Mauzyo Yano Aakabelenga Yakauzya
A lilaci lino umulimo wa kusimikila ulasila?
Yesu walanzile ati: “Ni lyasi lisuma lii ilya Wene lilasimikilwa umu nsi yonsi ukuya unte ku yantu amu nko zyonsi, lyene alino impela iliza.” (Mate. 24:14) Izwi lya Cigliki lino yasenula ukuti “impela” umu cikomo cii, ni vikomo 6 na 13, a teʹlos. Izwi lii likalozya uku mpela ya nsi yakwe Satana pa Amagedoni. (Kuso. 16:14, 16) Cii cikupiliula ukuti tulatwalilila ukusimikila api lyasi lisuma ilya Wene ukufika lino Amagedoni ilatandika. Ulondolozi uu iusenula vino twamanyile mpiti.
Mpiti twamanyile ukuti tulata ukusimikila lino ucuzi ukalamba ulatandika nu kononwa kwakwe Babiloni Mukalamba. (Kuso. 17:3, 5, 15, 16) Twamanyile ukuti ivintu vii i vilalangilila impela ya “mwaka uwakuti Yeova alange uluse.” (Eza. 61:2) Twamanyile nu kuti aalapusuka ucuzi ukalamba a yayo aombelanga Yeova na ucisinka lino ucuzi ukalamba utatala watandika. Twayakolanyanga uku Yayuda apuswike lino umusumba wa Yelusalemu ononyilwe umu 607 B.C.E. Ayuda yaa yasizilwe kasilwa akalangililanga ukuti yaombelanga Yeova na ucisinka nupya yapasile iviipe lino Yelusalemu atatala ononwa. (Ezek. 5:11; 9:4) Lelo vii vyapusana na vino Yesu walanzile pali Mateo 24:14 apakalangilila ukuti antu yalakwata ishuko ilya kukutika ukwi lyasi lisuma kufikila lino impela ilatandika pa Amagedoni.
Vino ituvwikisha amazwi aya pali Mateo 24:14 ivisenula vino twamanyile api lyasi ilyaya wa mvula ya mawe ilyasowilwe pali Kusokolola 16:21. Ivisinka na vyuze vikalangilila ukuti malembo yaa yoili yalemana. Yalemana uli? Vino Baibo yalanda pali vino antu yakacita ndi cakuti yuvwa ilyasi lisuma, i vikalenga tuzane icasuko ukwi uzyo lii. Umutumwa Paulo walemvile ati ilyasi lisuma lyaya ‘wa vinunkile kuli yayo aakupusuka.’ Lelo uku yalwani yakwe Leza lyaya wa ‘vinunkile vya mfwa ivikatungulula uku mfwa.’ (2 Kol. 2:15, 16) Antu yaa yapata ilyasi lya Wene pa mulandu wa kuti likasokolola iviipe vino yakacita, ukuti insi ikatungululwa na Satana nu kuti likwene sile insi ili nu kononwa.—Yoa. 7:7; 1 Yoa. 2:17; 5:19.
Nupya mulinzile ukwiusha ukuti imvula ya mawe iya unkolanya ilaya i cinkunka “ciipisye sana.” Cii kupiliiula ukuti lino kulaya ucuzi ukalamba, umulimo wa kusimikila ulaombwa sana pakuti izina lyakwe Yeova likamanyikwe sana. (Ezek. 39:7) Apa nsita iya, pa cisila cakuti Babiloni Mukalamba ononwa, uzye yamwi yalatemwa ilyasi lisuma wakwe vino yangatemwa ivintu vinunkile? Cingaca cicitike. Limwi yaliusha nanti ukwiluka ukuti pa myaka iingi Ya Nte Yakwe Yeova yasimikilanga ukuti ukupepa kwa ufi kuli nu kononwa.
Vii vyakolana ni vyacitiike umu Ijipti pa cisila ca Vinkunka 10. Pa cisila cakuti Yeova wapingula “ya leza yonsi amu ijipti, . . impendwa ikalamba iya yantu yauze” aatali Aina Izlaeli nayo kwene yapisile nayo. (Kufu. 12:12, 37, 38) Antu yaa yafwile yasoolwilepo ukupita na antu yakwe Yeova pa cisila ca kulola ukuti vinkunka vyonsi 10 vino Mose walanzile vyacitika.
Yonsi alasoolola ukuya ku lusansa lwakwe Yeova pa cisila ca kulola kuno Babiloni Mukalamba ononwa yalakwata ishuko lya kutungilila aina yakwe Klistu alayako pano nsi pa nsita iya. (Mate. 25:34-36, 40) Ukuya kwene, ishuko lya kupingulwa ukuti i mfwele lilasila lino kwashala panono ukuti Amagedoni itandike lino apakwe aasyala pano nsi yalapokelela icilambu cao ica kwi yulu.
Ulondolozi uu ukulangilila vino Yeova wakwata sana ukutemwa nu luse. “Asilonda umuntu ali wensi akononwe lelo akalonda antu yonsi yalapile.”—2 Pet. 3:9