Mwaazwa Zuwa Antu Aakulonda Ukusambilila Pali Leza

1. Uzye antu yakacita uli ndi cakuti twayasimikila ilyasi lisuma? (Milimo 13:​47, 48; 16:​14, 15)

LINO antu aingi mu manda ya Ina Klistu akutandikilako yuvwile pali Yesu pa muku wa kutandikilapo, izile iyaya Aina Klistu lilyo kwene sile. (Belengini Milimo 13:​47, 48; 16:​14, 15.) Na ndakai kwene, yamwi yakauvwa ningo nga yuvwa icumi pa muku wa kutandikilapo. Yamwi yakaloleka kwati yatakulonda pa kutandika lelo yakaiza iyatandika ukulondesha ukusambilila nu kupepa Leza. I vyani vino tulinzile ukucita ndi cakuti twazana antu aakulondesha ukusambilila pali Leza?

2. U mu nzila ci muno umulimo witu uwa kusimikila wakolana na wako siulimi?

² Tungakolanya umulimo wa kusimikila ku muntu uwakwata icalo. Ivizao vimwi vingaca nupya vingalondekwa ukuti avizombole. Siulimi angazombola ivizao vivyo nanti cakuti acili akukomela nupya acili akusakamala ivizao ivitatala vyaca. Avino caya nu ku mulimo wa kusimikila, ndi cakuti twazana umwi akulonda ukusambilila ilyasi lisuma, tukaika amano uku muntu wiyo nu ku kumwazwa ukuti aye umusambi wakwe Yesu lilyo kwene sile ukwaula ukusumba insita. Lelo tukatwalilila ukwazwa yayo aatatala yaiteyanya nu kuyazwa ukumanya umulandu uno cacindamila ukusambilila pali Leza na Baibo. (Yoa. 4:​35, 36) Ukwiluka kulatwazwa ukumanya inzila isuma ino tungaomvya pakuti tuyazwe. Umu cipande cii, tumasambilila pali vino vingatwazwa kulanzyanya na antu aakulondesha ukuvwa pa muku wa kutandikilapo. Lyene tumasambilila na pali vino tungacita pa kuyazwa pakuti yatwalilile ukulunduluka.

VINO TUNGAZWA YAYO AAKULONDESHA UKUVWA

3. I vyani vino tulinzile ukucita ndi cakuti twazana aakulondesha ukuvwa lino tuli umu mulimo wa kusimikila?

³ Ndi cakuti twazana antu aakulonda ukusambilila pali Yeova lino tuli mu mulimo wa kusimikila, ukwaula nu kusumba insita tukatandika ukuyazwa ukupalama kuli Yeova. Lyene tukayanena ukutandika ukusambilila Baibo nupya tukayama umu kulongana.—Belengini 1 Kolinto 9:26.

4. Landiniko pali vimwi ivyacitike lino umwi watandike ukusambilila Baibo papo kwene sile.

⁴ Mwayuzya nga yangatemwa ukusambilila Baibo. Yamwi yano tukasimikilako yangatemwa ukutandika ukusambilila Baibo lilyo kwene sile. Wakwe, wanda umwi pali Cini, umwanaci umwi uku Canada waile atola kabuku kakuti Mungaya ni Nsansa Manda Pe! pali ka sitandi ka mpapulo. Lyene nkazi uwaombanga na ka sitandi wamunenyile ukuti angasambilila Baibo uwila sile. Umwanaci wii wazumiile ukusambilila nupya yapeeline ma namba yakwe foni. Uwanda kwene uwa, umwanaci walembiile nkazi meseji nu kumuzya lino yangatandika ukusambilila. Nkazi wene walondanga ukuti yakatandike ukusambilila pa mpela ya mulungu, lelo umwanaci wene walondanga ukuti yakasambilile uwanda uwalondelilepo. Watiile: “Pasi vino ndaacita.” Fwandi yatandike ukusambilila Baibo uwanda uwalondelilepo pali Cisano. Pa mpela ya mulungu kwene uwa umwanaci wazanyilwe umu kulongana nupya watwalilile ukulunduluka.

