Ivyeo Vya Kuomvya Umu Kabuku Kakuti Swe Ina Klistu nu Mulimo Witu
© 2024 Watch Tower Bible and Tract Society of Pennsylvania
MEI 6-12
IVYUMA IVYAYA UMWI IZWI LYAKWE LEZA MASAMU 36-37
‘Mutalinzile Ukusakamikwa Apa Uyi wa Antu Aipe’
I Vyani Ivilafumiziwapo Lino Uwene Wakwe Leza Uliza?
4 Uzye antu aipe yakalenga uli ukuti twauvwa uyi? Pa cisila ca kulanda ukuti umu manda yaa mulaya “tusita tutale,” umutumwa Paulo wapeezilwe umupasi wa muzilo ukulemba ukuti: “Antu aipe, nupya asomvi yene yalipisya kuluta.” (2 Tim. 3:1-5, 13) Uzye mukulola vino mazwi yaayo yakufikiliziwa? Sweingi antu yaa aipe yakatucuzya, ukutupata, nu kutucitila ivintu ivipisye. Yamwi yene yakacita vivyo ala tukulola nako; yauze yene asomvi, yakailanga muli vino yakacita kwati aololoke fwandi foo. Nanti icakuti yatatala yatucitilapo ivintu vii, antu yaayo yakalenga twauvwa uyi. Tukaya sana nu ulanda ndi cakuti tuvwa ivipe vino iyacita. Vino aipe yakacuzya ana, akoloci, alino na yauze atakweti amaka ya kucimvya nanti antu angayazwa vikalenga twauvwa uyi. Antu yaa aipe yakalanga imiyele iyaunyama nupya yakwe uciwa. (Yako. 3:15) Nomba cikatuletela insansa ndi tuvwa ivisuma ivilacitika uku nkoleelo vino Izwi Lyakwe Yeova likatunena.
Yeova Akapaala Yayo Aakaelela Auze
10 Tukalenga umi witu ukukanaya ningo ndi cakuti twatwalilila ukusoka. Ukusoka kwaya wa cisendo icinyome, nupya Yeova akalonda twaya nu mutende uukaiza nga twata ukusokela antu. (Belengini Efeso 4:31, 32.) Akatukomelezya ukuti “mutaatwalilila ukuya asoke nupya mutaaya ni cipyu.” (Masa. 37:8, NWT.) Ukulondela amazwi yayo kungatwazwa sana. Nga twatwalilila ukusokela umwi uwatatucitila iviipe tungauvwa uyi nupya umi witu utange uye ningo. (Mapi. 14:30) Ukutwalilila ukusokela umwi kutange kulenge umi wakwe ukukanaya ningo, wakwe vivi kwene vino nga twamwa poizoni citange cilenge umi wakwe wino watatusosya ukukanaya ningo. Lelo nga tweleela yauze ala twaicitila icintu icisuma. (Mapi. 11:17) Tukaya nu mutende nupya tukatwalilila ukuombela Yeova.
w03 12/1 ifwa 13 pala. 20
“Walonda Ukuzangila Muli Yawe”
20 Lyene, “yao aicefya yalapyana impanga.” (Masamu 37:11a) Nomba uzye “yao aicefya” antu yamusango ci? Izwi lyakuti “aicefya” lyasenulwa ukufuma ukwi zwi ilikapiliula ukuti “ukucuzya, ukufuka, nu kuzewana.” Mu cumi , “aicefya” ayayo akalolela ukuti Yeova akafumyepo ulufyengo. “Yalasyukila ulongo ulumalilike.” (Masamu 37:11b) Na ndakai kwene tukaya nu mutende uwingi lino tuli muli Paladaise wa unkolanya uwaya umu Cilongano ca Ina Klistu ya cumi.
Ukuvwikisya Sana Ivyaya Umu Malembo
it-2 ifwa 445
Mwamba Uutalimpisye
Kukana sunkana, kutwalilila ukuyako, nanti ukutalimpisya. Imyamba isisunkana nupya yatwalilila ukuyako. (Eza. 54:10; Haba. 3:6; loliniko na Masa. 46:2.) Fwandi lino kiimba wa masamu walandanga pa ulungami wakwe Yeova ukuti waya wa “myamba itali yakwe Leza” (Masa. 36:6) afwile walozyanga umukuti ulungami wakwe usisunkana. Nanti, vino imyamba ya talimpisya, ali vino nu ulungami wakwe Leza wacila sana ulungami wa yantu. (Loliniko na Eza. 55:8, 9.) Kulozya kukwitila ukali wakwe Yeova mumbale yalenga namba 7, pa Kusokolola 16:20 pakati: “Myamba yatiile ukuloleka.” Cii cikalangilila sile ukuti nanti cintu cingatalimpa uli wa myamba, citanga cifisame ukukwitilwa uukali wakwe Yeova.—Loliniko na Yele. 4:23-26
MEI 13-19
IVYUMA IVYAYA UMWI IZWI LYAKWE LEZA MASAMU 38-39
Mutalinzile Kutwalilila Ukuipeela Imilandu
Mwaelenganya pa Vya ku Nkoleelo
12 Belengini 1 Yoane 3:19, 20. Swensi kwene tukayuvwa amulandu insita zimwi. Yamwi yakayuvwa amulandu pa mulandu na vino yacisile lino yataatala yasambilila icumi. Yamwi nayo yakayuvwa amulandu pa viipe vino yacisile pa cisila ca kubatiziwa. (Loma 3:23) Kuya kwene, tukalonda ukucita ivisuma. Lelo “Lili lingi swensi kwene tukaluvyanya.” (Yako. 3:2; Loma 7:21-23) Nanti icakuti tusiuvwa ningo ukuyuvwa amulandu, insita zimwi mungafuma ivisuma. U mulandu ci? Pano nga tukuyuvwa amulandu, cingalenga tusenuke nu kulondesya ukukanaswilizyapo vino twaluvyanyizye.—Ayeb. 12:12, 13.
