Vino Tungacita Pakuti Tucimvye Amelenganyo Aipe

1. I vyani vino swensi kwene tukalwishanya navyo?

UZYE mwatala mwalondeshapo ukucita ivintu vimwi ivisizanzya Yeova? Ndi cakuti ivya musango uu vyamucitikilapo, mutalinzile ukutoovoka. Baibo ikalanda ukuti: “Kutaaya uwezyo uwiza pali mwemwe uusicitikila antu yonsi.” (1 Kol. 10:13) Cii cikupiliula ukuti uwezyo uno mukalonda ukulwisha ali uno na yauze nayo yakalwishanya nao. Mutaya mwenga, nupya Yeova nga wamwazwa mungacimvya.

2. A mezyo ci yano Aina Klistu yamwi na asambi yakakwata? (Loliniko ni vikope.)

² Baibo ikalanda ukuti: “Umuntu wensi akaeziwa nga watunkwa nu kulemwa nu lunkumbwa lwakwe.” (Yako. 1:14) Ilembo lii likatwazwa ukumanya ukuti swensi kwene tukaeziwa ni vintu vipusanepusane. Wakwe, Aina Klistu yamwi yangeziwa ukucita uzelele nu mwanaci nanti umonsi, yauze nayo yangeziwa ukucita uzelele na aonsi yauze nanti anaci yauze. Yayo aata ukutamba ivya uzelele yangeziwa ukuvitamba nupya. Nupya aingi aata ukuomvya imilembo uyi uyi nanti uwengwa yakakwata intazi ili imwi. Zii ali intazi zimwi zino Aina Klistu yamwi alino na asambi yakwe Baibo yakakwata. Pa nsita imwi, swensi kwene tufwile twayuvwilepo wakwe vino umutumwa Paulo wayuvwile, lino walemvile ati: “Lino nkulonda ukucita icisuma, nkazana ukuti nkucita iciipe.”—Loma 7:21.

3. I vyani ivingacitika ndi cakuti insita izingi umuntu ali na melenganyo aipe?

³ Ndi cakuti mukwezya ukucimvya ukucita iciipe, limwi mungatandika ukwelenganya ukuti mutakweti amaka akutwalilila ukucita icisuma. Limwi mungayuvwa nu kuti Yeova atalamwingizya umu nsi ipya pa mulandu wakuti mukulwishanya na melenganyo aipe. Lelo mungasininkizya ukuti ivintu vii vino mukaelenganya asi vya cumi. Pakuti tumanye umulandu uno tutalinzile ukulayuvwila vivyo, icipande cii cimaasuka mauzyo yaili: (1) A weni akalonda ukuti mwayuvwa vivyo? (2) Mungacita uli pakuti mucimvye amelenganyo aipe?

VINO SATANA AKALONDA TWAELENGANYA

4. (a) U mulandu ci uno Satana akaelenganyizizya ukuti tutanga tucimvye amelenganyo aipe? (b) U mulandu ci uno tungasininkizizya ukuti tungacimvya amezyo?

⁴ Satana akalonda twayuvwa ukuti tutanga tukwanishe ukucimvya uwezyo. Yesu wamanyile icisinka cii lino wasambilizyanga asambi yakwe ivya kupepa ukuti: “Utaleka tuponele umu kweziwa, lelo utupususye uku mwipe.” (Mate. 6:13) Satana akalanda ukuti antu yatanga yatwalilile ukuya ni cuvwila kuli Yeova ndi cakuti yeziwa ukucita iciipe. (Yobo 2:​4, 5) U mulandu ci uno Satana akaelenganyizizya vii? Pano aliwe watandikilepo ukutunkwa na melenganyo yakwe aipe nupya atatwalilile ukuya uwa cisinka kuli Yeova. Fwandi akalola kwati twaya wakwe aliwe nu kuti tungasoololapo ukukanauvwila Yeova ndi cakuti tweziwa. Satana welenginye nu kuti angatunka nu Mwana wakwe Leza umumalilike ukucita iciipe. (Mate. 4:​8, 9) Nomba uzye umu cumi tungafilwa ukucimvya amelenganyo aipe? Awe foo. Tukayuvwa wakwe vino umutumwa Paulo wayuvwile, lino walemvile ati: “Umu vintu vyonsi nakwata maka ukupitila muli wino akampeela maka.”—Filipi 4:13.

5. Twamanya uli ukuti Yeova wataila ukuti tungacimvya amelenganyo aipe?

⁵ Ukupusanako na Satana, Yeova wataila ukuti tungacimvya amelenganyo aipe. Twamanya uli vivyo? Pano Yeova wasoowile ukuti antu aingi aaya na ucisinka kuli aliwe yalapusuka uku ucuzi ukalamba. Elenganyini pali vino cii cikupiliula. Yeova aasibepa, walanda ukuti antu aingi yalingila umu nsi ipya ala yali akaele, pano “yafula imingila yao nu kuilenga ukuya itiswe umu wazi wa Mwana wa Mfwele.” (Kuso. 7:​9, 13, 14) Ukwaula nu kutwisika Yeova wamanya ukuti tungakwanisha ukucimvya amezyo.

