Nizile Inja Mishonali Nanti Cakuti Nali ni Nsonyi

Naviilwe umu 1951 umu Vienna uku Austria, umu lupwa ulwapepanga uku Katolika. Nali ni nsonyi, lelo nataile muli Leza nupya napepanga lyonsi. Lino nali ni myaka 9, ya tata yizile iyatandika ukusambilila na Ya Nte Yakwe Yeova nupya patalengile ya mayo nayo kwene izile iyatandika ukusambilila.

Patalengile, twizile itutandika ukulongana umu Cilongano ca Döbling umu Vienna. Twacitilanga ivintu pamwi. Wakwe, twabelenganga nu kusambilila Baibo pamwi, kuzanwa uku kulongana, alino nu kwazwilizyako apa maukongano ya viputulwa. Lino nali umwance, ya tata yangazwile ukutemwa sana Yeova. Nupya lyonsi ya tata yapepanga ukuti nemo na kaci wane tukaye ya painiya. Lelo ukuya painiya, utaali uyo wane.

NATANDIKA UMULIMO WA NSITA YONSI

Nabatiziwe umu 1965, ala indi ni myaka 14. Lelo cantalilanga ukusimikila uku yantu yano ntamanyile. Nalolanga nu kuti acance yanji yacindime ukuncila nupya nalondanga ukuti yantemwe. Fwandi patalengile ukufuma pano nabatiziwilwe, nizile intandika ukuzanwa sana na antu aataombelanga Yeova. Nanti cakuti natemilwe ukuzanwa pamwi nayo, kampingu yancuzyanga pano nasumbanga insita ikulu ala indi na antu ataali ya Nte. Lelo cantalile ukuta ukuzanwa nayo. I vyani ivyangazwile?

Pa nsita kwene iya, umukazyana uwali ni myaka 16 uwizina lyakuti Dorothée wakuukile umu cilongano citu. Natemilwe sana ukulola vino watemilwe umulimo wa kusimikila uku ng’anda ni ng’anda. Namucizileko imyaka, nomba ntaali umucincile umu mulimo wa kusimikila. Nelenginye inti: ‘Nemo avyazi yane aa Nte, lelo Dorothée wene ali wino wali sile Nte umu lupwa. Akaikala na ya nyina aalwala, lelo lyonsi akaya umu kusimikila.’ Vino wacitanga vyalenzile nalondesha ukulaombesha umu mulimo wakwe Yeova. Patalengile, Dorothée nani twizile itutandika ukulaombela pamwi upainiya. Pa kutandika twali ya painiya ya nsita inono, lyene twizile ituya ya painiya ya nsita yonsi. Vino Dorothée waipakizyanga ukusimikila, calenzile nani kwene ntandike ukuipakizya. Wangazwile ukutandika isambililo lya Baibo ilya kutandikilapo. Lino papisile insita, cizile citandika ukunjangukilako ukulanzyanya na antu pa mang’anda yao, mu miseo, alino nu ku ncende zyuze.

Umu mwaka kwene uno natandikilemo upainiya wa nsita yonsi, umwina Heinz uwa ku Austria wizile umu cilongano citu. Wasambilile icumi uku Canada lino waile umu kutandalila umwina wakwe uwali Nte. Ya Heinz yayatumile umu kuombela umu cilongano citu umu Vienna nga painiya umuiyele. Lino nayaweni sile, nayatemilwe. Lelo yalondeshanga ukuya ya mishonali, nomba nemo ntalondanga. Pa kutandika, nafisile vino nayuvwanga pali aliyo. Lino papisile insita, twizile itutandika ukwizizyanya nupya twatwaliine, itwiza itutandika nu kuombela pamwi upainiya umu Austria.