13 Lelo insita zimwi, tungatwalilila ukuyuvwa sana amulandu nanti icakuti twalapila na Yeova watweleela. Kuyuvwa vivyo kwaipa sana. (Masa. 31:10; 38:3, 4) U mulandu ci? Elenganyini pali nkazi umwi uwatwalilile ukuyuvwa uwa mulandu pali vino waluvyanyizye mpiti. Watiile: “Nayuvwile ukuti i casilesile ukuombesya umu mulimo wakwe Yeova pano namanyile ukuti ntalapusuka.” Sweingi tungayuvwa wakwe vino nkazi wii wayuvwanga. Fwandi tulinzile ukucenjela pakuti tutatwalilila ukuyuvwa sana amulandu. U mulandu ci? Pano Satana angatemwa sana nga twata ukuombela Yeova, nanti icakuti Yeova wene watweleela!—Loliniko na 2 Kol. 2:5-7, 11.
w02 11/15 ifwa 20 mapa. 1-2
Uzye Tungacita Uli Pakuti Manda Itu Yacindame Kuli Yeova?
AMANDA yano tukaikala pano nsi yacepa sana. Lino Devedi welenginye sana pali vino tukaikala manda anono pano nsi wapefile ukuti: “We Yawe, unene pano umi wane ulapelela, unene na pano amanda ya umi wane yalasilila. Nsambizye uleke manye vino umi wane ukaapita zuwa.” Cino Devedi walondanga ukulazanzya Leza, muli vino walandanga na muli vino wacitanga. Devedi walangilile ukuti wataile Leza lino watiile: “Nemo awewe sile wenga mpo wino nataila.” (Masamu 39:4, 5, 7) Yeova wakutike. Nupya umu cumi Yeova waweni vino Devedi wacitanga. Fwandi wamulambwile ukulingana na vino wacitanga.
Cangupala sana ukuya umupamviwe uwanda onsi nu kwika sana mano ukukwikala umi umwaya ivyakucita ivingi. Cii cingalenga twasakamikwa sana, sana sana ngatukweti vyakucita ivingi nomba ala tukweti insita inono iyakuvicita. Uzye naswe tukalonda ukwikala umi wa kuzanzya Leza wakwe vino Devedi wacisile. Kulanda sile icisinka, Yeova akalola nupya akatuceceta swensi wenga na wenga. Ipapita imyaka limwi ukufika kuli 3,600 ukufuma pano Yobo umonsi uwatiinanga Leza wazumilile ukuti Yeova akalola vino akacita nupya akaceeceta imilimo yakwe. Yobo uzizye ukuti: “Indamwasuka uli lino alanguzya?” (Yobo 31:4-6, 14) Tungaleka amanda itu yacindame kuli Yeova ndi cakuti tukwika ivya Wene inkoleelo, ukuvwila Masunde yakwe, nu kulaomvya ningo insita. Lekini tulande pa vintu vii.
Twalililini Ukuzifya Ucuza Winu na Yeova
Mwalanda na Yeova lyonsi. Tata winu wamanya ukuti nga mwatwalilila ukuyuvwa amulandu, cingamutalila ukulapepa kuli aliwe. (Loma 8:26) Nomba mwapepa lyonsi kuli Yeova nu kumunena ukuti mukulondesya ukumuzanzya. (Loma 12:12) Ya Andrej yakaiusya ukuti: “Nayuvwanga uwa mulandu sana nu kuvwa insonyi. Nomba lyonsi nga napepa, nuvwangako ningo. Nayanga sana nu mutende.” Ndi cakuti mutamanyile vino mungapepelapo, mungabelenga amapepo ya Mwene Devedi yano wapepanga lino walapiile alembwa umu Masamu 51 na 65.
Ukuvwikisya Sana Ivyaya Umu Malembo
Mwalanga Ukuti Yauze Yangamutaila
16 Cacindama ukuikanya ndi cakuti tukulonda yauze yatutaile. Miyele ii ikatwazwa ukuya mya ndi cakuti twatunkwa ukulanda vino yatunenyile ukuti i nkama. (Belengini Mapinda 10:19.) Cingatutalila ukuikanya lino tukuomvya intaneti. Nga tutacenjile tungasokolola ilyasi lya nkama uku yantu aingi ukwaula nu kumanya ukuti avino itucita. Nupya ndi cakuti twika ivyeo vivyo pa intaneti, tutange tumanye vino antu yangaomvya ivyeo vivyo ni viipe ivingacitika. Nupya ukuikanya kungatwazwa ukwikala mya lino aakatukanya yakwezya ukutupatikizya ukusokolola ivyeo vimwi ivingalenga aina na ya nkazi ukuya umu uzanzo. Ivya musango uu vingacitika lino ya kapokola aaya umu mpanga muno yainda umulimo witu yakutuzya mauzyo. Tungaomvya icisinte icikati “namalemanga pa kanwa kane insita yonsi” lino ivya musango uu nanti vyuze vyacitika. (Masa. 39:1) Tulinzile ukuya akutailwa kuli ya lupwa itu, ivyuza, aina na ya nkazi nanti antu yauze. Nupya pakuti yauze yatutaile, tulinzile ukuikanya.
MEI 20-26
IVYUMA IVYAYA UMWI IZWI LYAKWE LEZA MASAMU 40-41
U Mulandu ci Uno Tulinzile Ukwazwila Antu Yauze?
Ya Kapekape Yakaya ni Nsansa
16 Antu aaya na ukapekape wa cumi yasipeela pakuti nayo yace yapeelwe vimwi. Vikwene avino Yesu welenganyangapo lino walanzile amazwi yakuti: “Lelo ndi wacita cimulo, ama apina, ya kasinta, vilema, ni mpafu. Lyene ulapolelelwa, pano yasi namaka akuti yakakuwezezye.” (Luka 14:13, 14) Kalemba umwi wakwe Baibo walemvile ukuti: “Kapeela wa luse akapolelelwa.” Muuze nawe walemvile ukuti: ‘Uwa nsansa u muntu wiyo akasakamala mupina nu mulanda.’ (Mapi. 22:9; Masa. 41:1) I cumi cumi tulinzile ukuya na ukapekape pano tukaya ni nsansa ndi tukwazwa yauze.
17 Lino Paulo walanzile pa mazwi yakwe Yesu akuti: ‘Mukupeela mwaya upolelelo ukulu cuze kuluta mukupokelela,’ atalozyanga sile umu kupeela yauze vino twakwata, lelo walozyanga nu mu kukomelezya yauze, ukuyatungulula muli vimwi, alino nu kwazwa yayo akulondekwa uwazwilizyo. (Mili. 20:31-35) Umutumwa Paulo watusambilizye muli vino walandanga nu kucita ukuti tulinzile ukwazwa yauze ukuomvya insita itu, amaka, ukuuvwa vino yakutunena nu kuyalanga ukutemwa.
