1925​—Ipapita Imyaka 100

ASAMBI YAKWE BAIBO YATAILE UKUTI INSI YALI NU KUYA PALADAISE UMU 1925

Umu 1925 Asambi yakwe Baibo aingi yenekelanga ukuti insi yali nu kuya Paladaise. U mulandu ci? Umwina Albert Schroeder uwizile aya umwi Iumba Ilikatungulula, walondolwile ati: “Twelenganyanga ukuti Aina Klistu apakwe yalaya ukwi yulu nupya aonsi acisinka aaliko mpiti, wakwe Abulahamu, Devedi alino na yauze yali nu kutuutululwa nu kulateeka pano nsi umu Wene wakwe Leza.” Fwandi lino vii vitacitike, aina na ya nkazi yamwi yatoovwike.—Mapi. 13:12.

Asi mulandu na vino yali nu ulanda, Asambi yakwe Baibo aingi yatwalilile ukuya acincile mu mulimo wa kusimikila nupya izile iyamanya ukuti kusimikila ali mulimo ucindame uno Yeova walondanga ukuti yaombe. Lekini tusambilile pali vino yaomvizye ledyo pakuti yasimikile uku yantu aingi, kumwi sile na ku ncende izya kutali.

YAPANGA IMILABASA NA YUZE

Umu 1924, antu aingi yakutike uku mulabasa wa WBBR. Fwandi umu 1925, Asambi yakwe Baibo yapanzile umulabasa na uze umupiipi nu ku Chicago umu Illinois. Izina lya mulabasa uu upya lyali a WORD. Ya Ralph Leffler aomvileko umulimo wa kupanga ledyo yalanzile ukuti: “Usiku ala ikuzuka antu aingi umu ncende izingi nupya izya kutali yakutikanga ku mulabasa uu.” Wakwe, ulupwa longa ulwikalanga apatalimfile makilomika 5,000 na payelile umulabasa, umu Pilot uku Alaska, yakutikeko lino yayuzile sile umulabasa uu. Pa cisila ca kukutikako, ulupwa luu lwalembiile aku mulabasa kalata muno yayataizye pali vino puloglamu yayakomelizye nu kuyazwa ukumanya ivingi pali Leza.

Lupungu Lwa Mulinzi lwakwe Dizemba 1, 1925 lwalondolwile umulandu uno antu aingi yakutikilanga uku mulabasa uu ukuti: “Umubalasa wa WORD wali pa milabasa iyali isuma sana umu United States. Antu aaku Atlantic na ku Pacific, ku Cuba alino nu ku katutu ka Alaska yakutikanga uku mulabasa uu. Antu aingi aatatazile yasambililepo icumi yalondanga ukusambililapo na vyuze pa mulandu na vino yakutikanga uku mulabasa uu.”

Pa nsita kwene yii, Asambi yakwe Baibo yaombeshanga pakuti yaomvya ledyo pa kusimikila ilyasi lisuma umu Canada. Umu 1924 umulabasa wa CHUC wapanzilwe umu Saskatoon, uku Saskatchewan. Uu wali ali mulabasa wa mapepo uwa kutandikilapo umu Canada. Umu 1925 yazanyile incende yuze ikalamba kuno yali nu kukusizya umulabasa uu. Fwandi iuvi lizile ilikala umulabasa uu nupya yakusizye sutudyo umu cikuulwa ca mpiti cino yakazile nu kuzifya umu Saskatoon.

Umulabasa uu walenzile ukuti antu aingi umu ncende izya kutali izya mu Saskatchewan yuvwe ilyasi lisuma pa muku wa kutandikilapo. Wakwe umwi tauni limwi ilyayelile ukutali, mwali aci yakwe ya Graham aalembiile aaku mulabasa pa cisila ca kukutikako ukuti yakulonda impapulo izikalanda pali Baibo. Umwina George Naish walanzile ati: “Vino yalemvile vyalangililanga ukuti yalondeshanga ukusambilila fwandi twayatumile mabuku akuomvya pa kusambilila.” Patalengile aci yakwe Graham yatandike ukunenako yauze ilyasi lisuma pa Wene kumwi sile nu ncende izyayelile umutali.

