“Kapeela wa Luse Akapolelelwa”

UKUFUMA sile na mpiti ukupeela impolelwa kwacindama sana umu kupepa kwa cumi. Aina Izlaeli yapeelanga impolelwa zya nyama, nupya Aina Klistu yamanyikilwa sana ku ‘kupeela impolelwa’ zya kulumbanya Leza. Lelo kwaya impolelwa zyuze izikazanzya Leza. (Ayeb. 13:15, 16) Impolelwa zizyo zikalenga tuye ni nsansa nu kupolelelwa, wakwe vino tumalola apisika.

Hana, umuomvi wakwe Leza uwa utailo uwaliko mpiti, walondesyanga ukukwata umwana umonsi nomba wali ing’umba. Mwi pepo lino wapefile kuli Yeova walavile ukuti ngi cakuti ningakwata umwana umonsi, ‘ala ndamupeela sile kunuli we Yeova pa manda yonsi yano alikala pano nsi.’ (1 Sam. 1:10, 11) Pataalengile Hana wakweti inda, nupya wizile akwata umwana umonsi amutemela ni zina lyakuti Samueli. Lino Samueli walumwike sile, Hana wamutwazile ukwi tenti lya kupepelamo ukulingana na vivi kwene vino walavile. Yeova wapoleliile Hana pa kuya nu mwenzo wakuitemelwa uwa kupeela. Wapeezilwe isyuko lyakukwata ana na yauze 5, nupya Samueli wizile aya kasema nupya kalemba wakwe Baibo.—1 Sam. 2:21.

Wakwe vino cali kuli Hana na Samueli, Aina Klistu aingi yakwata isyuko lya kuipeela pakuti yaombela Kaumba wao. Yesu walavile ukuti ndi twaipeelesya umu kupepa Yeova, tulapokelela icilambu.—Mako 10:28-30.

Mu nsita ya Ina Klistu akutandikilapo, umwanaci uwizina lyakuti Dokasi wamanyikilwe sana ku “kuomba milimo isuma nu kukumbusuka apina” kuli kuti waipeelesyanga ukwazwa antu yauze. Nomba wizile “alwala afwa,” na ci calenzile amu cilongano yonsi yaye nu ulanda. Nomba lino asambi yuvwile ukuti Petulo ali mu ncende kwene iya, yamupapatiile ukuti aize. Elenganyini vino antu yuvwile lino Petulo wizile atutulula Dokasi kufuma ku afwe, ali kututulula kwakutandikilako ukwa yatumwa. (Mili. 9:36-41) Yeova atilila ukapekape wakwe Dokasi. (Ayeb. 6:10) Ilyasi lyakwe lyalembwa muli Baibo pakuti twasambililako nu kumukolanya.

Umutumwa Paulo nawe tungamukolanya, wapeelanga insita yakwe kuli yauze. Lino Paulo walembelanga aina a ku Kolinto kalata, walemvile ati: “Acino nemo ndapela ni nsansa vyonsi vino nakwata pamwi nu umi wane.” (2 Kol. 12:15) Paulo wasambilile kuli vino vyamucitikile ukuti ukupeela umi wako pa mulandu wa yantu yauze kusilenga sile ukuti umuntu aye ni nsansa lelo kwacindama sana kukalenga Yeova atupaale nu kututemwa.—Mili. 20:24, 35.

Fwandi Yeova akatemwa sana ndi cakuti walola ukuti tukuomvya insita itu na maka ukwazwilizya umulimo wa kusimikila nu kwazwa Aina Klistu yauze. Nomba uzye kwaya inzila na zyuze zino tungatungililamo umulimo wa kusimikila pa Wene? Ee. Ukulunda pa kutemwa, tungacindika Leza na lino tukuitemelwako ukusangwilako imisangulo. Imisangulo ii ikaomviwa umu kwazwilizyako umulimo wa kusimikila umu nsi yonsi, ukwikako sile nu kwazwilizya ya misyonali na yauze aya umu mulimo wa nsita yonsi uuiyele. Nupya ikaomba nu mu kwazwilizyako umulimo wa kusenula impapulo na mavidyo, ukwazwilizyako aina lino yaponelwa nu uzanzo, nu mulimo wa kukuula Mang’anda ya Wene. Fwandi tungasininkizya ukuti “kapeela wa luse akapolelelwa.” Nupya ndi twapeela kuli Yeova ivintu ivisuma vino twakwata, tukamucindika sana.—Mapi. 3:9; 22:9.