18 Aakalondelezya sana pa mikalile ya yantu nayo yazana ukuti antu aya na ukapekape yaya ni nsansa. Ilyasi limwi lyalanzile ukuti: “Antu yakaya ni nsansa lino yalanga uluse kuli yauze nu kuyacitila vimwi.” Aakalondelezya yalanda nu kuti ukuya na ukapekape kwacindama sana “pano kukafikilizya vino antu yakalonda.” Fwandi ali cino asambilila sana pa wikalo wa yantu, ilingi yakakomelezya antu ukuipeelesya ukuombela yauze pakuti yaye nu umi usuma ni nsansa. Cii citanga cizungusye yayo aakazumila ukuti Yeova uwaumvile antu, aliwe walenzile ukuti Baibo iyeko.—2 Tim. 3:16, 17.
Yeova Alaamwazwa
7 Lelo ngi cakuti mwalwala, Yeova alaamutekezya nu kumwazwa wakwe vino wazwilizye aomvi yakwe ampiti. Umwene Davidi walanzile ati: “Walongo umuntu wiyo akasakamala mupina nu mulanda, [Yeova] nawe alamukulula uwanda wa ntazi.” Yeova alacingilila umuntu wiyo nu kumusunga. (Masamu 41:1, 2) Kuya kwene Davidi atalozizye umukuti umuntu musuma uwasakamalanga alanda, ataali nu kufwa. Nomba Yeova wali nu kwazwa uli umuntu wiyo umusuma? Davidi walondololwile ati: “Umu kulwala [Yeova] akamwazwa, nu kumuletela umutende wa mpomvu.” (Masamu 41:3) Yeova wamanya ningo sana vino aomvi yakwe yakacula, nupya asiilila antu yaayo. Angayapeela amaka na mano. Nupya Yeova wapanga umwili wa muntu umu nzila yakuti ungaipozya uwineco.
Mwaya nu Luse Wakwe Vino Yeova Waya
17 Mutalinzile ukuya nu luse pa mulandu wakuti mwamanya ukuti kungamwazwa. Umulandu ukalamba ulinzile ukumilenga ukuya nu luse uwakuti mukulondesya ukukolanya nu kucindika Yeova Leza ukwata sana ukutemwa. (Mapi. 14:31) Akatulangilila ningo ningo ivya kucita. Fwandi lekini twaezya na maka ukumukolanya pakuti twalanga vino twatemwa sana ina nu kuya na ucuza usuma na inamupalamano lino tukuyalanga uluse.—Gala. 6:10; 1 Yoa. 4:16.
Ukuvwikisya Sana Ivyaya Umu Malembo
it-2 ifwa 16
Yeova
Baibo yonsi ikalanda pa kutungilila ukateeka wakwe Yeova wa papela pela, nupya cii cikalanga vino Yeova akalonda, kuli kuti ukucindika izina lyakwe. Pa kulicindika cikalondekwa ukufumyapo umuzewanya onsi api zina Lyakwe. Nomba na cuze icikalondekwa pakuti izina lii licindikwe icakuti, viumbwa vya kwi yulu na pano nsi vyalola ukuti izina lii ilya muzilo. Cii cikupiliula ukuti viumbwa vii vilinzile ukumanya ningo izina lyakwe nu kucindika ukateeka wakwe, nupya vilinzile ukuitemelwa ukucita vivyo, ukulonda ukumuombela, nu kutemwa ukucita ukulonda wakwe pa mulandu wakuti twamutemwa. Ipepo lino Devedi wapefile ilyaya pa Masamu 40:5-10 likalondolola ningo imiyele iyo alino na vino tungacindika izina lyakwe Yeova umu cumi. (Lolini vino umutumwa waomvizye isamu lii pa kulanda pali Yesu pa Aeb. 10:5-10.)
MEI 27–JUNI 2
IVYUMA IVYAYA UMWI IZWI LYAKWE LEZA MASAMU 42-44
Mwaomvya Ningo Vino Yeova Akamisambilizya
w06 6/1 ifwa 9 pala. 4
Visinka Ivyaya Umwi Buku Lyakwe Ciili Lya Masamu
42:4, 5, 11; 43:3-5. Ndi cakuti kwayako vimwi vingalenga ukuti tute ukuya pamwi na Ina Klistu yanji mu cilongano, ukwelenganya pa nsansa zino twayanga nazyo ndi cakuti tuli na ina yaa, kungatwazwa. Nanti icakuti pakutandika limwi tuvwanga ukuzukilwa, cikatwiusya ukuti Leza aali kacingilila witu nupya tulinzile ukuloleela pakuti atwazwe.
w12 1/15 ifwa 15 pala. 2
Vino Tungacita Pakuti Twaipakizya Sana Lino Tukuisambilizya Baibo
1 IPEPO: Ukupepa ali cintu cino tulizile ukutandikilapo ukucita. (Masa. 42:8) U mulandu ci? Tulizile ukwiusya ukuti ukuisambilizya Baibo nayo kwene izila yakupepelamo Yeova. Fwandi tulizile ukupepa kuli Yeova pakuti atwazwe ukuteyanya amelenganyo alino nu kutupela umupasi wa muzilo. (Luka 11:13) Ya Barbara aa omba uminsyonali pa myaka iingi yalanzile iyati: “Lyonsi nkatandikilapo ukupepa lino ntatala natandika ukubelenga nanti ukuisambilizya Baibo. Nga namala ukupepa nkauvwa ukuti Yeova ali nani nupya amangazwa ukuvwikisya vino nkubelenga alino na vino nkuisambilizya.” Kupepa lino tutatala twatandika ukuisambilizya Baibo kukalenga twauvwikisya vino tukuisambilizya.
‘Mutaleka Makasa Inu Yapomponteke Foo’
11 Naswe kwene tukakomeleziwa sana kuli vino tukasambiliziwa umu kulongana kwa cila mulungu, pa ma ukongano anono na akalamba, alino nu ku masukulu ya uleza. Masambililo yayo yangatwazwa ukutandika ukulalondesya ukwimika amauyo, nu kuombako imilimo iingi iyaya umwi uvi. (Masa. 119:32) Uzye mukalondesya ukukomeleziwa na masambililo ya musango uwo?