NATANDIKA UKULONDA UKUYA MISHONALI

Ilingi ya Heinz yalandanga pali vino yalondeshanga ukuya mishonali. Nanti cakuti yatampatikizyanga, yanguzyanga mauzyo aalenganga naelenganyapo sana. Mauzyo wakwe, “Uzye vino tutakwata ana, tutanga tuombeko imilimo na yuze umu mulimo wakwe Yeova?” Pa mulandu wakuti nali ni nsonyi, ntalondanga ukuya mishonali. Nanti cakuti nali painiya asi mulandu ni nsonyi zino nakweti, nelenganyanga ukuti ukuya mishonali kwali nu kuntalila sana. Lelo ya Heinz yatwalilile ukungazwa pakuti naelenganya pa kuya mishonali. Yankomelezyanga ukuti ntaika mano kuli vino nali ni nsonyi lelo naelenganya pali vino ningazwa yauze. Vino yanenanga vyangazwile sana.

Panono panono natandike ukulondesha ukuya mishonali, fwandi tuzizye ukuya ukwi Sukulu lya Gilyadi. Lelo umuomvi wa pa musambo wanenyile ukuti inkoleelo ndinzile ukusambilila ukulalanda ningo Icizungu. Pa cisila ca kusambilila ukulanda Icizungu pa myaka itatu, twazungwike lino izile iyatutuma uku cilongano icaomvyanga ululimi lwa Ciyugoslavia icayelile umu Salzburg, umu Austria. Twaomvile imyaka 7 uku ncende iya nu mwaka onga umu mulimo wa kutandalila ivilongano. Lulimi luu lwali u lutale, lelo twakweti masambililo aingi.

Lyene umu 1979 yatunenyile ukuya mu kutandala uku Bulgaria. Walanga yainda umulimo witu umu Bulgaria. Yatatuzumilizye ukuyasimikila kuku, lelo twasenzile sile impapulo izinono izya kuyapeela ya nkazi 5 aikalanga umu Sofia, umusumba ukalamba umu Bulgaria. Nuvwile intete, lelo Yeova wangazwile ukuomba umulimo uu. Ukulola vino ya nkazi yaya yali asipe ni nsansa zino yakwatanga asi mulandu ni ntazi zino yali nu kukwata ndi cakuti yayalema, kwangazwile ukuipeelesha ukuomba umulimo uli onsi uno iuvi lyakwe Leza lyampeela.

Lino papisile insita, twizile ituuzya ukuti tukazanwe ukwi Sukulu Lya Gilyadi nupya umuku uu wene yatuzumilizye. Swemo twelenganyanga ukuti tulaya uku Sukulu Lya Gilyadi ilya Cizungu uku United States. Lelo umu Novemba 1981, Isukulu Lya Gilyadi lyatandike ukuyela na pa musambo wa mu Wiesbaden mu Germany. Nupya pa mulandu wa kuti isukulu lyayelile umu Cigerman, cangangukiile ukuvwikisha. Uzye aekwi kuno yali nu kututuma?

KUOMBELA UMU MPANGA UMWACITIKANGA SANA INKONDO

Yatutumile ukuya mu kuombela ku Kenya. Lelo iofesi lya musambo umu Kenya lyatuzizye ndi cakuti tungaitemelwa ukuya umu kuombela ku Uganda. Imyaka 10 uku cisila, Idi Amin uwali umusilika waposile uteeko umu Uganda. Imyaka iyalondelilepo, uteeko wakwe walenzile antu aingi sana ukufwa. Lyene umu 1979, antu aapasile uteeko wakwe Idi Amin yamuposile uteeko. Fwandi munguvwikisha umulandu uno nali sana ni ntete ukuya mu kuombela uku mpanga ya musango uu. Lelo Isukulu Lya Gilyadi lyatwazwile ukutaila sana Yeova. Fwandi twazumiile.