Vino Yamwi Yakasangwilako Uku Mulimo Wa Mu Nsi Yonsi

Wakwe vino cali umu nsita ya mutumwa Paulo, aingi ndakai ‘yakapatulako impiya zimwi pa mbali’ izyakusangwilako uku mulimo wa mu nsi yonsi nu kwika umu kambokosi akaaya umu cilongano cao pano yalemba ukuti “Umulimo wa mu Nsi Yonsi.” (1 Kol. 16:2) Cila mwezi, ivilongano vikatuma umusangulo uu uku maofesi yakwe ya Nte Yakwe Yeova aaya umu mpanga yao. Mungatuma nu musangulo uu uku kaungwe akalembesiwa umwi sunde kano ya Nte Yakwe Yeova yakaomvya umu mpanga ino mwikalako. Pakuti mumanye izina lya kaungwe kako tumilini ukwi ofesi lyakwe ya Nte yakwe Yeova ilyayela uku mwinu. Mungazana adelesi wakutumilako apa www.jw.org. Ukulingana na kuno mwikala, mungaomvya imisango ya misangulo ii ili apisika:

IMISANGULO IYAULA MASUNDE

Mungasangwilako ukuomvya kadi ya ku Banki. Umu mpanga zimwi yakasangwilako ukuomvya webusaiti iya jw.org nanti webusaiti yuze sile.
Mungasangwilako impiya, iviyembelo, nanti ivili vyonsi vino mwakwata. Mulinzile ukutumila pamwi na kalata wa kulondolola vino mwasangwilako ukuti yangaviomvya muno yakulondela.

IMISANGULO IYAKWATA IVYAKULONDELA

I misangulo ya mpiya ino mungalondolola ukuti yangamuwezezya nga mwalonda ukuziomvya uku nkoleelo.
Mulinzile ukutumila pamwi na kalata muno imulondolola ivyakulondela pa musangulo uno mwatuma.

MISANGULO YA KUITEMELWA

Kwaya inzila na zyuze zino mungaomvya pa kusangwilako pakuti mutungilile umulimo wa mu nsi yonsi. Inzila zizyo izilembwa apisika. Asi mulandu ni nzila ino mukulonda muomvye, lino mutatala mwasangwilako mulinzile ukuzya ukwi ofesi ilikaangalila umulimo wa kusimikila uku mpanga kuno mwayela nu kuzya vino mungacita pa kuti musangwileko. Pa mulandu wakuti ivikalondekwa na masunde ya misonko vyapusana ukulingana ni mpanga kuno mwayela, fwandi icicindama ukuzya umuntu umwi uwamanya ningo ivikalondekwa umu mpanga iyo lino mutatala mwasoolola inzila ya kuomvya.

Impiya izikasungwa na zino zikapokwa ndi cakuti umuntu wata ukuomba incito umu uteeko: Umuntu angasangwilako nu kulemba ukuti akaungwe akaalembesiwa umwi sunde kakwe ya Nte Yakwe Yeova kakapoke impiya zino walembesya uku kampani ukuti yakamupeele ndi vimwi vyamucitikila nanti ndi cakuti walembesya ukuti yakamupeele impiya ndi wafika pa musinku wa kuta incito ukulingana ni sunde lya uteeko.

Impiya izikasungilwa uku banki: Mungalembesya uku banki ukuti impiya zino mwasunga izya kwiza omvya uku nkoleelo zikapeelwe uku kaungwe kakwe ya Nte Yakwe Yeova akaalembesiwa umwi sunde ndi mwafwa, ukulingana ni vikalondekwa uku ncende ino mwayelako.

Cikuulwa nanti ncende: Icikuulwa nanti ncende vino mukulonda ukusangwilako, mungasangwilako ukuomvya akaungwe kakwe ya Nte Yakwe Yeova akaalembesiwa umwi sunde, nupya ndi cakuti mucili mukwikala umu cikuulwa cico nanti pa ncende iiyo, mungatantika ukuti mutwalilile ukwikala kufikila lino mwafwa.

Ivyuma ivikasyala umwi ndi wafwa: Mungalembela limwi ukuti ivyuma vinu ivilasyala ndi mwafwa vikapeelwe uku kaungwe kakwe ya Nte Yakwe Yeova akaalembesiwa umwi sunde. Inzila ii yaaya ningo sana pano insita zimwi ingacefyanyako imisonko imwi iikalondekwa uku uteeko.

Wakwe vino mazwi akuti “misangulo ya kuitemelwa” yakupiliula, pakuti umuntu aomvye inzila zii pa kusangwilako alinzile ukutantika ningo sana. Ivyeo na vyuze pali vino mungasangwilako umu kuitemelwa uku mulimo wa mu nsi yonsi wakwe ya Nte Yakwe Yeova, mungavizana umu kabuku kamwi (Charitable Planning to Benefit Kingdom Service Worldwide) akaya umu Cizungu nu mu Cispanish. Kabuku kaa kakalondolola inzila izipusane pusane zino umuntu angaomvya pa kusangwilako pali ino nsita nanti lyuze nanti sile lino wafwa. Ivyeo ivyaya umu kabuku kaa, limwi vitanga vimukume sana apa mulandu na masunde pa vya misonko nanti masunde yauze aaya umu mpanga inu. Antu aingi yakaazwilizya ukutungilila umulimo wa mu nsi yonsi nupya ukuomvya inzila zii pa kusangwilako kwayazwa umu vya misonko. Ndi cakuti akabuku kaa amuno kaya umu mpanga inu, mungalenga kuli kalemba uwaya umu cilongano cinu ukuti amupeeleko akabuku kaa.

Pa kuti mumanyilepo na vyuze, mungatinika apali ponsi pano mungazana amazwi yakuti “Sangwiliniko ku Mulimo Witu Uwa mu Nsi Yonsi” nanti mungatumila ukwi ofesi lyakwe ya Nte Yakwe Yeova.