CIPANDE CA KUSAMBILILAMO 34
LWIMBO NA. 3 Wewe Maka Itu, Wewe Twasintililamo
Mungasininkizya Ukuti Yeova Wamwelela
“Welezile imembu zyane.”—MASA. 32:5.
VINO TUMASAMBILILAPO
Malembo aakalangilila ukuti Yeova akatwelela ndi cakuti twalapila uku membu zitu nu mulandu uno cacindamila ukutaila ukuti akatwelela.
1-2. Uzye tukayuvwa uli ndi cakuti twamanya ukuti Yeova akaelela imembu zitu? (Loliniko pa nkupo.)
UMWENE Devedi wayuvwanga uwa mulandu pa viipe vino wacisile uku cisila. (Masa. 40:12; 51:3, tumazwi twa papela) Lelo walapile, nupya Yeova wamwelezile. (2 Sam. 12:13) Devedi wali ni nsansa ukumanya ukuti Yeova wamwelezile.—Masa. 32:1.
2 Naswe kwene tungaya ni nsansa ndi cakuti twiluka ukuti Yeova watwelela pa mulandu nu uluse lwakwe. Nanti cakuti tungacita uluyembu ulwipishe, tungateekeziwa ukumanya ukuti Yeova alatwelela ndi cakuti twalapila ukufuma pansi ya mwenzo, kupepa ukuti atwelele, kunenako ya eluda, alino nu kwezya na maka ukukanacita vino twacisile. (Mapi. 28:13; Mili. 26:20; 1 Yoa. 1:9) Nupya tukaya ni nsansa pano Yeova nga watwelela asiiusha nupya nanti ukutufulula pa membu zitu.—Ezek. 33:16.
Umwene Devedi walemvile masamu aingi aakalondolola vino Yeova akaelela (Lolini mapalaglafu 1-2)
3-4. Uzye nkazi umwi wayuvwile uli pa cisila ca kubatiziwa, nupya i vyani vino tumasambilila umu cipande cii?
3 Lelo insita zimwi, tungatandika ukutwisika ndi cakuti Yeova watwelela. Vikwene ali vino ya Jennifer yayuvwile. Avyazi yao yayasambilizye pali Yeova. Lelo lino yakulanga, yatandike ukucita ivintu iviipe nupya avyazi yao yatamanyanga vino yacitanga. Lino papisile imyaka imwi, izile iyasenuka, kuipeela kuli Yeova alino nu kubatiziwa. Yatiile: “Mpiti, insita izingi nacitanga uzelele, kukoleka, kusoka zuwa, nupya ukupanga impiya ali cintu icali icicindame kuli nene. Namanyile vino Baibo ikalanda ukuti pa mulandu ni lambo lwakwe Klistu, Yeova angelela imembu zitu ndi cakuti twalapila. Nanti cakuti nalapiile nu kulenga Yeova ukuti anjelele, ntazumile ukuti mu cumi Yeova wanjelezile.”
4 Uzye insita zimwi cikamutalila ukuzumila ukuti Yeova wamwelela pa membu zino mwacisile uku cisila? Yeova wakwatisha uluse. Devedi wataile ukuti Yeova wamwelezile nupya Yeova akalonda mwaya ni nsansa wakwe vino Devedi wali ni nsansa pa cisila cakuti wamwelela. Umu cipande cii, tumasambilila umulandu uno tulinzile ukuzumilila ukuti Yeova watwelela na vino tungacita vivyo.
U MULANDU CI UNO TULINZILE UKUZUMILILA UKUTI YEOVA WATWELELA?
5. I vyani vino Satana akalonda tuzumile? Langililini.
5 Ndi cakuti twazumila ukuti Yeova watwelela, tutalazumila ufi wakwe Satana. Mwaiusha ukuti Satana angacita icili consi pakuti alenge tute ukuombela Yeova. Wakwe, Satana angezya ukutulenga tutaile ukuti Yeova atanga atwelele. Elenganyini pali vino vyacitikile umonsi uwa mu Kolinto, uwacisile uzelele nu kufumiziwa umu cilongano. (1 Kol. 5:1, 5, 13) Lino umonsi wiya walapile, Satana walondanga ukuti amu cilongano yatamwelela nu kumuwezya umu cilongano. Nupya pa nsita ili imwi kwene, Satana walondanga ukuti umonsi wiya ayuvwa ukuti yatamwelezile pakuti ‘ulanda umutoovole’ ate nu kuombela Yeova. Vikwene ali vino Satana walondanga. Na ndakai kwene, Satana akalonda twayuvwa ukuti Yeova atangaelele imembu zitu pakuti tute ukuombela Yeova. Lelo “twamanya mapange yakwe.”—2 Kol. 2:5-11.