Imikalile yatazile umu Uganda. Uteeko wafilwanga ukupeela antu amanzi, malaiti, alino ni vintu vyuze. Mafoni yataombanga. Antu yapikanga antu yauze nu kuiila ivintu, sana sana usiku. Fwandi ndi kwafita antu iikalanga umu mang’anda nu kupepa ukuti kutaya uwakwiya ivintu vyao nanti ukuyakoma. Asi mulandu ni ntazi zii, aina na ya nkazi umu Uganda yatwalilile ukuya nu utailo ukome.

Umu 1982, nemo na ya Heinz twafisile umu Kampala, umusumba ukalamba umu Uganda. Pa myezi 5 twikazile umu ng’anda yakwe ya Sam na ya Christina Waiswa pamwi na ana yao 5 alino na ya lupwa yao 4. Umwina na nkazi Waiswa nu lupwa lwakwe yalyanga sile umuku onga, lelo yaitemilwe ukutupokelela. Apa nsita ino twikazile nu lupwa lwakwe ya Waiswa, nemo na ya Heinz twasambilile ivintu ivingi ivyatwazwile muli umishonali. Wakwe, twasambilile ivya kufulala ukuomvya sile manzi anono alino nu kuomvya manzi yayo uku kuzifizya icimbusu. Umu 1983, nemo na ya Heinz twazanyile ing’anda iyali icingililwe umu Kampala.

Twaipakizyanga umulimo wa kusimikila. Nkwiusha ukuti umu mwezi sile onga twapeezile antu magazini ukucila pali 4,000. Lelo icatuzanzyanga u kulola kuno antu yalondeshanga ukusambilila cumi. Yacindike Leza nupya yalondanga ukulanda nayo pali Baibo. Ya Heinz nani twakweti masambililo 10 ukufika kuli 15 cila muntu. Nupya twasambilile ivingi uku yasambi itu. Wakwe, nanti cakuti yapitanga ulwa pansi ukuya nu kuwela uku kulongana, yatatazile iyailizyanyapo nupya lyonsi yayanga ni nsansa.

Umu 1985 nu mu 1986, kwizile ikuya inkondo na zyuze ziili umu Uganda. Twalolanga ana anono ala iyasenda izya mfuti. Yayaomvyanga nga asilika nupya aliyo yasoololanga aangapita umu miseo. Pa nsita iya, twalenzile kuli Yeova ukuti atwazwe ukuya na mano lino tukusimikila pakuti tutaya umu uzanzo. Nupya Yeova waswike mapepo itu. Insita zingi twatanga ukuvwa intete ndi cakuti twazana antu aakulonda ukuvwa ukwi lyasi lisuma.

Twaipakizyanga nu kusimikila uku yantu afumanga uku mpanga zyuze. Wakwe, twatandike ukusambilila Baibo na ya Murat na ya Dilbar Ibatullin, atwalane afumile uku Tatarstan (ku Central Russia). Ya Murat yali aa dokota. Yonsi yoili izile iyabatiziwa nupya yatwalilila ukuombela Yeova na ucisinka. Lyene, nizile imanyana na ya Tatjana Vileyska, umwanaci uwafumile uku Ukraine uwalondanga ukuikoma. Pa cisila cakuti ya Tatjana yabatiziwa, yaswilile uku Ukraine nupya lino papisile insita izile iyaya ya kasenula ya mpapulo zitu.a

UMULIMO UPYA

Umu 1991 lino nemo na ya Heinz twaile umu kutandala uku Austria, aaku musambo wa ku Austria yatunenyile ukuti twali nu kupokelela umulimo upya uwa kuya umu kuombela uku Bulgaria. Pa myaka imwi yainzile umulimo wa kusimika umu mpanga zimwi izya mu Europe, ukwikapo sile nu mu Bulgaria. Lelo pa nsita yii ala ivintu vyasenuka nupya ala Ya Nte Yakwe Yeova yayazumilizya ukulasimikila umu mpanga zizyo. Wakwe vino inalanda, ya Heinz nani twatwazilepo impapulo umu Bulgaria mu umfisolo lino umulimo wainzilwe. Nomba pa nsita yii yatutumile umu kusimikila.

