Yeova Watwazwile Ukuya ni Nsansa Konsi Kuno Twaombelanga

Umwina na nkazi Kassholm yazanyilwe ukwi Sukulu lya Gilyadi umu 1979 nupya pa myaka iingi yaombelapo uku Iran, Mauritius, Myanma, Tanzania, Uganda alino nu ku Zaire. Uku Gilyadi ali kuno Umwina Jack Redford wayapanzileko amano ayazwanga lyonsi lino yayapeela umulimo upya. Lekini yatulondolwele.

Ya Mats neniniko antu vino cali pakuti musambilile icumi.

Ya Mats: Ya tata iikalanga umu Poland lino kwali Nkondo Ya Nsi Yonsi Yakwe Ciili nupya yaweni usomvi uwali umwi ceici lyakwe ya Katolika. Nanti ciye vivyo, lyonsi yalandanga ukuti “namanya ukuti kufwile kwaya ukupepa kwa cumi.” Lino papisile insita, nizile iniluka ukuti vino yalandanga vyali i vya cumi. Nakazile mabuku aingi akubelenga. Pa mabuku yano nakazile pali ni buku lyakwe bulu ilyatangi The Truth That Leads to Eternal Life. Natemilwe sana umutwe wi buku lii, fwandi nabelenzile ibuku lyonsi uwanda kwene uwa usiku lino nakazile. Lino namazile ukubelenga, nizile imanya ukuti inzana ukupepa kwa cumi.

Ukutandika umu Epuleo 1972, nabelenzile mabuku aingi yakwe ya Nte Yakwe Yeova nupya nazanyile amasuko ku mauzyo yano nakweti amuli Baibo. Nayuvwile wa muculuzi uwali umu cilangililo cakwe Yesu uwaile umu kulonda mawe ya mutengo, uwakazizye vyonsi pakuti sile akale iwe lya mutengo. Fwandi nasoolwilepo ukulaombela Yeova ukucila ukuya ku yunivesiti pakuti nkaye dokota. (Mate. 13:​45, 46) Nabatiziwe pa 10 Dizemba 1972.

Mu mwaka sile onga, avyazi yane nu mutowane yasambilile icumi nu kubatiziwa. Umu Julai 1973 natandike umulimo wa nsita yonsi. Pali ya painiya aali acincile mu cilongano citu, paali na nkazi Ann-Catrin uwali umuyembe nupya umucincile. Twatemwanine nupya twatwaline umu 1975, lyene imyaka 4 iyalondelilepo twaombelanga umwi tauni lya Strömsund umu Sweden, incende isuma muno antu yalondeshanga ukusambilila Baibo.

Ya Ann-Catrin: Ya tata yasambilile icumi lino yali umupiipi nu kumala masambililo ya ku yunivesiti umu Stockholm. Nali sile ni myezi itatu pa nsita iya, lelo yansendanga umu kulongana nu mu kusimikila. Ya mayo yataatemilwe vino ya tata yacitanga nupya yalondanga ukusinila ya Nte ukuti aufi. Lelo yafizilwe, nupya nayo kwene izile iyabatiziwa. Lino nali ni myaka 13 nabatiziwe, nupya nizile intandika upainiya lino nali ni myaka 16. Pa cisila ca kuombela uku Umeå ukwalondekwanga sana ya kasimikila, nizile inja painiya muiyele.

Lino twatwaline na ya Mats, twayanga ni nsansa ukwazwa antu aingi ukusambilila icumi. Pali yano twazwile pali na Maivor, umukazyana uwacance uwasoolwilepo ukuta ukuteya ivyangalo pakuti aombela Yeova nupya uwizile atandika ukuomba upainiya pamwi nu mutowane. Yaile ukwi Sukulu lya Gilyadi umu 1984 nupya yakaombela uku Ecuador.

Umu mulimo winu uwa umishonali, i vyani ivyamwazwa ukusenuka nu kutwalilila ukuya ni nsansa?