12 Yeova wazwilizye aina Izlaeli ukucimvya aina Amaleke na ina Kusyi, nupya wapeezile Neemiya na auze amaka akuyazwa ukumala umulimo wa kukula cipya cipya. Naswe kwene Yeova alatupeela amaka akuzizimizya ndi yakutuzunya, ndi yano tukusimikila yatisileko amano, na lino tukusakamala sana pakuti tutwalilile ukuomba umulimo wa kusimikila. (1 Pet. 5:10) Tutalinzile ukulolela sile ukuti Yeova amacita icizungusyo. Lelo tulinzile ukucita ivingatwazwa. Pa vintu vivyo pali nu kuwelenga Baibo lyonsi, kupekanyizizya ukulongana alino nu kuzanwako cila mulungu, kuisambilizya Baibo sweineco alino nu kupepa kwa lupwa, alino lyene tulinzile nu kutaila Yeova lyonsi nu kupepa ukuti atwazwe. Lekini lyonsi twaezya na maka ukukanalenga ivintu vyuze ukutupumvyanya uku vintu vino Yeova watupeela ukuti vyatukomya. Ndi cakuti mwalola ukuti amakasa inu yatandika ukutonta, mwata ukucita vimwi pali vii, mwapepa kuli Leza ukuti amwazwe. Lyene mulalola vino umupasi wakwe Leza uukaomba “munomuli kuti mwalonda kuomba vivyo vingamuzanzya,” ulamwazwa. (Filipi 2:13) I vyani vino mungacita pakuti mwakomelezya yauze?
Ukuvwikisya Sana Ivyaya Umu Malembo
it-1 ifwa 1242
Nkusa
Muli Baibo izwi lyakuti nkusa yakaliswilizyapo pa kulanda pa vilangililo vimwi. Yobo walondolwile ukucula kuno waculanga ukuti “ya nkusa ali yano yasanguka ivyuza vyane.” (Yobo 30:29) Kulozya kuli vino antu yakwe Leza yakayacuzya, kimba wa masamu walanzile ivikolaneko na vii lino walanzile pali vino ivilyanyi vikakolongana pa ncende yonga pakuti vilye vino vyativikoma (Loliniko na Masa. 68:23), watile: “Wemo watutusumba sile, twatitwikala umu mapoli umwikala ivilyanyi.” (Masa. 44:19) Mu 607 B.C.E. nkambi ya asilika ya ina Babiloni iyayelile mu Yelusalemu, yalenzile kuye icipowe na cii calenzile ukuti ya nyina ya yana yalya ana yao. Avino na Yelemiya walozizyeko lino walanzile pali vino antu yacuzyanga antu yauze.—Ndosya 4:3, 10.
JUNI 3-9
IVYUMA IVYAYA UMWI IZWI LYAKWE LEZA MASAMU 45-47
Lwimbo Ulukalanda pa Winga wa Mwene
w14 2/15 mafwa 9-10 mapa. 8-9
Mwazangila pa Winga wa Mwana Wamfwele!
8 Belengini Masamu 45:13, 14a. Nawinga yamutwala kuli siwinga “nawe pasi pakuzipa!” pa mulandu nu winga ucindame. Pa Kusokolola 21:2, nawinga yamukolanya ku musumba, kuli kuti Yelusalemu umupya, nupya yamukolanya kuli “nawinga uwataemviwa aakuloleela siwinga.” Musumba uu wakwiyulu waya nu “lulumbi lwakwe Leza” nupya “wayengesanga wi we lino yakati jasipa ilikaloleka wi galasi.” (Kuso. 21:10, 11) I buku lya Kusokolola likalondolola vino Yelusalemu Mupya wayemba. (Kuso. 21:18-21) Ali mulandu kwene uno kimba wa masamu walondolola ukuti nawinga “nawe pasi pakuzipa”. Vikwene ali vino tulinzile ukwenekela nawinga ukuya, pano uwinga uu ucindame, ulayela ukwiyulu.
9 Kuno yatwazile nawinga akuli Siwinga kuli kuti Umwene Mesiya. Wamupekanyizye, ‘nu kumuswefya na manzi aya umwi zwi lyakwe Leza.’ Nawinga wii “uwa muzilo nupya uwaula indema.” (Efes. 5:26, 27) Nawinga alinzile ukuzwala ivyakuzwala ivisuma ivya pa winga. Nupya umu cumi, “Ilaya lyakwe lyasumwa nu usavu wakwe goldi,” nupya “wino yatwalanga uku mwene, ali wiyo wino azwite ilaya lya maala apusane pusane” nupya pa winga umwana wa mfwele, “Watazumiliziwa ukuzwala ivyakuzwala ivitiswe, ivya usaka, nupya ivisuma, pano ivyakuzwala ivisuma vikapiliula imilimo ilungame iya yantu ya muzilo.”—Kuso. 19:8.
I Vyani Vino Ibuku Lya Kusokolola Lyalanda Ivilacitika Uku Nkoleelo?
10 Uzye Yeova alacita uli lino antu yakwe yalazanzwa? Walanda ukuti: “Icipyu cane cilalunkuma wa moto.” (Ezek. 38:18, 21-23) Lyene umu Kusokolola cipande 19 mukalondolola icilacitika. Yeova alatuma Umwanakwe uku kucingilila antu yakwe nu kucimvya alwani yao. Yesu alaombela pamwi na “asilika amwi yulu” kuli kuti ya malaika na 144,000 ku kulwisya alwani yaayo. (Kuso. 17:14; 19:11-15) I vyani lyene ivilacitika umu nkondo ii? Utuungwe na antu asiuvwila Yeova yalononwa!—Belengini Kusokolola 19:19-21.
11 Elenganyini vino cilaya uku yantu akatwalilila ukuya acumi alikala pano nsi lino alwani yakwe Leza yalononwa! Nanti cakuti ukwi yulu kulaya sana uluzango lino Babiloni Mukalamba alononwa, kwaya na cuze icilalenga ukuti ukwi yulu kukaye sana uluzango. (Kuso. 19:1-3) I cintu icicindamisye icalandwa umwi buku lya Kusokolola, kuli kuti “uwinga wa mwana wa mfwele.”—Kuso. 19:6-9.
