foo. Kwene, limwi tungayuvwa ukupalamisya kuli yamwi, wakwe vino cali kuli Yesu. (Yoa. 13:23; 20:2) Lelo umutumwa Petulo watwiwisyeko ukuti ‘twatemwa aina yonsi’ kuli kuti ukuyatemwa wakwe vino twatemwana umu lupwa. (1 Pet. 2:17) Petulo watunenyile ukuti tulinzile “ukutemwana sana nu mwenzo onsi.” (1 Pet. 1:22) Paa Petulo walandanga ukuti tulinzile ukutemwana sana na lino icitala ukucita vivyo. Wakwe, nga ndi cakuti umwina watusosya umu nzila imwi? Pa kutandika limwi tungalonda ukuswilizya uyi pa uyi ukucila ukulanga ukutemwa. Lelo Petulo wasambilile kuli Yesu ukuti ukucita vii kusizanzya Leza. (Yoa. 18:​10, 11) Petulo walemvile ukuti: “Mutawezezya uyi pa uyi nanti intusi pa ntusi. Lelo mwapaala aakamucitila iviipe.” (1 Pet. 3:9) Mwaleka ukutemwa kwamulenga ukulanga icikuku. w23.09 28-29 ¶9-11

Tukazunguka sana ukulola vino umwana akakula zuwa. Cikaloleka kwati ana yakakula zuwa sana ukwaula ukucitapo ni vili vyonsi. Nomba ukukula muli vyakwe Leza kwene kukalondekwa ukuombesya. (1 Kol. 13:11; Aeb. 6:1) Pakuti tukwanisye ukucita vivyo, tulinzile ukukwata ucuza ukome na Yeova. Nupya tukalondekwa umupasi wa muzilo pakuti tuye ni miyele ikazanzya Leza, kumanya imilimo iingatwazwa umu umi, alino nu kuipekanyizizya uku milimo ino tungakwata uku nkoleelo. (Mapi. 1:5) Yeova wapanzile antu, umonsi nu mwanaci. (Utan. 1:27) Vino umonsi nu mwanaci yaumbwa vyapusana, lelo yapusana nu mu vintu na vyuze. Wakwe, lino Yeova waumbile umonsi nu mwanaci wayapeezile ni milimo ino yaali nu kulaomba, fwandi yakalondekwa ukuya ni miyele alino nu kusambilila ivintu ivingayazwa ukulaomba ningo imilimo ino yapeelwa.—Utan. 2:18. w23.12 18 ¶1-2

Uzye Yesu walondanga antu yaomvya izina lyakwe isi? Ee. Intunguluzi zimwi izya mapepo zyalolanga ukuti ukulumbula izina lyakwe Leza umusaalula nomba Yesu atalesile ivintu vii ivitalemvilwe umu malembo ukumulenga ukukana cindika izina lyakwe Isi. Elenganyini vimwi ivyacitike lino Yesu wafumizye iciwa umu monsi umwi umu mpanga ya Gelaza. Antu yuvwile intete nupya yapaapasile Yesu ukuti afume umu mpanga ya Gelaza. (Mako. 5:​16, 17) Nomba Yesu walondanga izina lyakwe Leza ukumanyikwa. Fwandi wanenyile umonsi uno wapozizye ukuti anena antu pali vino Yeova wa mucitile. (Mako 5:19) Vikwene avino akalonda na ndakai ukuti izina lyakwe leza limanyikwe umu nsi yonsi. (Mat. 24:14; 28:​19, 20) Ngatukuleenga izina lyakwe Leza ukumanyikwa tukazanzya Umwene witu Yesu. w24.02 10 ¶10

Isyuko sana ukuya mwi uvi lyakwe Yeova umu manda ya akusyalikizya atale. Ivintu vikuya vikwipilako sile umu nsi ii, nomba Yeova watupeela aina na ya nkazi akutwazwa. (Masa. 133:1) Akatwazwa ukutwalilila ukuya alemane. (Efes. 5:33–6:1) Akatupeela amano akutwazwa ukucimvya intazi alino nu kutwalilila ukuya ni nsansa. Tulinzile ukuombesya pakuti tutwalilile ukuombela Yeova na ucisinka. U mulandu cii? Pano insita zimwi yamwi yangalanda nanti ukucita ivingatusosya. Insita zimwi nazyo tungatoovoka pa mulandu na vino tukaluvyanya sana sana ndi cakuti tukuswilizyapo ukucita ivili vimwi. Tulinzile ukutwalilila ukuzizimizya lino tukuombela Yeova (1) Lino umwina nanti nkazi watuluvyanya, (2) Lino yano twatwalana nayo yacita vino tusikwenekela na (3) Lino twatoovoka pa mulandu na vino tukaluvyanya. w24.03 14 ¶1-2