Ya Mats: Insita izingi yatutumanga ukuya mu kuombela uku ncende zyuze. Lelo icintu conga icatwazwile u kwezya na maka ukulakolanya Yesu, sana sana vino wali umuicefye. (Kolo. 2:​6, 7) Wakwe, ukucila ukulaenekela ukuti aina na ya nkazi yacita ivintu ukulingana na vino twacitanga, twezyanga ukusambililako inzila zino yacitilangamo ivintu. Twalondanga ukusambilila vino yelenganyanga pa vintu ni ntambi zyao. Lino twakolanyanga Yesu, catwangukilanga ukusenuka nu kuya ni nsansa umu milimo ino twaombanga.—Masa. 1:​2, 3.

Ya Ann-Catrin: Wakwe vino icimuti cino yalema cikalondekwa kasanya pakuti cikule, vikwene ali vino na Yeova wayanga wa kasanya kuli sweswe. (Masa. 84:11) Watupeezile aina na ya nkazi aalanganga ukutemwa kuli sweswe. Wakwe umu Teran, ku Iran aina na ya nkazi yatupokelile ningo, wakwe vino antu aingi alumbulwa muli Baibo yapokelelanga aenyi. Cii catwiwisheko vino antu alembwa muli Baibo yali ni cikuuku na vino yapokelelanga aenyi. Twalondeshanga ukwikala umu Iran, lelo umu Julai 1980, uteeko wainzile umulimo wakwe ya Nte Yakwe Yeova nupya yatumanyisizye ukuti tulinzile ukufuma umu mpanga iya umu maawazi sile 48. Lyene yatutumile ukuya umu kuombela ku Zaire (kuno ndakai yakaama ukuti Congo) umu Africa.

Lino yatunenyile ukuti yakututuma uku Africa, nalizile. Mpiti nuvwanga ukuti mu Africa mwaya sana inzoka ni ndwala, fwandi nuvwanga sana intete. Lelo anji yaili aombiilepo umu Africa yatunenyile ukuti: “Mutatala mwaombelako! Mukezye ukuombelako nupya mulakutemwa.” Nupya vino yalanzile vyali i vya cumi. Aina na ya nkazi yaya nu kutemwa nupya yakapokelela ningo. Pa cisila ca kuombela umu Africa pa myaka 6, yainzile umulimo witu nupya nazanzile pa mulandu wakuti umuku uu napepanga ukuti Yeova aleke tutwalilile ukuombela umu Africa.

I visuma ci vino mwaipakizya pa myaka ino mwaombela Yeova?

Ya Mats: Pa mulandu nu mulimo uno twaombanga, twapanzile ucuza na ya mishonali yauze afumanga umu mpanga izipusanepusane. Umu milimo yuze ino twaombanga, twayanga sana ni nsansa ukulatungulula masambililo aingi. Insita zimwi cila muntu wakwatanga masambililo 20. Nupya ntalatala nilile vino aina na ya nkazi mu Africa yali ni cikuuku na vino yatupokelelanga. Lino twatandalilanga ivilongano umu Zaire, ya cuza itu aingi yatupokelelanga nanti cakuti yataakweti ivingi nupya twimikanga motoka itu mupiipi na mang’anda yao. (2 Kol. 8:3) Cintu cisuma cino twacitanga, u kusimika malyasi pa visuma ivyatucitikilanga. Fwandi manguzi twikalanga nu kusimika vino uwanda iuli nu kutaizya Yeova pali vino ali watwazwa.

Ya Ann-Catrin: Icalenganga naya sana ni nsansa u kumanya aina na ya nkazi umu mpanga izipusanepusane. Twasambilile indimi izipusanepusane, ukwikapo sile ni Cifarsi, Cifrench, Ciluganda, ni Ciswahili nupya twasambilile ni ntambi zyuze. Twazwile aina na ya nkazi apya, kupanga ivyuza nupya twaipakizye ukuombela Yeova nayo.—Zefa. 3:9.

Nupya twaipakizyanga ukulola ivintu ivisuma vino Yeova waumba. Lyonsi lino twazumila umulimo upya umu mulimo wakwe Yeova, twayuvwanga kwati tuli pa ulendo nupya Yeova aliwe akututungulula. Watusambilizya ivintu ivingi vino tutaali nu kuisambilizya sweineco.