12 A lilaci lino kulaya uwinga wa Mwana wa Mfwele? Ya 144,000 yalaya ukwi yulu lino inkondo ya Amagedoni itali itandike. Nomba iyo, italaya aali insita iyakuti kuye uwinga wa Mwana wa Mfwele. (Belengini Kusokolola 21:1, 2.) Uwinga wa Mwana wa Mfwele ulayako pa cisila ca nkondo ya Amagedoni nupya lino alwani yakwe Leza yonsi yononwa.—Masa. 45:3, 4, 13-17.
it-2 ifwa 1169
Nkondo
Pa cisila ca nkondo, umu nsi mulaya umutende pa myaka iingi. Ibuku lya masamu lyalanda ukuti “[Yeova] akalesya inkondo pano nsi yonsi. Akakontola amalapwa, avunola masumo nu kusumbila visyangu apa moto mpaka ivipya.” Vii vyafikiliziwe umuku wa kutandikilako lino Yeova ononyile ivyanzo vya yalwani aa Ina Izlaeli, nupya cii calenzile umu mpanga ya Izlaeli muye umutende. Lino Klistu alacimvya alwani yakwe pa nkondo ya Amagedoni, antu mu nsi yonsi yalaipakizya umutende. (Masa. 46:8-10) Antu aalaya nu umi wa pe ayayo aalasula “ya panga yao ukuya ya pulao na masumo yao ukuya ivya kutungwilako imiti.” Nupya kutalaya “ukusambilila ivyankondo.” “Pano Yawe Wamaka yonsi uwatavwanga vintu vii.”—Eza. 2:4 NWT; Mika 4:3, 4.
Ukuvwikisya Sana Ivyaya Umu Malembo
I Vyani Ivilafumiziwapo Lino Uwene Wakwe Leza Uliza?
9 I vyani ivilapyanikiziwapo lino utuungwe twamafisakanwa tulafumiziwapo? Pacisila ca Alamagedoni, uzye kulaya akaungwe akali konsi? Baibo ikatunena ukuti: “Lelo swemo tukalolela vino Leza watulaya, mayulu apya ni nsi ipya, muno mulaya kuteekwa na Leza.” (2 Pet. 3:13) Mayulu ampiti ni nsi, tuungwe twamafisakanwa alino na antu yonsi akatungululwa na vii vilafumiziwapo. I vyani lyene ivilapyanikiziwapo? Mazwi akuti “mayulu apya ni nsi ipya” yakapiliula ukuti kulaya uteeko upya na antu yaayo alateekwa nu uteeko kwene uwo. Uteeko uulateekwa na Yesu Klistu ulalanga imiyele isuma yakwe Yeova Leza, ataaya ni cimvulunganya. (1 Kol. 14:33) Fwandi mu “nsi ipya” mutalaya icimvulunganya. Kulaya aonsi alasakamala imilimo yonsi iya pano nsi. (Masa. 45:16) Yalatungululwa na Klistu alino na ya 144,000 aalateeka pamwi na Yesu. Elenganyini insita ino utuungwe twamafisakanwa tulapyanikiziwapo nu uteeko onga, uwa mutende, muno mutalaya mafisakanwa!
JUNI 10-16
IVYUMA IVYAYA UMWI IZWI LYAKWE LEZA
Mwe Yavyazi—Mwaazwa Ulupwa Lwinu Kutaila Sana Yeova
Kupepa Ukwa Cumi Kungamwazwa Ukuya ni Nsansa
11 Tukapepa Yeova lino tukusambilila Izwi lyakwe nu kusambilizyako ana itu pali aliwe. Pa wanda wi Sabata, aina Izlaeli yataombanga imilimo ili yonsi, fwandi yaomvyanga uwanda uwa uku kukomya ucuza wao na Yeova. (Kufu. 31:16, 17) Aina Izlaeli aali acisinka yasambilizyanga ana yao pali Yeova na pa usuma wakwe. Na ndakai kwene, tulinzile ukulakwatako insita iya kubelenga nu kuisambilizya Izwi Lyakwe Leza. Ukucita vivyo, inzila iya kupepelamo Yeova nupya kukatwazwa ukupalama kuli aliwe. (Masa. 73:28) Nupya nga tukusambilila Baibo pamwi nu lupwa, tungazwa ana itu ukukwata ucuza usuma na Tata witu uwa kwi yulu uwaya nu kutemwa.—Belengini Masamu 48:13.
w11 3/15 ifwa 19 mapa. 5-7
Vingalenga Mwaya ni Nsansa
‘Tantamini imilongo, muzinguluke umusumba wa Zioni mufume mukupenda amalinga yakweo. Mwalolekesya sana iviumba nu kuceeceta malinga pakuti muce mwalondolwela inkulo iziliza uku cisila.’ (Masa. 48:12, 13) Kimba wa masamu wakomelizye Aina Izlaeli ukuti yakalole umusumba wa Yelusalemu. Elenganyini pali vino Aina izlaeli aayanga ku musumba wa muzilo mu kuzevya ukwayangako cila mwaka yaipakizyanga ukusimikila indupwa zyao pi tempele ilya lulumbi. Yafwile yalondesyanga ukuti yakalondolweleko “inkulo iziliza uku cisila.”
Elenganyini pali namwene waku Syeba, wino pa kutandika wakanyile ukuzumila pali vino Solomoni watungululanga na pa mano yano wakweti. I cani calenzile azumile ukuti vintu vino uvwile vyali vya cumi? Na mwene wa ku Syemba ‘atazumile vino uvwile’ watile “suka lyene vino nailolela na manso yane nemwisikulu.” (2 Mila. 9:6) I cacumi ukuti vino ‘twailolela na manso itu’ vingatufika pa mwenzo.