6-7. U mulandu ci uno Satana akalondela twaelenganya ukuti tutakwata amaka nu upaalilo uwakuti tungacimvya amezyo?

⁶ Satana akalonda tuzumile ukuti pa mulandu wakuti tukwelenganya pa viipe, Yeova atanga atuzumilizye ukwikala manda pe. Nupya kwene, elenganyini pa mulandu uno Satana akalonda twaelenganyizizya vii. Satana kwene aliwe atalikala manda pe, Yeova alamonona manda pe. (Utan. 3:15; Kuso. 20:10) Satana wasoka pa mulandu wakuti twakwata upaalilo uwa kwikala manda pe uku nkoleelo. Fwandi akaezya na maka ukulenga twaelenganya wakwe aliwe nu kulenga ukuti tutakwata upaalilo. Lelo, tutaya wakwe aliwe! Alino Baibo akalanda ukuti Yeova akalonda ukutwazwa pakuti tukikale amanda pe. Yeova “asilonda umuntu ali wensi akononwe lelo akalonda antu yonsi yalapile.”—2 Pet. 3:9.

⁷ Ndi cakuti tukwelenganya ukuti tutakweti maka nu upaalilo uwakuti tungacimvya amezyo, ala tukwelenganya wakwe vino Satana akalonda ukuti twaelenganya. Ukwiusha icisinka cii kungatwazwa ukucimvya amezyo yakwe Satana.—1 Pet. 5:​8, 9.

VINO TUNGAYUVWA PA MULANDU WAKUTI SWESWE AYEMBU

8. Ukulunda pa kucita ivintu iviipe, i vyani na vyuze vino Baibo ikapiliula ndi cakuti yalanda pa luyembu? (Masamu 51:5) (Loliniko ni “Izwi Ilyatililondololwa.”)

⁸ Ukulunda pali vino Satana akalonda twaelenganya, uzye kuli na cuze icingalenga twayuvwa ukuti tutakweti amaka alino nu upaalilo pakuti tucimvye amelenganyo aipe? I cani cico kwene? U luyembu luno twapyana uku yavyazi itu akutandikilapo.a—Yobo 14:4; belengini Masamu 51:5.

9-10. (a) Uzye Adamu na Eva yayuvwile uli pa cisila cakuti yayembu? (Loliniko ni cikope.) (b) Uzye uluyembu luno twapyana lukalenga twayuvwa uli?

⁹ Elenganyini pali vino Adamu na Eva yayuvwile pa cisila cakuti yayembuka. Lino yafizilwe ukuvwila Yeova, yaile iyafisama nu kuvimbilikizya imili yao. Ibuku lyakuti Insight on the Scriptures, lyalanda pa cisinka cii ukuti: “Lyene uluyembu lwalenzile yayuvwa amulandu, kusakamikwa, kuyuvwa ukuti yatacingililwe, alino nu kuvwa insonyi.” Cali kwati Adamu na Eva iyayalilwa umu ng’anda umwali sile imiputule 4. Adamu na Eva yazingulukanga sile umu ng’anda, lelo yataali nu kufumamo. Yataali nu kufumyapo uluyembu.

¹⁰ Lelo swemo ivintu vitaya wakwe vino vyali kuli Adamu na Eva. Pano ilambo lisiomba kuli Adamu na Eva. Lelo swemo ilambo likatwazwa ukwelelwa imembu alino nu kukwata ucuza upalamishe na Leza. (1 Kol. 6:11) Nanti ciye vivyo twapyana uluyembu nu kukanamalilika. Ali mulandu uno naswe insita zimwi tukayuvwa amulandu, kusakamikwa, kuyuvwa aatacingililwa, alino nu kuvwa insonyi. Baibo ikalanda ukuti uluyembu lukalenga antu ukucita iviipe. Vikwene i vikacitikila na antu yonsi nanti cakuti yatayembwike “umu musango uno Adamu wayembukilemo.” (Loma 5:14) Nomba tutalinzile ukulayuvwa ukuti pa mulandu wakuti twavyalwa nu luyembu, tutanga tukwanishe ukucita icilungame nanti ukukwata upaalilo uwa ku nkoleelo. Tungacimvya amelenganyo aipe. Tungacita uli vivyo?

11. Kulingana na Loma 6:​12, i vyani vino tulinzile ukucita ndi cakuti tukuyuvwa ukuti tutanga tucimvye uwezyo, nupya u mulandu ci?

