VINO TUNGACIMVYA ULUPATO

2 | Mutaalandula

Vino Baibo Ikasambilizya:

“Mutawezezya uyi pa uyi. . . . Ndi cakuti cingacitika, mwaezya apapezile amaka inu ukuya amutende ku yantu yonsi. Mutaalandula, . . . Pano Yeova walanda ukuti: ‘Icilanduzi i cane; nene ndalandula.’”—LOMA 12:17-19.

Vino Cikapiliula:

Nanti cakuti tukauvwa uyi nga yamwi yatucitila iviipe, Leza asilonda ukuti twalandula pa viipe vivyo. Lelo akatukomelezya ukuti twaloleela pali aliwe pano likwene sile ali nu kufumyapo iviipe vyonsi.—Masamu 37:7, 10.

Vino Mungacita:

Ndi cakuti antu aatamalilika yakulandula, cikalenga ukuti ulupato lwakulilako. Fwandi nga yamwi yamusosya nanti yamucitila iviipe mutalandula. Mwaezya ukuya amutende nupya mwaikaanya. Insita zimwi, cingaya ningo ukusuulako sile kuli vino iyamucitila. (Mapinda 19:11) Kwene, insita zimwi zyene caya ningo ukusokolola ivyativicitika. Wakwe, nga yamwi iyamutala umulandu, mungasoololapo ukunena ya kapokola nanti aomvi yauze aa mu uteeko.

Kulandula kukaletelela

Nomba nga ndi cakuti mukuyuvwa ukuti kusi inzila isuma ino mungamalilamo intazi iyo? Nanti limwi imwezya apapezile amaka inu ukuombela pa ntazi iyo mu nzila isuma, mungacita uli? Mutalinzile ukulandula. Pano ukucita vivyo kungalenga sile ukuti vintu viipileko. Nomba nga mutalandwile mungacimvya ulupato. Mungataila ukuti Leza angamwazwa ukumala intazi. ‘Mwamutaila, nawe alamwazwa.’—Masamu 37:3-5.

Ivyacitikile Yamwi—YA ADRIÁN

Iizile Iyata Ukulandula

Lino ya Adrián yali alumendo, izile iyaya sana nu unkalwe nupya yali nu lupato, alino yalondanga nu kulandula pa viipe vyonsi vino yayacitila. Yalanzile iyati: “Insita izingi nalwisyanyanga na antu ukuomvya imfuti nupya imiku ingi nacisikanga sana icakuti nayanga sile umupiipi nu kufwa.”

Ya Adrián yatandike ukusambilila Baibo ala yali ni myaka 16. Yalanzile nu kuti: “Lino nayanga nkusambilila Baibo, naweni ukuti nalondekwanga ukusenuka muli vino nacitanga.” Yalondekwanga ukuta ukuya nu lupato nu unkalwe. Nupya yatemilwe sana vino Baibo ikalanda pa kulandula, ivyaya pali Loma 12:17-19. Yalanzile ukuti: “Nizile insininkizya ukuti Yeova alafumyapo ulufyengo ukulingana na vino akalonda nupya pa nsita ino wasoolola. Lyene panono panono, nizile inta ukuya nu unkalwe.”

Uwanda umwi usiku, iumba limwi ilya yalumendo yano yalwisyanyanga na ya Adrián mpiti, lyaile umu kuyalwisya. Lyene uwatungululanga iumba lilyo wapunzile ati: “Iza tulwisyanye!” Ya Adrián yalanzile ukuti: “Natandike ukulondesya ukulwisyanya nayo.” Nomba ukucila ukutandika ukulwisyanya, yapefile ipepo iliipi kuli Yeova nupya yafumile ukwi umba lilyo.

Ya Adrián yalondolwile nu kuti: “Wanda uwalondelilepo naweni uwatungululanga iumba ilya yalumendo yaya ala ali wenga. Lino namuweni, nasosile sana icakuti nalondanga nu kulandula, lelo nupya kwene napefile kuli Yeova pakuti angazwe kuti ntacita iviipe vino nalondanga ukucita. Nazungwike lino umulumendo wiyo wizile kuli nene nu kunena ukuti: ‘Unjelele pali vino twacisile mutondo. Cisinka icakuti, nkulonda ukuya wakwe wewe. Nupya nkulonda ukulasambilila Baibo.’ Nali sana ni nsansa pa mulandu wakuti ntatwalilile ukuya ni cipyu. Alino ukucita vivyo, kwalenzile ukuti ntandike ukusambilila Baibo nu mulumendo wiya.”