Uzye avyazi yangazwa uli ana yao ukuilolela ivintu vyakuzungusya ivyaya umwi uvi lyakwe Yeova? Ndi cakuti iofesi lya musambo lyakwe Ya Nte Yakwe Yeova lyayela mupiipi na kuno mukaikala, mukapekanye ukuti mukatandaleko. Wakwe, kuno ya Mandy na ya Bethany yakulile, kwatalimfile ma kilomita 1,500 kufika ku Bethel iyayelile ku mpanga yao. Fwandi avyazi yao yapekanyanga ukuya mukutandalako pa miku iingi, sana sana pa nsita ino ana yao akazyana yayanga yakukula. Yalanzile iyati “Lino tutatala twaya ku Bethel, twelenganyanga ukuti kukauvwisya ukasu nupya kukaya sile akote. Nomba lino twaileko twazanyile acance aaombesyanga alino nu kuipakizya lino yakuombela Yeova. Lino twaileko twailolile ukuti fwandi iuvi lyakwe Yeova ilikulu, nupya lyonsi ngatwatandala ku Bethel twakomeleziwanga sana muli vyakwe Leza.” Kuilolela vino iuvi lyakwe Yeova likaomba kwalenzile ya Mandy na ya Bethany kutandika upainiya, nupya yayamileko mukwazwilizyako pa Bethel.
w12 8/15 ifwa 12 pala. 5
Twalililini Ukuya Aikazi ya Wene!
5 Mwasambilila Ivingi. Muntu akulonda ukuya umwikazi wa mpanga imwi alinzile ukusambilila vimwi pa mpanga iyo. Kukolanako na vii, umuntu akulonda ukuya umu Wene Wakwe Leza alinzile ukusambilila ivingi pa Wene uu. Katulande pali vino ana yakwe Kola aaombelanga mu Izlaeli yacisile. Yatemilwe sana umusumba wa Yelusalemu ni ncende ino yapepelangapo nupya yasimikanga ivingi pa musumba kwene uu. Asi mawe nanti ndaka vino yaomvizye pa kukuula ali vino yatemilwe sana, lelo icintu cino yatemilwe sana umusumba na vino incende iyakupepelapo imililangako. Yelusalemu uwali ali umusumba wa Mwene umukulu Yeova, pano ali ncende pano yapepelanga Leza wa cumi, nupya ikwene aali ncende ino yasambililangapo Masunde Yakwe Yeova. Alino Yeova walanganga icikuuku ku yantu yano umwene wa mu Yelusalemu watekanga (Belengini Masamu 48:1, 2, 9, 12, 13.) Wakwe vino ana yakwe Kola yacisile, uzye namwe mukaitemelwa ukusambilila nu kulalanda pi uvi lyakwe Yeova lya pano nsi? Nga mwasambilila ivingi pi uvi lyakwe Leza na vino akaazwa antu yakwe, mulataila sana Uwene Wakwe Leza. Nupya mulalondesya ukusimikila ilyasi lisuma ilikalanda pa Wene Wakwe Leza.—Yele. 9:24; Luka 4:43.
Ukuvwikisya Sana Ivyaya Umu Malembo
it-2 ifwa 805
Ukankala
Vino amuluko lwa Ina Izlaeli yali aakankala yaipakizyanga ivyakulya alino ni vyakumwa (1 Yamw. 4:20; Kasa. 5:18, 19;), nupya vino yali aakankala calenzile yacingililwe ku ntazi zikaiza pa mulandu ni cipowe. (Mapi. 10:15; Kasa. 7:12) Lelo nanti icakuti vino Aina Izlaeli yaipakizyanga pa mulandu nu kuombesya kwao vyali ukulonda kwakwe Yeova (loliniko na Mapi. 6:6-11; 20:13; 24:33, 34), wayacelwile na pa viipe ivingacitika ndi cakuti ilila ukuti Yeova ali Ntulo ya vintu visuma vino yakweti, nupya yatandika ukutaila ivyuma kwene vivyo. (Malan. 8:7-17; Masa. 49:6-9; Mapi. 11:4; 18:10, 11; Yele. 9:23, 24) Waiwisye nu kuti ivyuma vino yakweti ivya pa kasita sile kanono (Mapi. 23:4, 5), vitange vipeelwe kuli Leza wi lambo pakuti vipususye umwi ku mfwa (Masa. 49:6, 7), nupya vitacindama ku yantu afwe (Masa. 49:16, 17; Kasa. 5:15). Nupya yayiwisyeko nu kuti kucindikisya sana ivyuma kungalenga yacita iviipe nupya Yeova angata ukuyatemwa. (Mapi. 28:20; loliniko na Yele. 5:26-28; 17:9-11.) Nupya yayakomelizye ukulacindika “Yeova lino yakutuula icuma cao.”—Mapi. 3:9.
JUNI 17-23
IVYUMA IVYAYA UMWI IZWI LYAKWE LEZA MASAMU 51-53
Vino Mungacita Pakuti Mutaluvyanya Sana
Uzye Mungacita Uli Pakuti Musunge Umwenzo Winu?
4 Izwi ilyaya pa Mapinda 4:23, ilyakuti “umwenzo” likapiliula untu wa mukasi. (Welengini Masamu 51:6.) Umu mazwi yauze tungati “umwenzo” ukapiliula melenganyo ya pa lwitu, vino tukayuvwa, nanti vino tukalondesya ukucita. Fwandi umwenzo asi vino tukaloleka lelo aviivi vino twaya umukasi.
5 Ukwelenganya pali vino tukasunga umi witu kungatwazwa ukumanya umulandu uno cacindamila ukumanya vino twaya umukasi. Ica kutandikilako, pakuti twasunga ningo imiili itu tulinzile ukusoolola ivya kulya ivisuma, nupya tulinzile ukulatukusya umwili ilingi. Vivyo kwene avino caya na pakuti tuye ya cuza yasuma na Leza, tulinzile ukuwelenga Baibo ni mpapulo izikalanda pali Baibo lyonsi nu kulanga ukuti twataila sana Yeova. Mu kulanga utailo uno twakwata mwaya nu kucita vino tukusambilila nu kulanda pa utailo kwene uwo uno twakwata. (Loma 10:8-10; Yako. 2:26) Cakwe ciili, tungelenganya ukuti tuli nu umi usuma ndi twalola sile vino tukuloleka ukunzi nanti icakuti mukasi twalwala. Vivyo kwene avino caya na kuli ukapepa witu, tungatandika ukwelenganya ukuti twaya nu utailo ukome ndi twalola sile vino tukuomba muli vyakwe Leza nomba ala imyelenganyizizye iipe ikuya ikukula umu mwenzo witu. (1 Kol. 10:12; Yako. 1:14, 15) Tulinzile ukwiusya ukuti Satana akalonda ukutonona ni myelenganyizizye yakwe. Angacita uli vivyo? Nupya tungacita uli pakuti tuicingilile?