¹¹ Pa mulandu wakuti tutamalilika tungayuvwa ukuti tutanga tukwanishe ukucimvya amelenganyo aipe. Cingaya kwati tukuvwa izwi umu mutwe witu likutunena ukuti tutanga tukwanishe ukucimvya amelenganyo aipe. Lelo tutalinzile ukuvwa ukwi izwi lilyo. U mulandu ci? Pano Baibo ikatusambilizya ukuti tutalinzile ukuleka uluyembu lwatwalilila ‘ukututeeka.’ (Belengini Loma 6:12.) Cii cikupiliula ukuti tungasoololapo ukukanacita iviipe. (Gala. 5:16) Yeova wataila ukuti tungacimvya uwezyo, pano ndi cakuti atataila atanga atunene ukucita vivyo. (Malan. 30:​11-14; Loma 6:6; 1 Tesa. 4:3) Umu cumi tungacimvya amezyo.

12. I vyani vino tulinzile ukucita ndi cakuti tukuyuvwa ukuti Yeova atanga atutemwe, nupya u mulandu ci?

¹² Ndi cakuti tukuyuvwa ukuti Yeova atanga atutemwe pa mulandu wakuti tuli na melenganyo aipe, tulinzile ukwiusha ukuti u luyembu luno twapyana ulukulenga twayuvwa vivyo, nupya tutalinzile ukukutikako. U mulandu ci? Pano Baibo ikatusambilizya ukuti Yeova wamanya ukuti sweswe yayembu. (Masa. 103:​13, 14) Yeova wamanya “ivintu vyonsi” pali sweswe ukwikako sile na vino uluyembu lukalenga twalondesha ukucita iviipe. (1 Yoa. 3:​19, 20) Ndi cakuti tukwezya na maka ukucimvya amelenganyo aipe, Yeova alaatulola ukuti sweswe asanguluke. U mulandu ci uno tungasininkizizya vivyo?

13-14. Uzye ukuya na melenganyo aipe kukapiliula ukuti mutanga muzanzye Yeova? Londololini.

¹³ Baibo ikalangilila ukuti paya upusano pa kuya na melenganyo aipe alino nu kucita iviipe. Asi lyonsi lino tungaikaanya ukuya na melenganyo aipe, lelo tungaikaanya ukucita iciipe. Wakwe, Aina Klistu yamwi aali umu Kolinto yacitanga uzelele na aonsi yauze nanti na anaci yauze. Paulo walemvile ati: “Yamwi pali mwemwe avino mwali.” Uzye cii cikupiliula ukuti yatatazile yelenganyepo pa kucita uzelele na aonsi yauze nanti na anaci yauze? Yafwile yelenganyangapo, pano citanguka ukuta ukuya na melenganyo yayo. Lelo Aina Klistu aali ni miyele ya kuikaanya yatacitanga vino yelenganyanga. Yeova wayalolanga ukuti yali ‘aswefiwe.’ (1 Kol. 6:​9-11) Vikwene ali vino cingaya na kuli mwemwe.

¹⁴ Asi mulandu na melenganyo aipe yano mukulwishanya nayo, mungayacimvya. Nanti cakuti mutanga mute ukuya na melenganyo aipe, mungaikaanya nu kukanatwalilila ‘ukucita vino umwili na melenganyo inu vikulonda.’ (Efes. 2:3) Mungacita uli vivyo nu kucimvya amelenganyo aipe?

VINO MUNGACITA PAKUTI MUCIMVYE AMEZYO

15. Pakuti tucimvye amelenganyo aipe, u mulandu ci uno tulinzile ukuya acisinka kuli sweineco?

¹⁵ Ndi cakuti mukulonda ukucimvya amelenganyo aipe, mulinzile ukumanya muno mwatonta. Mwacenjela pakuti ‘mutaibepa na vino mukuyuvwa.’ (Yako. 1:22) Wakwe, umwi uwakwata intazi iya kumwa uwengwa limwi angatandika ukwelenganya ukuti intazi ino akweti itifile sana pano kwaya na yauze akamwa sana ukumucila. Umwi nawe uwakwata intazi iya kutamba ivya uzelele, angatandika ukupeela yauze imilandu nu kulanda ukuti ‘Ntanga natamba ivya uzelele ndi cakuti mamane wanjikako mano.’ Fwandi mutaya na kabepekezyo ka kucita iviipe. Mwazumila ukuti mwemwe imulenga ukuti ivintu vivyo vicitike.—Gala. 6:7.