5. Uzye ukwiluka kungatwazwa uli ukutandika masambililo ya Baibo? (Loliniko ni vikope.)

⁵ Kwene tutanga twenekele ukuti yonsi yano tukalanda nayo yangalonda ukusambilila wakwe vino cali uku mwanaci wiya. Lelo yamwi yene yangalondekwa insita pakuti yalunduluke. Limwi tungalondekwa ukutandikila ukulanzyanya nayo pi lyasi lino yangatemwa ukuvwa. Lelo ndi cakuti twatwalilila ukulola ivisuma umu muntu wiyo, patanga palengele limwi tungatandika ukusambilila nawe Baibo. A mazwi ci yano tungaomvya pa kuuzya umwi ndi cakuti angatemwa ukusambilila Baibo? Lekini tulole vino aina na ya nkazi yamwi amanya ivya kutandika masambililo ya Baibo yalanzile.

6. Tungacita uli pakuti tunene umuntu aakulondesha ukuvwa ukuti tutwalilile ukulanzyanya?

⁶ Ya kasimikila yamwi na ya painiya yano yuzizye pali vino yakacita pa kutandika masambililo ya Baibo yalanzile ukuti umu ncende zimwi cazipa ukukanaomvya amazwi wakwe, “kusambilila,” “kulasambilila Baibo,” nanti “ukumusambilizya,” lino tukulondolola isambililo lya Baibo. Lelo tulinzile ukulaomvya amazwi wakwe “kulanzyanya,” nanti “kumanya vino Baibo ikalanda.” Pakuti mutwalilile ukulanzyanya nayo limwi mungalanda ukuti, “I ca kuzungusha vino Baibo ikaasuka mauzyo acindame amuli Baibo” nanti “Baibo asi buku sile ilikalanda pa vya mipepele; lelo ikaazwa na antu.” Nupya mungayanena ukuti: “Cisisenda insita ikulu, umu mamineti 10 nanti 15 mungasambilila ivintu ivicindame sana ivingamwazwa umu umi winu.” Mungacita vii ukwaula ukuomvya mazwi akuti “tupangane uwanda” nanti “cila mulungu” aangalenga umuntu aelenganya ukuti alinzile sile ukutwalilila ukukomaana namwe.

7. A lilaci lino yamwi yilwike ukuti iyazana icumi ca muli Baibo? (1 Kolinto 14:​23-25)

⁷ Mwayama uku kulongana. Umu manda ya mutumwa Paulo, yamwi yamanyile ukuti iyazana icumi ca muli Baibo lino yazanyilwe uku kulongana kwa Ina Klistu akutandikilapo. (Belengini 1 Kolinto 14:​23-25.) Vikwene i vikacitika na ndakai. Apya aingi yakatandika ukulunduluka zuwa ndi cakuti yatandika ukuzanwa umu kulongana. A lilaci lino tungayama? Isambililo 10 umwi buku lyakuti Mungaya ni Nsansa Manda Pe! likalanda pa kulongana, lelo mutalinzile ukuloleela ukuti mukafike umwi sambililo lii alino mukamwame ukuzanwa uku kulongana. Mungama umuntu pa muku wa kutandikilapo ukulanzyanya nawe, mungamwama uku kulongana kwa pa mpela ya pa mulungu, limwi mungamunenako umutwe wi lyasi nanti cisinka ica mu Lupungu Lwa Mulinzi.

8. I vyani vino tunganena umuntu wino tukwama uku kulongana? (Ezaya 54:13)

⁸ Lino mukwama umuntu ukuti akazanweko uku kulongana, mwamulondolwela vino ukulongana kwitu kwapusanako ni mipepele yuze. Lino umusambi wa Baibo wazanyilwe uku kulongana kwa Lupungu Lwa Mulinzi, uzizye uwa musambilizyanga ukuti, “Uzye wino ali akutungulula wamanya mazina aa yantu yonsi?” Nkazi wamulondolwelile ukuti tukaezya ukumanya mazina ya antu yonsi umu cilongano, wakwe vino tukamanya mazina yakwe ya lupwa lwitu. Umusambi waweni ukuti vii vyapusine sana nu ku ceici kuno wapepanga. Nupya tungamunenako na pa nzila na yuze pali vino ukulongana kwitu kwapusanako. (Belengini Ezaya 54:13.) Tukalongana pamwi uku kupepa Yeova, kusambilila kuli aliwe, alino nu kukomelezyanya. (Aeb. 2:12; 10:​24, 25) Fwandi ali mulandu uno ukulongana kwitu kukaazwila antu nupya mutaya ivya ntambi. (1 Kol. 14:40) Nupya ivikuulwa vino tukalonganilamo vyapangwa umu nzila iyangupale, i cikalenga ukuti catwangukila ukwika mano kuli vino tukusambilila. Pa mulandu wakuti tusiyika umu vikanza vya miteekele, tusilanda pa vikanza vya miteekele nupya tusilanda iviipe pali vino antu yakasoololapo ukucita. Limwi cingazipa ukutambisha limwi umusambi vidyo iikati I Vyani Vikacitika pa Ng’anda ya Wene? Ukucita vivyo kulalenga amanye vino alazana uku kulongana.