Mwaya Asanguluke Lyonsi
5 Ndi tukupepa kuli Yeova lyonsi, alatwavwa ukutwalilila ukuya na melenganyo asanguluke. Yeova akaomvya umupasi wa muzilo apa kutwavwa ukuya asanguluke. Lino tukupepa kuli aliwe, tufwile ukumunena ukuti tukulonda amelenganyo itu yaaya asanguluke. (Masa. 19:14) Twaicefya lino tukulenga Yeova ukuti aatwavwa ukumanya nga melenganyo itu yangatulenga ukwifya. (Masa. 139:23, 24) Twalililini ukulenga Yeova ukuti amwavwa ukutaluka imiyele iipe nu kucita ivisuma nanti sile ivintu vyativitala.—Mate. 6:13.
6 Lino tutaatala twasambilila pali Yeova, limwi twacitanga ivintu vino vitamuzanzyanga, nupya limwi tucili tukulwisya ukutaaluka uku viipe. Nomba tutafwile ukutoovoka, Yeova angatwavwa ukusenuka nu kutandika ukucita ivyakumuzanzya. Vikwene i vyacitikile Umwene Devedi, lino wacisile ucende na Batisyeba, walapiile nu kupaapata Yeova ukuti amwelele pakuti aye nu “mwenzo [usanguluke]” nu kuti angamwazwa ukuya ni cuvwila kuli aaliwe. (Masa. 51:10, 12) Naswe kwene ndi twaali ni miyele iipe nupya tutaatala twatalukako, Yeova angatwavwa ukuta imiyele iiyo nupya tungalondesya ukumuvwila nu kucita ivisuma. Yeova alatwavwa ukucimvya amelenganyo aipe.—Masa. 119:133.
Ukuvwikisya Sana Ivyaya Umu Malembo
it-1 ifwa 644
Doegi
Doegi wali umwina Edomu umukalamba wakwe yakacema ya Mwene Saulo. (1 Sam. 21:7; 22:9) Doegi wasenwike pano pa kutandika yamunenyile ukwikala “pa nkoleelo yakwe Yeova” mu musumba wa Nobu, nupya Doegi waweniko kuno Simapepo Mukalamba Aimeleki akupeela Devedi vyakulya nu lupanga lwakwe Golyati, limwi a pa mulandu nu mulapo, pa mulandu wakuti atali umukowele muli vimwi, nanti pa mulandu wakuti atatunganiziwanga nu lwale wakwe tembwe. Nomba pa cisila lino Saulo wamile aomvi yakwe nu kuyaneena ukuti yonsi kwene iyamusangukila, Doegi wasokolwile ivyacitike uku musumba wa Nobu. Lyene lino Saulo wamile simapepo mukalamba alino na ya simapepo yauze aaku Nobu nu kulanda nayo, nupya uzya na Aimeleki, wanenyile aamulindanga ukuti yakakome ya simapepo. Lino yakanyile, Saulo wanenyile Doegi ukuti aliwe ayakome, nupya papokwene sile Doegi wakomile ya simapepo 85. Pa cisila cakuti Doegi wacita icintu cii cipisye, wakomile na ntu yonsi aikalanga umu Nobu umu musumba wakwe ya simapepo, wakomile ance, aikolo kumwi sile ni viteekwa.—1 Sam. 22:6-20.
Wakwe vino mazwi aakalondolola ivyaya umu Masamu 52 yalanda (muli Baibo wa Malembo ya Nsi Ipya), Devedi walemvile pali Doegi ukuti: “Wemo watemwa ukupanga kucitila auzo iviipe, ululimi lwako lukoline nu lwembe ulukalipe, wemo watemwa ukutumpwila auzo. Wemo watemwa iviipe ukuluta ivisuma, watemwa intumpu ukuluta kulanda icumi. Watemwisya kutaka amazwi akanyengula umwenzo, makuole we!”—Masa. 52:2-4.
JUNI 24-30
IVYUMA IVYAYA UMWI IZWI LYAKWE LEZA MASAMU 54-56
Leza Waya Namwe
w06 8/1 ifwa 22 mapa. 10-11
Mwaya na Mano Nupya Mwatiina Leza!
10 Pa nsita imwi, Devedi waile afisama kuli Akisyi umwene wa ku filisiti umu musumba umwikalanga Golyati. (1 Samueli 21:10-15) Aomvi ya mwene yapezile Devedi umulandu wakuti wali umulwani wa mpanga yao. Uzye Devedi wacisile uli lino wakweti intazi yii? Wapefile kuli Yeova. (Masamu 56:1-4, 11-13) Nanti cakuti Devedi waipanzile kwati watapena, wamanyile ukuti Yeova uwamupuswisye pano wapazile vino wacisile. Vino Devedi wataile Yeova nu mwenzo onsi vyalangilile ukuti umu cumi watiinanga Leza.—Masamu 34:4-6, 9-11.
