Mwa-azwa Impafu Kusambilila Pali Yeova
1. Uzye vino Yesu wacitiile impafu vyalanzile uli ukuti wali na mizu?
1 Lino kwasyala sile manda anono kuti Yesu afwe, wazanyile impafu ziili ale akufuma umu Yeliko, avino nazyo zimupundilila ziti: “Mwene, uye na mizu kuno tuli!” Nanti cakuti Yesu wali umusakamale sana pa ntazi zino zyali mupipi nu kumucitikila, wimilile, aama impafu zizyo nu kuzipozya. (Mate. 20:29-34) Uzye tungakolanya tutuuli amizu yako Yesu lino twazana impafu?
2. Tungacita uli pakuti tusimikile impafu ino twazana ku ncende ukukazanwa antu aingi?
2 Mwa-azwa Impafu: Ndi cakuti mwazana impafu, nanti sile uku ncende ukukazanwa antu aingi, mwailondolola mweineco alino imuzya impafu iyo ngi cakuti ingalonda uwazwilizyo umwi. Vino antu aingi yatasumba mano ku mpafu, fwandi limwi lino mwalanda ni mpafu iyo inguvwa intente. Nomba ngi cakuti muli ni cikuuku lino mukulanda ni mpafu alino imuyikako na mano, ingangukilwa ukulanda namwe. Mufwile nu kumanya ukuti impafu zikalonda uwavwilizyo upusane-pusane. Lino mwazwilizya impafu, pa cisila mungalondolola ukuti mukasambilizya antu kumanya Yeova. Mungamuwelengelako ilembelo wako Masamu 146:8 nanti Ezaya 35:5, 6. Ndi cakuti akawelenga ivilembo vya mpafu, mungamuzya ndi cakuti angatemwa ukukwata lupapulo mu lulimi lwa mpafu ulungamwazwa ukumanyilapo na vyuze pali Baibo. Mungamulondela na malyasi akukutikako aya apa jw.org. Ngi cakuti impafu yaakwata kompyuta ino yakwata pologalamu yakuwelenga ivilembo, ingatemwa ivipande vino vyaya pa jw.org kumwi sile nu kukopa impapulo zipusane-pusane mu musango wako RTF (Rich Text Format).—Lolini kambokosi akakuti “Lino Mukwazwa Impafu . . . ”
3. Uzye aekwi kuno tungazana impafu mu cifulo cino tukasimikila?
3 Mwalonda Ukungazanwa Impafu: Asi lingi lino tukalolana ni mpafu lino tukusimikila ku ng’anda ni ng’anda pa mulandu wakuti impafu zitatemwa sana kulanda na antu yano zitamanyile ndi yaazitandalila pa mang’anda. Fwandi kano twaombesya “kulonda” impafu pakuti sile tuzisimikile. (Mate. 10:11) Uzye mukaomba nanti kusambililapo ni impafu imwi? Mwaitandikila kulanzyanya nayo. Ngi cakuti mu cifulo cino mukasimikila mwaya isukulu lya mpafu, mungatwala impapulo zya vilembo vya mpafu zya kuomvya pi sukulu kwene lilyo. Uzye mwamanya umwi wino lupwa wakwe wapafula? Uzye mu cifulo cino mukasimikila mwaya utuungwe utuka-azwilizya impafu muli vimwi vimwi nanti kuzikulila umwakwikala? Mungalondolwela lupwa, nanti wino akapokelela aenyi pa cikulwa kwene cico, nanti aaka-angalila papo kwene ukuti ya Nte Yakwe Yeova yatemwa ukwazwilizya impafu, napya mungamunena ukuti mungaleta impapulo mu vilembo vya mpafu kumwi na mazwi yano yakopa. Muwelengelini vino Baibo ikalanda ukuti likwene sile Yeova wasya afumyepo ukupafula. Mungamutambisya na kavidyo kakuti “Without It, I Would Feel Lost,” akaya pa jw.org akakalanda pa mpafu iyazwiwa pa kukwata Baibo mu vilembo vya mpafu. Ndi cakuti umuku sile uwa kutandikila mwalondolola cino muyilile, cingalenga kuti mukwate isyuko lya kulalanzyanya ni mpafu izingi.
4. I vyani vino tungasambilila kuli vino Janeti wacisile?
4 Nkazi umwi wino wapafula wi zina lyako Janeti watandalile pa cikulwa ca mpafu . Watandike ukulanzyanya nu mukazyana. Janeti wamunenyile ati, “Yesu wapozyanga impafu kulanga vino alacitila yonsi aapafula.” Walanzyanyizye nawe ilembelo lyako Umbwilo 21:3, 4, nu kumulondolwela vino mazwi yaa yalafikiliziwa lino Uwene Wako Leza ulateeka. Mukazyana wakutumiile alino alanda ati: “Ntatala nuvwa kuno impafu yalanda vivyo. Antu aingi aatapafula yazumila ukuti icikalenga ukupafula a pa mulandu na vino umuntu wiyo uwapafula nanti vikolwe vyakwe yaacisile.” Pa cisila Janeti watumiile mukazyana kwene wiyo pa intaneti ibuku likati Vino Baibo Ikasambilizya, ndakai akamusambilizya Baibo imiku iili cila mulungu.
5. Nanti cakuti tutange tupozye impafu wakwe vino Yesu wapozyanga, i vyani vilacitika ngi cakuti tukuzisumbako mano?
5 Kwene tutange tupozye antu yano yapafula wakwe vino Yesu wapozyanga, lelo tungaazwa antu atamanya icumi pa mulandu wakuti leza wa nsi ii wayapafuzya, kumwi sile na yaaya apafula mu cumi. (2 Kol. 4:4) Yesu wapozizye aonsi yaili mupipi na Yeliko pano wayuvwilile “amizu.” (Mate. 20:34) Ngi cakuti tukwika mano kuli yano yapafula, tungakwata isyuko lya kuyazwa ukumanya Yeova, wiyo aalasisyapo ukupafula.