Yatunenyile ukukanaswilila uku Uganda. Fwandi tutaswilile uku Uganda nu kuyasenda ivintu nanti ukupakasha ya cuza itu, lelo twaile uku musambo wa ku Germany, yatupeezile motoka nupya twaile uku Bulgaria. Yatutumile ukuya umu kuombela pamwi ni iumba umwali ya kasimikila 20, umu Sofia.

Twakweti intazi izingi sana umu Bulgaria. Intazi yonga ino twakweti, tutamanyile ululimi luno yaomvyanga. Yakwe ciili, kwali sile impapulo ziili umu lulimi lwa Cibulgaria, kuli kuti ibuku lyakuti The Truth That Leads to Eternal Life na My Book of Bible Stories. Nupya catutalilanga ukutandika masambililo ya Baibo. Asi mulandu ni ntazi zii, amwi iumba litu lyakwe Ya Nte yali acincile nupya yalundulukanga. Lino amu ceici ca Orthodox yaweni vii, yataatemilwe vino twasimikilanga nupya yatandike ukutucuzya.

Umu 1994 uteeko wainzile umulimo witu nupya, yatandike ukulola Ya Nte Yakwe Yeova ukuti asi mipepele, nupya Aina Bulgaria aingi yatandike ukutulola ukuti sweswe iumba lya yantu aipe. Aina yamwi yayalemile. Ya kalemba ya malyasi yalandanga ivya ufi pali sweswe, nu kulanda ukuti Ya Nte Yakwe Yeova yasikoma sile ana anono lelo yakanena na Ya Nte yauze ukuikoma. Fwandi nemo na ya Heinz catutalile ukulasimikila. Insita izingi twakomenkanyanga antu atusokelanga, amanga ya kapokola, nupya atutamanga ni vintu. Citangwike ukutwala impapulo umu mpanga yii, nupya catazile sana ukusonkela ivikuulwa vya kulonganilamo. Pa nsita imwi ya kapokola izile iyapumvyanya nu kulesha ukulongana kumwi ukwa citungu. Ya Heinz nani tutaelizye ukwikala umu mpanga umwaya antu aatupata sana. Antu yaa yapusineko na antu aali umu Uganda. I cani icatwazwile ukutwalilila ukuya ni nsansa?

Ukuya pamwi na aina na ya nkazi kwatwazwile ukutwalilila ukuya ni nsansa. Yatemilwe icumi cino yasambilile nupya yataizye pali vino twayazwile. Swensi kwene twazwananga. Kuli vii vyonsi ivyatucitikile, twasambililako ukuti tungaya ni nsansa asi mulandu nu mulimo uli onsi uno yangatupeela ndi cakuti tukwika mano uku yantu yauze ukucila ukwika mano uku ntazi zitu.

Umu kupita kwa nsita, ivintu vizile iviya ningo. Umu 1998 uteeko wizile iutuzumilizya nupya, nupya impapulo izingi zyasenwilwe umu Cibulgaria. Lyene umu 2004 yapeezile umusambo upya kuli Yeova. Ndakai mu Bulgaria mwaya ivilongano 57, na ya kasimikila 2,953. Umu mwaka wa mulimo wakwe 2024, antu 6,475 aliyo yazanyilwe uku Ciusho. Pa nsita imwi umu Sofia mwali sile ya nkazi 5, lelo ndakai mwaya ivilongano 9. Ya Heinz nani twailolela kuno usesemo ukati “apaali antu anono sile palaya antu masauzandi” wafikiliziwe umu Bulgaria.—Eza. 60:22.

KUZIZIMIZYA INTAZI

Umu umi wane nakwata intazi iya kulwala. Pa myaka iingi, icintu cimwi camelanga uku wongo. Yatandike ukundwazya nupya yandepwile pa maawazi 12 uku India pakuti yangacifumya. Pa cisila ca kundepula, twikazileko panono pa musambo wa mu India, lino nuvwileko ningo twaswilile uku Bulgaria umu kuomba umulimo witu.

