Inyimbo Zya Wene Zikakomya Utailo Witu

Paulo na Sailasi imbanga inyimbo zya kulumbanya Yeova ala yali umu cifungo. (Mili. 16:25) Na ndakai kwene aomvi yakwe Yeova yamwi kucisila imbanga inyimbo lino yaali mu nkambi zya kucuzizyamo antu umu uteeko wa Nazi mu Germany na lino yaali uku Siberia. Vino yonsi yaa yacisile vikutulanga vino ukwimba inyimbo zya wene kungazwa Aina Klistu ukukomeleka umu utailo lino yakweti intazi.

Ibuku lya nyimbo ilipya ilyakuti Katwimbile Yeova nu Luzango lyasya lifume likwene umu ndimi na zyuze izingi. Lino tulapokelela ibuku lya nyimbo ilipya, cingazipa sana ndi twasungila mazwi aalimo kupitila mu kwimbako lyonsi lino tuli pa kupepa kwa lupwa. (Efes. 5:19 ) Lyene umupasi wa muzilo ulaatwazwa ukulaiusya inyimbo zii ndi cakuti twakwata intazi. Inyimbo zya Wene zikatwazwa ukwika mano uku upalilo uno twakwata. Nupya zingatukomelezya sana lino yakutuzunya. Nanti sile alino tuli ni nsansa, “ukwimbila Yeova nu Luzango” kungalenga imyenzo itu kuzanga cuze. (1 Mila. 15:16; Masa. 33:1-3) Lekini fwandi swensi twaomvya ningo inyimbo zya Wene!

TAMBINI VIDYO IKUTI LWIMBO ULUKAKOMELEZYA AOMVI, LYENE MWASUKE MAUZYO YAA ALI APISIKA:

• I cani calenzile Umwina Frost apange ulwimbo luu?

• Uzye ulwimbo luu lwakomelizye uli aina ali umu nkambi zya kucuzizyamo antu?

• Uzye inyimbo zya Wene zingamwazwa uli lino mwaya ni ntazi?

• Iinyimbo ci zya Wene zino mungatemwa ukulaiusya?