6. I cani icingatwazwa ndi cakuti tukuvwa uyi pali vino twacisile?
6 Ndi cakuti twazumila ukuti Yeova watwelela, tungata ukuvwa sana uyi pali vino twacisile. Ndi cakuti twayembuka, tukauvwa uyi. (Masa. 51:17) Caya sile ningo ukuyuvwa vivyo. Kampingu witu angatwazwa ukwiluka ukuti vino twacisile i viipe alino nu kusenuka. (2 Kol. 7:10, 11) Lelo ndi cakuti twatwalilila ukuvwa uyi pa cisila cakuti twalapila, tungatoovoka. Ndi cakuti twazumila ukuti Yeova watwelela, tulata ukuvwa uyi pali vino twacisile. Lyene tungaombela Yeova ukulingana vino akalonda, kuli kuti ukuya na kampingu isanguluke alino ni nsansa. (Kolo. 1:10, 11; 2 Tim. 1:3) Lelo tungacita uli pakuti tuzumile ukuti Yeova watwelela?
I VYANI IVINGATWAZWA UKUZUMILA UKUTI YEOVA WATWELELA?
7-8. Uzye Yeova wailondolwile uli kuli Mose, nupya vino walanzile vingalenga tutaile vyani? (Kufuma 34:6, 7)
7 Mwaelenganya pali vino Yeova wailondolola. Wakwe, elenganyini pali vino Yeova walanzile kuli Mose pa Mwamba wa Sinai.a (Belengini Kufuma 34:6, 7.) Nanti cakuti Yeova wakwata imiyele iingi sana, wasoolwilepo ukunena Mose ukuti a “Leza wa luse ni cikuuku.” Uzye mukwelenganya ukuti umuntu uwatemwa Yeova nga wayembuka nu kulapila, Yeova angafilwa ukumwelela? Atanga afilwe foo. Kucita vivyo kungalangilila ukuti Yeova u munkalwe nupya ataya nu luse. Nomba vivyo asi vino Yeova waya.
8 Tungasininkizya ukuti Yeova nga walanda ukuti u wa luse, ala akulanda icisinka pano asibepa. (Masa. 31:5) Fwandi tungataila vino akalanda. Ndi cakuti cikumutalila ukuta ukuvwa uyi pali vino mwacisile, mwayuzya imuti: ‘Uzye nataila ukuti Yeova waya nu luse alino ni cikuuku nupya atanga afilwe ukwelela umuyembu aliwensi uwatalapila? Uzye lyene ningafilwa ukuzumila ukuti watanjelela?’
9. Uzye cikapiliula cani ukwelelwa imembu? (Masa. 32:5)
9 Mwaelenganya pali vino Yeova walenzile ya kalemba yakwe Baibo ukulemba pali vino akaelela. Wakwe, elenganyini pali vino Devedi walemvile pali vino Yeova akaelela. (Belengini Masamu 32:5.) Devedi walanzile ati: “Welezile imembu zyane.” Izwi lino yasenulako izwi lyakuti “ukwelela” pa vikomo vii lingapiliula nu “kufumyapo.” Fwandi lino Yeova welezile Devedi, wafumizyepo imembu zyakwe. Devedi wali ni nsansa pano wamanyile ukuti Yeova wamwelezile. (Masa. 32:2-4) Naswe kwene tungaya ni nsansa. Ndi cakuti twalapila umu cumi, tutalinzile ukutwalilila ukulauvwa uyi pali vino twacisile. Lelo tulinzile ukuya ni nsansa pano ala Yeova watwelela.
