Mwaomvya Ningo Ibuku Lyakuti Vino Baibo Ikasambilizya
Ndi cakuti umusambi wamanya ningo vino Baibo ikasambilizya nupya akucita na vino akusambilila, alaalunduluka sana muli ukapepa nupya alaya ni miyele isuma. (Masa. 1:1-3) Tungaavwa umusambi witu ukulunduluka ndi cakuti tukuomvya ningo ivyeo vimwi-vimwi ivyaya umwibuku lyakuti Vino Baibo Ikasambilizya.
Mauzyo Akutandikilako: Cila cipande cikatandikilapo na mauzyo aalasukwa umwisambililo kwene lilyo. Mulinzile ukuuzya ningo mauzyo yayo pakuti umusambi aalondesya ukuvwa vino alasambilila umu cipande cico. Nanti limwi mungamunena ukuti alandeko panono pi uzyo lyonga na lyonga. Ndi cakuti vino walondolola vyapusana ni vyasuko, mutalinzile ukumulungika papokwene. Pano vino walanda ivingamwavwa ukuti mumanye ningo ivyeo ivikulondekwa ukwizalandapo sana pakuti auvwikisye.—Mapi. 16:23; 18:13.
Ivyeo Navyuze: Ndi cakuti umusambi aatauvwikisya nu kuzumila ivyeo ivyativilandwa umu mapalagalafu, mungamukomelezya sile ukuti akapitulukemo umu vyeo navyuze lino ali wenga. Lino mwaya uku kusambilila nu musambi umuku uwalondelelapo, limwi mungalanzyanya nawe umu mamineti anono pakuti mumanye ndi cakuti atauvwikisya. Lelo ndi cakuti ivyeo vivyo vingavwa sana umusambi, mufwile ukupaatulako insita lino mukusambilila nu musambi iyakuti mulanzyanye umu vyeo navyuze nanti sile ukuwelenga mapalagalafu yamwi aali umu vyeo navyuze, nupya mufwile ukumuuzya mauzyo asuma yano imupekanyizizya calimwi.
Kambokosi Kakupitulukamo: Kambokosi kakupitulukamo akakaya uku mpela ya cipande conga na conga kakwata ivyeo ivika-asuka amauzyo aakatandikilapo umu cipande. Mungaomvya ivyeo vivyo pakuti mumanye ndi cakuti umusambi aatauvwikisya, alino nu kumanya ndi cakuti angalondolola ivisinka ivikalamba ivyativilandwapo umu cipande. Mufwile ukuwelenga icisinka conga na conga icili umu kambokosi capamwi na malembelo aakuvwana ni cisinka kwene cico. Lyene mufwile ukunena umusambi ukuti aomvye amalembelo aali apa cisinka conga na conga pakuti alondolole umulandu uno icisinka cico i cacumi.—Mili. 17:2, 3.