Mwakolanya Yakasesema—Naumi
1. I vyani vino tungasambililako mwi buku lyakwe Naumi?
1 Vitantaala vya musumba wa Ninive uwaliko mpiti, vikalangilila ukuti Yeova akafulula alwani yakwe, wakwe viivi kwene vino Naumi wasowile, nupya nanti alwani yakwe yangakalipisya yatuuli, yatanga yacite cimwi kuli aliwe. (Nau. 1:2, 6) Ndi tuvwikisya usesemo wakwe Naumi tungasambililako ivya kuomba ningo umu mulimo wa kusimikila.
2. Tungacita uli pakuti ilandwe litu lyasansamusya antu?
2 Mwayasansamusya: Pa kutandika, ibuku lyakwe Naumi likaloleka kwati i buuku umwaya sile ilandwe lya viipe pa musumba wa Nineve, uwali umusumba ukalamba nupya uwipe umu Asilya. (Nau. 1:1; 3:7) Lelo ilandwe lino Naumi walanzile, lyali i landwe lisuma ku yantu yakwe Yeova. Naumi, wino iziina lyakwe likapiliula ukuti “Kasansamusya,” walavile antu yakwe Ayuda ukuti insita iya koonona alwani yao yaali mupiipi! Naumi nupya walangilile ukuti Yeova “akacingilila antu yakwe mu nsita ya ntazi.” (Nau. 1:7) Naswe tukasimikila ilandwe lisuma nu kukomelezya antu ukuti yautukila kuli Yeova pakuti ayacingilile.—Nau. 1:15.
3. Wakwe vino Naumi waomvyanga ivilangililo, uzye naswe tungamukolanya uli?
3 Mwaomvya Ivilangililo: Yeova walenzile Naumi ukukolanya ukonoona kuno aina Asilya yononyile umusumba wa Teebesi uwali mu Egupto ku kulangilila vino umusumba wa Ninive waali nu koononwa. (Nau. 3:8-10) Lino tukuneena antu pa mpelelekezyo ya nsi yii, tungalandako pa mausesemo yamwi-yamwi aalembwa muli Baibo aakalangilila ukuti Yeova akafikilizya vyonsi vino walaya ukwaula ukufilwa. Usesemo umwi uwafikiliziwe aeu: Imyaka nalimwi 2,600 iyapitapo, lino aina Babiloni na ina Mede yaile umu kuzanza umusumba wa Ninive, imvula iingi cuze yalenzile uluzi lwa Tigilisi ukuzuula cakuti amanzi yawisizye iviumba ivikome ivya musumba. Lyene umusumba wa Ninive, yauzanzile zuwa-zuwa nu kuucimvya ndi vino Yeova walanzile.—Nau. 1:8; 2:6.
4. Uzye tunga-angusya uli ivyeo lino tuli mu mulimo wa kusimikila?
4 Mwa-angusya Ivyeo Pakuti Antu Yuvwe: Vino Naumi walembanga, antu yavyuvwanga pano walondololanga ivilacitika umu nzila iyuvwike nupya iyangupale sana. (Nau. 1:14; 3:1) Naswe kwene twalanda ivinguvwika uku yantu yonsi. (1 Kol. 14:9) Ndi cakuti twazana umuntu umuku wa kutandikilapo, tulinzile ukulondolola ningo cino tuiliile. Lino mukusambilila Baibo na antu, mwayaazwa ukutaila Yeova alino ni Izwi lyakwe, nu kuyaazwa kulacita vino yakusambilila.—Loma 10:14.
5. Uzye usesemo wakwe Naumi, ukatusansamusya uli?
5 Ibuku lino Naumi walemvile likalangilila ukuti wataile sana usesemo wakwe Yeova ukuti waali nu kufikiliziwa. Lino impela ya nsi yii yakwe Satana ikupalamila, tukasansamuka ndi tuvwa amazwi aakuti: “Kutalatala kuye uulanda napya.”—Nau. 1:9, NW.