Mwapekanya Pakuti Mwasambilizya Ningo

Pa nsita izipusane, antu yaili yuziizye Yesu iuzyo lililimwi pali vino yangacita pakuti yakakwate umi wa pe, lelo Yesu wasukanga ukulingana na vino cila muntu walondekanga ukumanya. (Luka 10:25-​28; 18:18-​20) Fwandi naswe kwene nanti cakuti itumanya ningo ivyeo vino tulasambilila nu musambi, inkoleelo tulinzile ukupekanya lino tutatala twaya umukusambilila nawe. Uzye i visinka ci ivingamutalila ukuvwikisya nanti ukuzumila? Uzye a malembelo ci aali umu mapalagalafu yano tumaya tukawelenge nawe? Uzye a mapalagalafu yanga yano twayasambilila nawe? Tulinzile ukupekanya ningo icilangililo cino twayaomvya, vino twayalondolola ivyeo, alino na mauzyo aali umu cipande aakwavwa umusambi ukuvwikisya ivyeo ivili umwisambililo. Fwandi pa mulandu wakuti Yeova aliwe akalenga imbezu zya Wene ukukula umu myenzo ya yantu, tulinzile ukupepa kuli aliwe lino tukupekanya ivya kuyasambilila nu musambi, ukupepelako umusambi, alino nu kupepa pali vino tukaombesya ukwavwa umusambi ukulunduluka muli ukapepa.​—1 Kol. 3:6; Yako. 1:5.