9-10. I vyani vino tungacita pakuti umusambi asininkizye ukuti tutalamupatikizya ukuya Nte nanti ukwasukapo? (Loliniko ni cikope.)

⁹ Yamwi yakasitooka ukuzanwa umu kulongana pano yakaelenganya ukuti tungayapatikizya ukuya ya Nte. Mulinzile ukunena umuntu wiyo ukuti tukapokelela aenyi nupya tusiyapatikizya ukuya ya Nte. Tukapokelela indupwa, ukwikako sile na ana anono. Lino tuli pa kulongana, kusiya ukupatula ana ukuti yaye yonga. Lelo avyazi yakaikala pamwi na ana nu kusambilila pamwi. Cii cikalenga avyazi yamanye vino ana yali na vino yakusambilila. (Malan. 31:12) Tusilenga impiya nanti ukupishamo imbale ya mutuulo. Lelo tukalondela vino Yesu walanzile ati: “Mwapeezilwe sile uwila, namwe mwapeela uwila.” (Mate. 10:8) Limwi mungamunena nu kuti atalinzile ukuzwala ivyakuzwala ivya mutengo sana. Leza akalola umu mwenzo asi vino umuntu akaloleka.—1 Sam. 16:7.

¹⁰ Ndi cakuti wiza umu kulongana, mwacita ivingalenga auvwa ukuti imumupokelela ningo. Mwamumanyisha kuli ya eluda nu ku ina na ya nkazi. Ndi cakuti wayuvwa ukuti imumupokelela, angalondesha ukwizalonganako nupya. Ndi cakuti atakweti Baibo lino muli pa kulongana, mwaomvya Baibo inu mwensi nu kumulanga ivya kulondelamo lino kalanda akulanda ilyasi nanti akutungulula Lupungu Lwa Mulinzi.

LINO MWATANDIKA UKUSAMBILILA NAWE BAIBO

11. Uzye mungalanga uli ukuti imucindika insita ya musambi winu?

¹¹ I vyani vino tulinzile ukulaiusha lino tukutungulula isambililo apa ng’anda ya musambi? Mwacindika insita yao. Wakwe, ndi cakuti mwazumilizyanya ukusambilila pa nsita imwi, mwafikilizya nanti cakuti antu uku incende inu yasikonka insita. Nupya cingazipa ndi cakuti musikulengela lino mwatandika sile ukusambilila pa muku wa kutandikilapo. Aina na ya nkazi yamwi aatungululapo masambililo ya Baibo aingi, yakalanda ukuti cikazipa ukumala zuwa isambililo nanti cakuti umuntu akulonda ukusambilila na vyuze. Nupya mutalandapo sana. Mwaleka umuntu wiyo alondolola vino akuyuvwa.—Mapi. 10:19.

12. Uuyo ci uno tulinzile ukukwata lino tukutandika isambililo lya Baibo?

¹² Lino mwatandika sile ukusambilila Baibo nu musambi, mwamwazwa ukumanya Yeova na Yesu alino nu kuyatemwa. Mungacita vivyo ndi cakuti mukuomvya sana Izwi lyakwe Leza ukucila ukulalanda pali mweineco nanti vino mwamanya. (Mili. 10:​25, 26) Umutumwa Paulo wisile sana mano uku kusambilizya pali Yesu Klistu, wino Yeova watumile uku kutwazwa ukumumanya nu kumutemwa. (1 Kol. 2:​1, 2) Paulo walanzile na pa mulandu uno cacindamila ukwazwa asambi apya ukuya ni miyele isuma, ino tungakolanya kuli goldi, siuva na mawe amutengo. (1 Kol. 3:​11-15) Pa miyele yii icindame paya nu utailo, amano, kwiluka, alino nu kuya na katiinaa kuli Yeova. (Masa. 19:​9, 10; Mapi. 3:​13-15; 1 Pet. 1:7) Mwakolanya vino Paulo wasambilizyanga lino mukusambilizya asambi inu ukuya nu utailo ukome nu kukwata ucuza usuma na Isi wao uwa kwi yulu uwaya nu kutemwa.—2 Kol. 1:24.