Iintazi ci zino mwakweti, nupya mwacisile uli pakuti mutwalilile ukuzizimizya?

Ya Mats: Insita zimwi twalwalanga indwala, wakwe malelya. Nupya insita zimwi ya Ann-Catrin yalwalanga ukwaula ukwenekela nupya yayalepulanga. Alino twasakamalanga pa mulandu wakuti avyazi itu yakosile, fwandi tukataizya sana ya lupwa ayasakamalanga lino twaombanga umulimo. Lino yasakamalanga avyazi, yayanga ateekele, yali ni nsansa alino nu kutemwa. (1 Tim. 5:4) Nanti cakuti twayazwangako muli vino yalondekwanga ala tukuomba umulimo, insita zimwi tuvwanga uyi pali vino tutaali pamwi nayo.

Ya Ann-Catrin: Umu 1983 lino twaombelanga umu Zaire, nizile indwala kolela. Dokota wanenyile ya Mats ati, “Muyafumye umu mpanga yii ilelo kwene!” Uwanda uwalondelilepo twakwezile indeke iikasenda iviya pano ali ndeke sile iyayanga uku Sweden.

Ya Mats: Twaweni kwati umulimo witu uwa umishonali wasila, fwandi twalizile sana. Ukupusanako na vino dokota walanzile, ya Ann-Catrin yapozile. Nupya lino papisile umwaka onga, twaswilile uku Zaire, nupya umuku uu twali umu cilongano icinono icaomvyanga Ciswahili mu Lubumbashi.

Ya Ann-Catrin: Lino twali uku Lubumbashi, nizile inkwata inda lelo umwana wafwile ala atatala wavyalwa. Nanti cakuti tutalondanga ukukwata ana, ukufwilwa umwana kwalenzile cantalila ukuzizimizya. Pa nsita iya lino ivintu vyatazile, Yeova watupeezile upe uno tutenekelanga. Twatandike ukutungulula masambililo ya Baibo aingi. Lino patatala papita nu mwaka, ya kasimikila umu cilongano yavulileko ukufuma pali 35 ukufika kuli 70, nupya impendwa ya antu aazanwanga umu kulongana yavulileko ukufuma pali 40 ukufika pali 220. Twisile sana amano ku mulimo wa kusimikila nupya Yeova wapaalanga vino twaombeshanga na cii calenganga nauvwako ningo. Insita izingi tukaelenganya pa mwana witu nu kulandapo. Tukaelenganya pali vino Yeova alalenga tute ukuvwa uyi umu nsi ipya.

Ya Mats: Lino papisile insita, ya Ann-Catrin izile iyatandika ukutonta sana nu kuvwa amaka ukusila. Pa nsita kwene iya, izile iyanzana nu ulwale wakwe kansa nupya nalondekwanga ukulepulwa. Ndakai nkauvwako ningo, nupya na ya Ann-Catrin kwene yakwezya na maka ukuomba apapezile amaka yao.

Twamanya ukuti asi sweswe sile tukazizimizya intazi. Pa cisila ca kulwishanya kwa mitundu ukwaliko umu Rwanda umu 1994, twatandalile aina na ya nkazi aingi ali umu nkambi zya mbutusi. Ukulola vino yali nu utailo, vino yazizimizyanga na vino yali na ukapekape kwatusambilizye ukuti Yeova wakwata amaka akwazwa antu yakwe lino yali ni ntazi.—Masa. 55:22.

Ya Ann-Catrin: Intazi yuze ino twakweti yacitike lino kwali ukupeela umusambo wa mu Uganda kuli Yeova umu 2007. Lino puloglamu yii yasizile twapisile ukuya uku Nairobi umu Kenya pamwi ni iumba lyakwe ya mishonali 25 alino na aomvi apa Bethel. Lino tutatala twafika pa mupaka wa ku Kenya, motoka iyafumanga uku nkoleelo izile ipunka muli motoka itu. Uwapishanga motoka alino na ina 5 yafwilile papo kwene, nkazi wenga wafwilile ku cipatala. Tukalondesha ukwizalola ya cuza itu yaa nupya.—Yobo 14:​13-15.