16. Uzye mungacita uli pakuti mutwalilile ukucita icisuma?

¹⁶ Ukulunda pa kuya acisinka kuli sweineco nu kumanya muno twatonta, tulinzile ukulalondesha ukukanacita iciipe. (1 Kol. 9:​26, 27; 1 Tesa. 4:4; 1 Pet. 1:​15, 16) Mwaelenganya pa vintu ivikalenga mwaeziwa sana. Limwi kwaya uwezyo umwi nanti insita imwi lino mukaeziwa sana. Wakwe, uzye cikamutalila ukucimvya uwezyo lino imutonta nanti usiku? Mwamanya ivikalenga mwaeziwa na vino mungacimvya uwezyo uwo. Mulinzile ukucita vii lino mutatala mwatunkwa.—Mapi. 22:3.

17. I vyani vino tungasambililako kuli vino Jozefu wacisile? (Utandiko 39:​7-9) (Loliniko ni vikope.)

¹⁷ Elenganyini pali vino Jozefu wacisile lino umuci wakwe Potifa walondanga ukuti alaale nawe. Lilyo kwene sile Jozefu wakanyile. (Belengini Utandiko 39:​7-9.) I vyani vino tukusambililako? Jozefu wapekinye ukucita icilungame na lino umuci wakwe Potifa atatala wamutunka. Namwe kwene mungamanyila limwi ivya kucita lino mutatala mwatunkwa. Ndi cakuti mwacita vivyo, lino mulatunkwa ukucita iviipe, cilamwangukila ukucita vino mwasoolola ukulacita ndi cakuti mweziwa.

“MWAYEZYA”

18. I vyani vyuze vino mungacita pakuti mucimvye amelenganyo aipe? (2 Kolinto 13:5)

¹⁸ Pakuti mucimvye amelenganyo aipe, cila nsita mulinzile ‘ukulaezya’ mweineco pakuti mulole ndi cakuti vino mukucita vili sile ningo. (Belengini 2 Kolinto 13:5.) Cila nsita mwapituluka muli vino mukwelenganya nu kucita alino nu kusenuka muno mwalola ukuti mulinzile ukusenuka. Wakwe, nanti cakuti mungacimvya uwezyo, mulinzile ukuyuzya mweineco ukuti: ‘Uzye iipalengela pakuti inkane?’ Ndi cakuti iipalengela pakuti mukane, mutalinzile ukuvwa uyi. Lelo mulinzile ukwelenganya pali vino mungacita pakuti mwaicingilila zuwa. Mwayuzya mweineco mauzyo yaa: ‘Uzye ningacefyako insita ino nkasumba pakuti inte ukwelenganya pa viipe? Uzye ivya kuizanzya vino nkasoolola vikalenga cantalila ukucimvya amezyo? Uzye nkata zuwa ukulola pa vya uzelele? Uzye namanya umulandu uno masunde yakwe Yeova yazipila nanti cakuti nkalondekwa ukuikaanya pakuti na muvwila?’—Masa. 101:3.

19. Uzye ukukanapingula ningo na pa vintu ivinono sile kungalenga uli citutalile ukucimvya amelenganyo aipe?

¹⁹ Lino mukuyezya, mutakwata kabepekezyo ka kucitilamo iviipe. Baibo ikalanda ukuti: “Umwenzo wa muntu waya sana nu ucenjezi ukucila icili consi nupya wiipa sana.” (Yele. 17:9) Yesu walanzile ukuti mu mwenzo “u mukafuma amelenganyo aipe.” (Mate. 15:19) Wakwe, umuntu uwata ukutamba ivya uzelele, limwi ndi cakuti papita insita, angatandika ukwelenganya ukuti cili sile ningo ukulalola ivikope ivingalenga aelenganya pa vya uzelele, nanti cakuti ivikope vivyo visikulangilila antu aatazwite. Nanti angatandika ukwelenganya ukuti, ‘Cili sile ningo ukwelenganya pa vintu vii, cikulu nsikuvicita.’ Ndi cakuti umuntu akwelenganya umu nzila yii, cingaya kwati akupangila ‘limwi ukucita vino umwili wakwe ukulonda.’ (Loma 13:14) Mungacita uli pakuti mutacita vivyo? Mwaika mano uku vintu vinono vino mukapingulapo pakuti vitalenga mutapingula ningo pa vintu ivikulu ivingalenga mucite iviipe.b Nupya mwakana na melenganyo aipe.

20. I vintu ci vino tukalondesha ivilacitika uku nkoleelo, nupya i vyani ivingatwazwa ndakai?

²⁰ Wakwe vino itusambilila, Yeova nga watwazwa, tungakwata amaka akucimvya amezyo. Nupya pa mulandu ni lambo, tungelelwa imembu zitu nu kukwata upaalilo uwa kwikala umu nsi ipya. Cilazipa sana ukuombela Yeova pa nsita iyo na kampingu isuma. Fwandi tulatwalilila ukusininkizya ukuti twakwata amaka nu upaalilo uwakuti tungacimvya amelenganyo aipe. Yeova nga watwazwa, tulacimvya.