11 Wakwe vino Devedi wacisile, tungalanga ukuti tukatiina Leza ndi cakuti twataila vino watulaya ukuti aakulatwazwa ukuzizimizya intazi. Devedi walanzile ati: “Leka Yeova aakutungulula, umutaile nawe alakwazwa.” (Masamu 37:5) Cii cisikusenula ukuti tulinzile sile ukuneena Yeova ivikutusakamika ukwaula ukucitapo cimwi nu kutandika ukulaelenganya ukuti amaombelapo. Devedi ataalenganga sile uwazwilizyo kuli Yeova ukwaula ukucitapo cimwi. Waomvyanga maka na mano yano Yeova wamupeezile pa kumala intazi zino wakwatanga. Devedi wamanyile icisinka icakuti, asi amaka sile aa muntu aangalenga ukuti ivintu vitunguluke. Fwandi naswe kwene avino tulinzile ukucita. Ndi cakuti twacita vyonsi vino tungakwanisya ukucita, vyasyala tulinzile ukulekela Yeova. Alino kusi cili consi cino tungacita ukucila pa kutaila Yeova. Nupya ndi cakuti tukucita vii ala tukulangilila sile ukuti tukatiina Leza. Tungakomeleziwa nga twelenganya pa mazwi yano Devedi walanzile ukufuma pansi ya mwenzo aakuti: ‘Yeova akasokolwela inkama zyakwe kuli yao akamutiina.’—Masamu 25:14
cl ifwa 243 pala. 9
Kusi ‘Cingalenga Leza Ate Ukututemwa’
9 Nupya Yeova akatemwa ndi cakuti twazizimizya. (Mateo 24:13) Mwaiusya ukuti Satana akalonda ukuti mufutatile Yeova. Wanda uno mwezya ukuya acumi kuli Yeova, ala mukumwazwa ukwasuka Satana aakamuzewanya. (Mapinda 27:11) Insita zimwi cikatala ukuzizimizya. Kulwalilila, kulizya impiya, masakamika aamumelenganyo, alino ni ntazi zyuze vingaezya utailo winu. Alino nga tukulolela icintu cimwi lyene cikulengela ukwiza cingalenga tutoovoke. (Mapinda 13:12) Ndi cakuti tukuzizimizya intazi zyonsi zii cilalenga tuye acindame sana kuli Yeova. Nupya ukwene uli mulandu uno Devedi waneenile Yeova ukuti: “Ukaiusya na minsozi yane. Uzye kwene vitatantikwa umu lupapulo lwako?” (Masamu 56:8) Mu cumi Yeova akalola nu kwiusya minsozi itu nu kucula konsi kuno tukacula pa kuzizimizya intazi lino tukutwalilila ukuya aacumi kuli aliwe. Nupya vyonsi vii vyacindama sana kuli aliwe.
Vino Ukutemwa Kukatwazwa Ukuta Ukuya ni Ntete
16 Satana wamanya ukuti twatemwa sana umi witu. Nupya akalanda ukuti tungazumila ukuta ukuya ya cuza yakwe Yeova pakuti sile tutwalilile ukuya nu umi. (Yobo 2:4, 5) Nomba vino Satana akalanda i vya ufi. Lelo pa mulandu wakuti wakwata “maka ya kuleta imfwa” akaezya na maka ukututiinya pakuti tute ukuombela Yeova. (Aeb. 2:14, 15) Insita zimwi antu yano Satana akaomvya yakaezya na maka ukututiinya ukuti yamatukoma ndi cakuti tutatiile ukuombela Yeova. Insita zimwi Satana angalola ukuti tukulondekwa ukulwaziwa, nupya angaomvya inzila kwene iyo pakuti sile tute ukuombela Yeova. Ya dokota nanti ya lupwa aasi ya kapepa yangatupatikizya ukuti twikilwemo uwazi, kucita vivyo kungalenga tutame masunde yakwe Leza. Nanti umwi angatupatikizya ukuti tuzumile imilwazizye iisiuvwana na vino malembo yakalanda.
17 Nanti cakuti tusilonda ukufwa, twamanya ukuti Yeova atalata ukututemwa nanti cakuti twafwa. (Belengini Loma 8:37-39.) Ndi cakuti ya cuza yakwe Yeova yafwa, akatwalilila ukuiusya kwati sile yacili nu umi. (Luka 20:37, 38) Akalondesya ukuyatuutulula. (Yobo 14:15) Yeova walipila umutengo ukulu sana pakuti sile tuye “nu umi wa pe.” (Yoa. 3:16) Twamanya ukuti Yeova watutemwa sana nupya akatusakamala. Fwandi ukucila ukuta ukuombela Yeova lino twalwala nanti lino yamwi yatutiinya ukuti yamatukoma, tukalenga kuli aliwe ukuti atuteekezye nu kutupeela mano na maka. Vikwene avino ya Valeli na ya iya yacisile.—Masa. 41:3.
Ukuvwikisya Sana Ivyaya Umu Malembo
it-1 mafwa 857-858
Kumanyila Limwi nu Kusolwela Limwi Ivya ku Nkoleelo
Vino Yuda wakanyile ukuya uwacisinka vyafikilizye usowelo wakwe Leza, nupya vyalangilile vino Yeova na Yesu yakamanyila limwi ivya ku nkoleelo. (Masa. 41:9; 55:12, 13; 109:8; Mili. 1:16-20) Nomba tutanga tulande ukuti Leza wasolwile limwi ukuti Yuda wali nu kufutuka Yesu. Usowelo walanzile ukuti cuza umwi umupalamisye wali nu kufutuka Yesu, lelo usowelo uu utalanzile mukulungatika wino wali nu kufutuka Yesu. Nupya visinte vya muli Baibo vikalangilila ukuti Leza atasolwelile limwi Yuda ukuti akacite vino wacisile. Mutumwa umwi walemvile muli Baibo ukuti: “Utaika zuwa makasa pa muntu ali wensi; nupya utaakumwako uku membu zya yantu yauze; uwaisunga umusanguluke.” (1 Tim. 5:22; loliniko na 3:6.) Pakuti Yesu alangilile ukuti wisileko sana mano lino akusoolola atumwa 12, wapefile usiku onsi kuli Isi lino atatala wayasoolola. (Luka 6:12-16) Ndi cakuti Leza wasolwelile limwi ukuti Yuda uwali nu kufutuka Yesu, cii cali nu kulangilila ukuti utunguluzi wakwe Leza utaya ningo, nupya ukulinga ni sunde cali nu kulangilila ukuti nawe kwene wayembwike.
Nomba cikaloleka ukuti pa nsita ino Yuda wasololwanga ukuya umutumwa, mu mwenzo wakwe mutali vili vyonsi vyalangililanga ukuti wali ni miyele iipe ingalenga afutuke umwi. Walesile ukuti aye “umusisi wakwe poizoni” nu kuyonona, icakuti wafizilwe ukulondela masunde yakwe Leza, lelo walesile ukuti Ciwa amulenge ukuya ni miyele iipe pano watandike ukwiya impiya mu kambokosi. (Aeb. 12:14, 15; Yoa. 13:2; Mili. 1:24, 25; Yako. 1:14, 15; lolini YUDA Na. 4.) Lino imiyele iipe yakuzile muli aliwe, Yesu wamanyile ivyali mu mwenzo wakwe Yuda nu kuti uwali nu kumufutuka.—Yoa. 13:10, 11.