Lino papisile insita, ivilonda vino nakweti vizile ivipola. Ya Mats nani twatwalilile ukusakamikwa pa mulandu ni vyacitike. Nazyukanga usiku nupya nuvwanga kwati indwala ulwale wa ku mwenzo. Nuvwanga sana intete. Ukupepa kuli Yeova, ukubelenga malembo yano twatemwa sana nu kwelenganyapo kwanteekezyanga. Nupya twaile kuli ya dokota asambilila pa vya masakamika, nupya ukucita vii kwatwazwile sana. Ndakai tusisakamikwa sana, nupya tukalenga Yeova ukuti atuteekezya nu kutwazwa ukulateekezya yauze aakasakamikwa.

Lino imukulanda pali vino mwazizimizye intazi, imwalanda ukuti Yeova wamusendanga wa mayai. Uzye imwalozya mwi?

Ya Mats: Amazwi yaa yafuma uku mazwi ya Ciswahili aakuti “Tumebebwa kama mayai mabichi,” nanti “Watusendanga wa mayai.” Wakwe vino umuntu akateekela lino watasenda mayai pakuti yatatamika, avino na Yeova watwalililanga ukututeekelela nu kutwazwa mu milimo yonsi ino watupeelanga. Lyonsi twakwatanga vino twalondekwanga, insita zimwi ukucila na pali vino twalondekwanga. Inzila yonga ino tukayuvwilamo vino Yeova watutemwa na vino akatusakamala u kupitila umwi Iumba Ilikatungulula.

Ya Ann-Catrin: Nkulonda indandeko pali vino Yeova watwazwile. Wanda umwi yamwi yantumile foni nu kunena ukuti ya tata yane uku Sweden iyalwala sana nupya yali umu cipatala. Pa nsita yii ala alino ya Mats yapola kuli malelya. Tutaakweti impiya izyakukalilamo matiketi aa ndeke, fwandi twapingwilepo ukukazya motoka itu. Lyene antu yaili na yauze yatutumiile foni, yonga yafumile uku yatwalane amanyile intazi ino twakweti nupya yalondanga ukutukalila tiketi yonga. Yauze atutumiile, a nkazi uwacikalamba uwasunganga impiya umu kambokosi kano walemvilepo ati “Kuli wino akulondekwa uwazwilizyo.” Umu mamineti sile anono Yeova watwazwile ukukwata matiketi yano twalondekwanga.—Aeb. 13:6.

I vyani vino mwasambilila pa myaka ukucila pali 50 ino mwaomba umu mulimo wa nsita yonsi?

Ya Ann-Catrin: Nasambilila ukuti tukaya na maka ndi cakuti ‘tukuteeka umwenzo nu kuya nu utailo.’ Ndi cakuti twataila Yeova, akatulwilako. (Eza. 30:15; 2 Mila. 20:​15, 17) Ukuombela Yeova apapezile amaka itu yonsi kwalenga tuipakizye ivintu ivisuma vino tutaali nu kuipakizya ndi cakuti twasoolwile ukuomba imilimo yuze.

Ya Mats: Isambililo ilicindame lino nasambilila u kutaila Yeova asi mulandu ni ntazi izili zyonsi alino nu kulola vino akungazwa. (Masa. 37:5) Watwalilila ukungazwa wakwe vivi kwene vino walaya. Nupya tukalola vino Yeova acili akutwazwa umu mulimo uno tukaomba pa Bethel umu Myanmar.

Tukutaila ukuti na acance aingi aakalonda ukulaombesha umu mulimo wa nsita yonsi nayo kwene yalailolela vino Yeova waya nu kutemwa wakwe vino twailolela. Nupya twataila ukuti yalaya ni nsansa ndi cakuti yaleka ukuti Yeova ayazwa umu mulimo onsi uno yapeelwa.