Mauzyo Yano Aakawelenga Yakauzya

Uzye ivyani vino aakasambilila pa vintu vya mpiti yazana ivikaalanga ukuti umusumba wa Yeliko wononyilwe umu nsita inono sile?

Ilembelo lyakwe Yoswa 6:10-15, 20 likalanda ukuti asilika ya ina Izlaeli yazingulukanga umusumba wa Yeliko cila wanda umuku onga pa manda 6. Uwanda wakwe 7 yazingulwike umusumba imiku 7. Lyene Yeova walenzile ukuti iviumba ivya Yeliko vipone, nandi icakuti vyali vikome alino lyene aina Izlaeli iyazanza umusumba. Uzye yano yakasambilila pa vintu vya mpiti yazana ukuti umusumba wa Yeliko wazingulwikwe pa manda anono sile wakwe vino Baibo ikalanda?

Umu nsita ya ina Izlaeli, ndi asilika yazinguluka umusumba uli onsi ala yasya yauzanze. Ndi cakuti yazinguluka umusumba pa manda aingi, ala antu yamalya ivyakulya ivingi pali vino yasunzile. Ndi cakuti asilika yazanza umusumba, yatoolanga ivintu vyonsi vino yakulonda umu musumba uwo, ukwikako sile ni vyakulya vyonsi vino vyasilemo. Ali mulandu kwene uno aakasambilila pa vintu vya mpiti yazana ivyakulya ivinono sile, nanti ukwaula ukuvizana umu vitalang’anda ivya misumba iya mu Palestine ino yazanzilwe umu musango uli onga kwene wa musumba wa Yeliko. Lelo umu vitalang’anda vya musumba wa Yeliko mwene mwazanyilwe ivyakulya. Ibuku limwi (Biblical Archaeology Review) likalanda ukuti: “Yazanyile sana ivyakulya umu musumba wa Yeliko ni viya vya kumata.” Nupya ibuku lii lyalanzile nu kuti: “Umu musumba wa Yeliko u mwazanyilwe ivyakulya ivingi sana ukuluta uku misumba yuze ino yazanzilwe.”

Baibo ikalanda ukuti Aina Izlaeli yatatozile ivyakulya ivili vyonsi umu musumba wa Yeliko pano Yeova wayakanyizye ukucita vivyo. (Yoswa 6:17, 18) Baibo nupya ikalanda ukuti Aina Izlaeli yazanzile umusumba wa Yeliko ala alino aikazi ya mu musumba yamala sile ukuzombola, fwandi pa nsita iyo kwali ivyakulya ivingi sana. (Yoswa 3:15-17; 5:10) Fwandi pa mulandu wakuti umu musumba mwali ivyakulya ivingi apa cisila ca kuzanza umusumba, cikalangilila ukuti aina Izlaeli yazingulwike umusumba wa Yeliko apa manda anono, wakwe vino Baibo ikalanda