10-11. Uzye amazwi akuti “waipekanya ukweleela” yakatusambilizya vyani pali Yeova? (Masa. 86:5)
10 Belengini Masamu 86:5. Devedi walanzile pali Yeova ukuti “waipekanya ukweleela.” Lupapulo lumwi ulwa kulondelezyamo ivyeo lwalanzile pa mazwi yaa ukuti: “Akaelela, nupya ali vino waya.” U mulandu ci uno wayela vivyo? Amazwi alondelelapo umu cikomo cii yalanda ukuti: “Waya sana nu kutemwa kwa cumi kuli yonsi aakalilila kuli wewe.” Umu cipande icafumako, twasambilile ukuti Yeova walaya ukuti alalanga ukutemwa kwakwe ukwa cumi kuli yayo amutemwa nupya atalatala ayatazyele. Fwandi ndi cakuti yayembuka nu kulapila, Yeova akatwalilila ukuyalanga ukutemwa kwakwe ukwa cumi nupya akayelela. (Eza. 55:7) Ndi cakuti cikumutalila ukuzumila ukuti Yeova wamwelela, mwayuzya mweineco imuti: ‘Uzye nataila ukuti Yeova akaelela nu kuti waipekanya ukwelela yayo yonsi aakalapila nupya aakalenga kuli aliwe kuti ayelele? Ndi cakuti nataila, ale nani kwene wanjelezile lino namulenzile ukuti anjelele.’
11 Tungateekeziwa ukumanya ukuti Yeova watumanya ningo nupya wamanya ukuti tutamalilika. (Masa. 139:1, 2) Lekini tulole na vyuze vino Devedi walemvile umu Masamu na vino vingatwazwa ukuzumila ukuti Yeova akalonda ukutwelela.
I VYANI VINO YEOVA AKAIUSHA PALI SWESWE?
12-13. Ukulingana Masamu 103:14, i vyani vino Yeova akaiusha pali sweswe, nupya ukucita vivyo kukalenga acite vyani?
12 Belengini Masamu 103:4. Devedi walanzile pali Yeova ukuti “Akaiusya ukuti sweswe lukungu.” Devedi waomvizye amazwi yaa pa kulondolola vino Yeova akaelela ya kapepa yakwe aakalapila ukuti: Wamanya ukuti tutamalilika. Lekini tulole vino mazwi yano Devedi walanzile yakapiliula.
13 Devedi walanzile ukuti Yeova “wamanya vino twaumbwa.” Wapanzile Adamu “ukufuma uku lukungu lwa mu musili” nupya wamanya ukuti antu amalilike yakwata umwa kupeleela, wakwe yakalondekwa ukulya, ukulaala alino nu kufuuta. (Utan. 2:7) Lelo lino Adamu na Eva yayembwike, antunze izile iyaya umu lukungu na luze. Pa mulandu wakuti sweswe ana yakwe Adamu, twapyana uluyembu ulukalenga twaluvyanya. Yeova atapelela sile pa kumanya ukuti tutamalilika; lelo Devedi walanzile pali aliwe kuti “akaiusha” ukuti tutamalilika. Pa mulandu wakuti Yeova watutemwa akatulanga icikuuku. Wamanya ukuti insita zimwi tukaluvyanya, akalola ndi cakuti umu cumi itulapila nupya akatuyela uluse nu kutwelela.—Masa. 78:38, 39.
14. (a) I vyani na vyuze vino Devedi walanzile pali vino Yeova akaelela? (Masa. 103:12) (b) I vyani vino tungasambilila kuli vino Yeova welezile Devedi? (Loliniko na kambokosi kakuti “Vino Yeova Akaelela nu Kwililako.”)
14 I vyani na vyuze vino tungasambilila umu Masamu cipande 103 pali vino Yeova akaelela? (Belengini Masamu 103:12.) Devedi walanzile ukuti Yeova nga watwelela, akatalusha imembu zitu wakwe vino “ukukatunkila ilanzi kwatalimpa na kuno likawila.” Ukukatunkila ilanzi kwatalimpa sana na kuno ilanzi likawila, fwandi incende zii ziili zitanga zikuminkane. Uzye cii cikutusambilizya vyani pali vino Yeova akaelela imembu? Lupapulo lwa kulondelezyamo ivyeo lwalondolwile mazwi yaa umu nzila yii: “Ndi cakuti Leza watalusha uluyembu lwitu kuli sweswe, cikaya kwati icintu cimwi icikununkila lyene cata ukununkila. Fwandi tungasininkizya ukuti Yeova atalatala elenganyepo nupya nanti ukutwiusha nupya pa luyembu luno twacisile.” Insita zimwi, ukununkila kwa vyakulya nanti ivintu vyuze kungalenga twelenganye pali vimwi ivyacitike uku cisila. Lelo ndi cakuti Yeova watwelela cikaya kwati wafumyapo icinunkile cico kuli kuti uluyembu nupya asiiusha.—Ezek. 18:21, 22; Mili. 3:19.