13. Uzye tungalanga uli ukuti twateekelela aakalondesha ukuvwa nu kuyuvwikisha? (2 Kolinto 10:​4, 5) (Loliniko ni cikope.)

¹³ Mwakolanya vino Yesu wasambilizyanga ukupitila mukuya ateekele alino nu kuvwikisha asambi inu. Mutauzya mauzyo angalenga umusambi ukuvwa insonyi. Ndi cakuti kuli icisinka cimwi icaticitalila umusambi winu ukuvwikisha, mungalanzyanya pa visinka vyuze nu kwizalanzyanya icisinka cico pa nsita yuze. Ukucila ukupatikizya umusambi, mwamupeelako insita iya kwelenganyapo nu kusenuka muli vino akwelenganya. (Yoa. 16:12; Kolo. 2:​6, 7) Baibo ikakolanya ivisambilizyo vya ufi uku malinga. (Belengini 2 Kolinto 10:​4, 5.) Citanga cangukile umusambi ukuta ukuzumila vino wazumila papo kwene sile, fwandi tulinzile ukumwazwa ukukuula ilinga ipya, kuli kuti ukutaila Yeova. Lyene cilangukila umusambi ukuta ivisambilizyo vino wazumilemo.—Masa. 91:9.

LINO APYA YAZANWA UMU KULONGANA

14. Uzye tulinzile ukulalola uli apya aakazanwa umu kulongana?

¹⁴ Yeova asilonda twaya na kapatulula uku yantu yonsi, asi mulandu na kuno yafuma, intambi zyao, nanti ndi cakuti yakwata impiya nanti foo. (Yako. 2:​1-4, 9) Fwandi tungalanga uli ukutemwa uku yapya aakazanwa umu kulongana?

15-16. Uzye tungazwa uli apya ukuyuvwa ukuti iyapokelelwa?

¹⁵ Yamwi yangazanwa umu kulongana pakuti sile yakalole vino tukalongana nanti limwi umwi aakaikala uku ncende kuno yakaikala angayakomelezya ukuti yakalongane naswe. Fwandi ndi cakuti antu apya iiza umu kulongana, tulinzile ukuyalamuka. Mwaya ni cikuuku lino mukuyazengela, lelo mutalenga yauvwa insonyi. Mwaikala nayo. Mwaomvya Baibo inu ni mpapulo pamwi nayo, nanti mungayapeelako ivintu vii. Nupya mwaelenganya pali vino mungacita pakuti yayuvwa ukuti imuyapokelela. Umonsi umwi uwazanyilwe umu kulongana wanenyile umwina uwamulamwike ukuti uvwanga intete pa mulandu ni vyakuzwala vino wazwite. Umwina wamulondolwelile ukuti ya Nte Yakwe Yeova yaya wakwe vino antu yonsi yaya. Umonsi wii walundulwike nu kubatiziwa, lelo atatazile ailile vino umwina wamunenyile. Lino tukupokelela apya pa kulongana, tutalinzile ukulayuzya mauzyo angalenga yauvwa insonyi.—1 Pet. 4:15.

¹⁶ Tungalenga aenyi ukuyuvwa ukuti ituyapokelela ndi cakuti tuli nu mucinzi lino tukulanzyanya nayo, lino tukwasukapo, na lino tukulanda pali yano tusipepa nayo nanti pali vino yazumilamo. Mutaomvya mazwi angayasosha nanti aangaloleka kwati mukuyasusha. (Tito 2:8; 3:2) Wakwe, tutalinzile ukususha vino yano tusipepa nayo yazumilamo. (2 Kol. 6:3) Aina aakalanda malyasi ya ku yantu yonsi aliyo yalinzile ukucenjela sana. Yakalanga nu kuti iika mano uku yantu asi ya Nte aali umwi iumba lino yakulondolola amazwi nanti ivisinka vino vingatalila antu ukuvwa.

17. I vyani vino tulinzile ukucita ndi cakuti twazana antu aakalondesha “ukuya umu nzila ya ku umi wa pe”?

¹⁷ Cila wanda umulimo wa kusimikila ukuya ukupamviwako sile, nupya tukatwalilila ukulonda antu aakalondesha “ukuya umu nzila ya ku umi wa pe.” (Mili. 13:48) Ndi cakuti twayazana, tutalinzile ukusitooka ukutandika ukusambilila nayo Baibo nanti ukuyama uku kulongana. Ndi cakuti tukucita vivyo, tulayazwa ukuya umu ‘museo ufyenkane uukatwala uku umi.’—Mate. 7:14.