Patalengile, ya Heinz nayo yatandike ukulwala ulwale uno yakati Huntington, uukalenga catalila umuntu ukupita, kulanda, alino ni micitile ya vintu. Lino ulwale wayanga ukwipilako, nalondekwanga ukulayazwa sana. Insita zimwi natontanga sana nupya nasakamalanga ukuti limwi ntali nu kukwanisha ukulayasakamala. Lelo Bobi umwina uwacance, insita zingi wasendanga ya Heinz nu kuombela pamwi nayo umu mulimo wa kusimikila. Bobi atuvwanga insonyi pali vino Ya Heinz yalandanga nanti pali vino yatapitanga ningo. Lyonsi Bobi wizanga umu kungazwa lino cantalilanga ukwazwilizya ya Heinz. Nanti cakuti ya Heinz nani twasoolwile ukukanakwata ana pakuti twaombela sana Yeova, twayuvwile ukuti Yeova watupeezile Bobi ngu mwana.—Mako 10:​29, 30.

Ya Heinz yakweti na kansa. Ica ulanda i cakuti izile iyafwa umu 2015. Nkayaluka sana. Aliyo yangazwanga lyonsi ukukanasakamikwa sana. Nupya cantalila ukuililako. Lelo nkaelenganya sana pali aliyo, nupya nkalola kwati yacili nu umi. (Luka 20:38) Insita izingi, nkaiusha amazwi asuma yano yalandanga na vino yampandangako mano. Nkataizya sana pa myaka ino twaombiile Yeova nayo pamwi.

NKATAIZYA YEOVA PALI VINO WANGAZWA

Yeova wangazwa ukuzizimizya intazi zyane zyonsi. Nupya wangazwa ukuya mishonali uwatemwa antu nanti cakuti nakwata ni nsonyi. (2 Tim. 1:7) Nkataizya Yeova nupya nemo na kaci wane tukaomba umulimo wa nsita yonsi. Ndakai, kaci wane na ya iya yakaomba umulimo wa kutandalila ivilongano ivikaomvya ululimi lwa Ciserbia umu Europe. Yeova wasuka mapepo yano ya tata yapepanga ala tucili ance.

Ukuisambilizya Baibo kukalenga naya nu mutende. Ndi cakuti ivintu vyatala, nasambilila ‘ukutwalilila ukupepa,’ wakwe vino Yesu wacitanga. (Luka 22:44) Inzila yonga ino mapepo yane yakaasukilwamo, u kupitila umu cikuuku nu kutemwa kuno ya cuza yane aaya umu cilongano ca mu Nadezhda Sofia yakandanga. Yakangama ukuti twizizye pamwi nayo nupya insita izingi yakanena ukuti yantemwa. Vyonsi vii vikalenga naya ni nsansa.

Insita izingi nkaelenganya pa kutuutululwa. Nkaelenganya ukuti indi nu ulupwa lwane umu paladaise. Nkalola avyazi yane yakuloleka acance wakwe vino yali lino yatwaline. Nkalola kaci wane akupekanya ivyakulya. Nkalola ya Heinz iimilila umupiipi ni mfwalasi yao. Ukwelenganya pa vintu vii, kukalenga nazizimizya nu kuya ni nsansa nupya nkataizya kuli Yeova.

Nga nelenganya pali vino umi wane waya na vino ulaya uku nkoleelo, nkazumilizya amazwi yano Devedi walanzile aaya pali Masamu 27:​13, 14, aakati: “Uzye nga aekwi kuno indi nga ntakweti utailo uwakuti ningalola usuma wakwe Yeova lino ncili nu umi? Uwataila Yeova; usipe nupya uye umukome. Uwataila Yeova.”