Insita izingi mulauvwa malyasi akalanda pa ina na ya nkazi alundulula imiombele yao mu mulimo wakwe Leza. Yamwi yasoololapo ukuya ukwi Sukulu Lyakwe ya Kakosoola ya Wene nanti ukuya ukukalondekwa yakasimikila. Ndi cakuti mungakwanisya cingazipa ukwimika uyo wa musango uu. Antu yakwe Yeova yakalondesya sana ukulundulula imiombele yao umu mulimo wakwe Yeova. (Mili. 16:9) Nga ndi cakuti pa nsita ii mutanga mukwanisye ukucita vivyo? Nga vino cili, mutaelenganya ukuti akakwanisya ukuomba yacindama ukumucila. Pano icacindama uku Umwina Klistu ukutwalilila ukuzizimizya. (Mate. 10:22) Mutailila ukuti mukalenga Yeova ukuzanga nga mukuomba ukulingana na papezile amaka inu. Ukucita vivyo ukungalenga mutwalilile ukulondela Yesu pa cisila ca kubatiziwa.—Masa. 26:1. w24.03 10 ¶11

Tata witu uwa kwi yulu akatwelela ndi cakuti twalapila. (Masa. 86:5) Fwandi ndi cakuti twalapila tulasininkizya ukuti vino Yeova walanda ivya cumi nupya alatwelela nga twaluvyanya. Mwaiusya ukuti Yeova akatuvwikisya. Nupya asilonda twacita vino tutanga tukwanisye. Akatutaizya ndi cakuti tukuomba ukulingana na papezile maka itu. Nupya mwaelenganya pa malyasi amu Baibo akalanda pa yantu aombelanga Yeova nu mwenzo wao onsi. Elenganyini pa mutumwa Paulo. Waombelanga Yeova nu mwenzo onsi nupya wayanga umu ncende zyakutali nupya wapanzile icilongano ivingi. Nomba lino ivintu vyasenwike umu umi wakwe watile ukuomba wakwe vino waombanga pa kutandika, uzye Yeova watile ukuzangila muli aliwe? Awe. Watwalilile ukuomba ukulingana na pano angapezya nupya Yeova wamupaazile. (Mili. 28:​30, 31) Wakwe Paulo naswe kwene insita zimwi tungafilwa ukuombela Yeova ukulingana na vino tukulonda. Nomba icacindama umulandu uno tukuombela. w24.03 27 ¶7, 9

Yesu walangilile asambi yakwe ivya kupepa ukupitila umu mapepo yano wapepanga kuli Yeova. Lyonsi lino waombanga umulimo wakwe, wapapenga insita izingi. Pa mulandu wakuti Yesu wazanwanga sana na antu aingi nupya wayanga umupamviwe, wapatulangako insita iya kupepa. (Mako 6:​31, 45, 46) Wazyukanga katondotondo pakuti apepe. Pa nsita imwi, wapefile usiku onsi lino atatala wapingula pa cintu cimwi icicindame cino walondanga ukucita. (Luka 6:​12, 13) Nupya Yesu wapefile imiku iingi usiku lino atatala wafwa, pano wisile sana mano pa kumalila umulimo uwali ucindame nupya ukome. (Mate. 26:​39, 42) Vino Yesu wacitanga vikatusambilizya ukuti tulinzile ukulapatulako insita iya kupepa nanti cakuti itupamviwa. Tungalanga ukuti tukakolanya vino wacitanga ndi cakuti tukupatulako insita iya kupepa, wakwe tungapepa akatondo, kasanya nanti limwi manguzi. Ukucita vii kulalangilila ukuti tukataizya pa wila uiyele uwa kupepa uno Yeova watupeela. w23.05 3 ¶4-5