15. I vyani vino tungacita ndi cakuti twatwalilila ukuvwa uyi pa membu zino twacisile mpiti?
15 Uzye amazwi yano Devedi walemvile aya umu Masamu 103 yangamwazwa uli ndi cakuti cikumitalila ukuzumila ukuti Yeova wamwelela? Mwaelenganya pali vino Yeova akayuvwa. Akaiusha ukuti mutamalilika. Nupya Yeova akaelela yayo yonsi akauvwa uyi pali vino yacisile nupya aalapila wakwe vino mwacita. Mwaiusha nu kuti Yeova akasoololapo ukukanaelenganya nanti ukwiusha imembu zino mwacisile mpiti. Fwandi ataliusha nanti ukumifulula pa membu zino wamyelezile. Yeova asitwalilila ukwelenganya pa membu zino twacisile mpiti. Fwandi namwe kwene ali vino mulinzile ukucita. (Masa. 130:3) Ndi cakuti twataila ukuti Yeova watwelela, tulata ukulauvwa uyi nupya tulatwalilila ukulamuombela ni nsansa.
16. Langililini umulandu uno kutwalilila ukwelenganya pali vino twaluvyanyizizye uku cisila kwaipila. (Loliniko ni cikope.)
16 Elenganyini pa cilangililo cii. Ndi cakuti umwi akupisha motoka, akalolako muli miila pakuti alole ivikucitika uku cisila. Angacita vivyo umu nsita, lelo ndi cakuti watwalilila ukucita vivyo lyonsi angaya umu uzanzo. Lelo pakuti atwalilile ukupisha ningo, alinzile ukwika mano uku nkoleelo. Insita zimwi caya sile ningo ukwelenganya pali vino twaluvyanyizye uku cisila, ukucita vii kungatwazwa ukukanaswilizyapo ukucita ivili vimwi kwene. Nomba ndi cakuti twatwalilila ukwelenganya sana pali vino twaluvyanyizye uku cisila, cingalenga ukuti tutaombela ningo Leza. Lelo tulinzile ukutwalilila ukwika mano uku vya nkoleelo. Tukupita umu nzila iikatungulula uku umi umu nsi ipya ino Leza watulaya, muno ivintu iviipe “vilililika.”—Eza. 65:17; Mapi. 4:25.
Kapisha wakwe motoka alinzile ukwika mano uku kulola inkoleelo. Umu nzila ili imwi, tulinzile ukutwalilila ukulaelenganya pali vino Yeova alatulambula nga twatwalilila ukumuombela (Lolini palaglafu 16)
MWATWALILILA UKUSININKIZYA UKUTI YEOVA WAMUTEMWA
17. U mulandu ci uno tulinzile ukusininkizizya ukuti Yeova watutemwa nupya akatwelela?
17 Tulinzile ukusininkizya ukuti Yeova watutemwa nupya waipekanya ukutwelela. (1 Yoa. 3:19) U mulandu ci? Pano Satana alatwalilila ukulenga twauvwa ukuti Yeova atatutemwa nupya asitwelela. Uyo wakwe u wa kutulenga ukuta ukuombela Yeova. Nupya Satana alatwalilila ukucita vikwene pano wamanya ukuti watashala sile na kasita akanono. (Kuso. 12:12) Tutalinzile ukuleka ukuti acimvye!
18. I vyani vino mungacita pakuti musininkizye ukuti Yeova wamutemwa nupya akaelela?
18 Pakuti mutwalilile ukutaila ukuti Yeova wamutemwa, mulinzile ukucita vino twasambilile umu cipande icafumako. Pakuti musininkizye ukuti akaelela, mwaelenganya pali vino Yeova wailondolola umwineco. Mwaelenganya pali vino vyalenzile ya kalemba yakwe Baibo ukulemba pali vino Yeova akaelela. Mutailila ukuti wamanya ukuti tutamalilika nu kuti akatuyela uluse. Nupya mwaiusha ukuti nga welela, asiiusha. Lyene mulaya ni nsansa pano mulasininkizya ukuti Yeova atamuyela uluse, nupya mungalanda wakwe vino Devedi yalanzile ukuti: “Nataizya we Yeova, pa kwelela ‘imembu zyane’!”—Masa. 32:5.
LWIMBO NA. 1 Miyeele Yako Yeova
a Lolini icipande cakuti “Yeova Akaeleela Sana” umu Lupungu Lwa Mulinzi lwakwe Juni 2022, mapalaglafu 4-7.