Lolini vino amazwi aali umwi lembo lilelo yakalangilila vino Yeova watemwa apakwe, amazwi akuti, “ukutemwa kwakwe Leza kwazula umu myenzo” yao. Ibuku limwi ilyakulondelezyamo ivyeo lyakolanya ukutemwa kwakwe Leza uku luzi. Cilangililo cii cikulangilila vino Yeova watemwa sana apakwe. Nupya apakwe yamanya ukuti ‘yatemwikwa na Leza.’ (Yuda 1) Umutumwa Yoani walondolwile vino apakwe yonsi yakayuvwa lino watiile: “Lolini vino Tata watutemwa, tukaamwa ukuti sweswe yana yakwe Leza.” (1 Yoa. 3:1) Uzye Yeova watemwa sile apakwe? Awe foo, Yeova watutemwa swensi kwene. I vyani ivikalangilila ukuti Yeova wamitemwa? I lambo lino wapeezile, nupya kutaya umuntu ali wensi aangalanga ukutemwa wakwe kuu.—Yoa. 3:16; Loma 5:8. w24.01 28 ¶9-10

Cikomo ici umwi lembo lya wanda wilelo cikalangilila inzila ino Devedi wacimvizyemo intete. Nanti icakuti umi wakwe wali umu uzanzo, welengayanga pali vino Yeova wali nu kumucitila. Devedi wamanyile ukuti Yeova wali nu kumwazwa pa nsita ilinge. Alino, Yeova walanzile pali Devedi ukuti wali nu kuya umwene wa ina Izlaeli. (1 Sam. 16:​1, 13) Devedi walolanga vyonsi vino Yeova wamulavile ukuti ivifikiliziwa. I vyani vino Yeova walaya ukuti avino alamucitila? Tusienekela ukuti alatucingilila uku ntazi zyonsi. Nomba, asi mulandu ni ntazi zino tungakwata ndakai, Yeova alazifumyapo mu nsi ipya ikwiza. (Eza. 25:​7-9) Kaumba witu wakwata amaka aakutuutulula afwe, ukufumyapo indwala zyonsi, alino nu kufumyapo aakatucuzya.—1 Yoa. 4:4. w24.01 6 ¶12-13

Mwaelenganya pa mulandu uno mwaipeelile kuli Yeova nu kubatiziwa. Mwasoolwile ukuipeela kuli Yeova pano mwalondanga ukuya uku lusansa lwakwe. Elenganyini pali vino vyalenzile musininkizye ukuti imuzana icumi. Lino mwasambilile icumi pali Yeova, mwamutemilwe nupya mwatandike ukumucindika pano a Tata winu uwa kwi yulu. Mwizile imuya nu utailo nupya calenzile ukuti mulapile. Vino mwasambilile vyalenzile mute ukucita vino Yeova wapata nu kutandika ukucita ukulonda kwakwe. Muvwile ningo sana lino mwilwike ukuti Leza wamweleela. (Masa. 32:​1, 2) Mwatandike ukuzanwa umu kulongana nupya mwanenangako na yauze pa visuma vino mwasambilile. Vino ndakai mwemwe Aina Klistu aipeela nu kubatiziwa, mukapita umu museo uwa ku umi, nupya mukalondesya ukutwalilila ukupitamo. (Mate. 7:​13, 14) Fwandi mwalondesya ukulapepa Yeova nu kuya antu aasitenta umu kuvwila masunde yakwe. w23.07 17 ¶14; 19 ¶19

Ukwiusya ukuti mwaipeela kuli Yeova, kulamwazwa ukucimvya mezyo. Wakwe, uzye mungatandika ukulanga icintemwa kuli wino mutatwalana nawe? Ukwaula nu kutwisika mutanga mucite vivyo. Pano ale mwalaya Yeova ukuti mulatwalilila ukuya acisinka. Ndi cakuti mwacimvya imiyele iipe lino patatala palengela, mutalaacula ukuleka imiyele iyo iipe ukunkoleelo. Mulaataluuka uku “nzila ya antu aipe.” (Mapi. 4:​14, 15) Ukwelenganya pali vino Yesu wacitanga kungamwazwa pano lyonsi walondanga ukuzanzya isi. Wakwe Yesu, mutaleka icili consi calenga mwavilwa ukuzanzya Leza pano mwaipeela kuli aliwe. (Mate. 4:10; Yoa. 8:29) Vino mukacita ndi cakuti mwakwata intazi nanti mweziwa ukucita iviipe, vingalanga ndi cakuti mukalondesya ‘ukutwalilila ukulondela’ Yesu. Nupya mungasininkizya ukuti Yeova alamwazwa ukulondela Yesu. w24.03 9-10 ¶8-10