ICUMI ICICINDAMISHE

Umu Lupungu Lwa Mulinzi lwakwe Maaci 1, 1925 mwali icipande icatangi “Birth of the Nation.” U mulandu ci uno icipande cii cacindamile? Asambi yakwe Baibo yamanyile ukuti Satana wakwata iuvi umwaya imipasi iipe, mipepele ya ufi, mauteeko alino ni vya uculuzi. Lelo ukupitila umu cipande cii, “muomvi mutailwe nupya uwa mano” wazwile aina ukumanya ukuti na Yeova kwene wakwata iuvi nupya iuvi lii lwapusana ni iuvi lyakwe Satana nupya likakaanya Satana alino na aakamulondela. (Mate. 24:45) Nupya umuomvi mutailwe walanzile nu kuti, pa mulandu ni ‘inkondo iyakatwike umwi yulu’ umu 1914, Satana ni viwa vyakwe yayazinzile ukufuma ukwi yulu nupya yayasumbiile pano nsi.—Kuso. 12:​7-9.

Yamwi cayatalile ukuvwikisha ulondolozi uu. Pa mulandu nu ulondolozi uu, icipande calanzile ukuti: “Ndi cakuti aakubelenga Lupungu Lwa Mulinzi luu yakana ukuzumila ivyativilembwamo, yalinzile ukuya ateekele nu kutaila Yeova alino nu kutwalilila ukulamuombela na ucisinka.”

Ya Tom Eyre, ya kolopota (yano ndakai yakaama ukuti ya painiya) aa ku Britain, yalanzile pali vino Asambi yakwe Baibo yayuvwile pa cipande cii lino yatiile: “Aina na ya nkazi yuvwile ningo sana pa ulondolozi uu uwa muli Kusokolola cipande 12. Lino twilwike ukuti Uwene watandike ukuteeka ukwi yulu, tuvwile ningo sana ukunenako antu api lyasi lii ilisuma. Cii calenganga twalondesha ukulasimikila sana nupya catwazwile ukulola ukuti Yeova wali nu kutucitila ivintu ivingi ivisuma uku nkoleelo.”

KUSIMIKILA PALI YEOVA

Ndakai, Ya Nte Yakwe Yeova yamanya ningo mazwi aaya pali Ezaya 43:10 aakati: “Yeova walanda wati: ‘Mwemwe ya nte yane, mwemwe yaomvi yano nasoolola.’” Lelo lino umwaka wakwe 1925 utatala wafika, ilembo lii tutalilandangapo sana umu mpapulo zitu. Lelo ivintu vyali nu kusenuka. Umu 1925, Lupungu Lwa Mulinzi lwalanzilepo api lembo lyakwe Ezaya 43:10 na 12, muli ya magazini 11.

Uku kusila kwakwe Ogasiti umu 1925, Asambi yakwe Baibo yaile uku ukongano wa citungu umu Indianapolis, ku Indiana. Pa mazwi akuzengela aali pali puloglamu ya ukongano, umwina Joseph F. Rutherford walanzile ati: “Itwiza uku ukongano uu pakuti . . . tukomeleziwe nu Mwene, pakuti lino tulaswilila tukaye na maka akutwalilila ukusimikila.” Pa manda yonsi 8 aa ukongano, antu aazanyilweko yakomeleziwe ukulasimikila pali Yeova lyonsi lino yakwata ishuko lya kusimikila.

Pa Cibelusi pa 29 Ogasiti umwina Rutherford walanzile ilyasi ilyatangi “A Call to Action.” Umwi lyasi lino walanzile, walanzile pa mulandu uno umulimo wa kusimikila wacindamila, ukuti: “Yeova wanenyile antu yakwe ati . . . : ‘Mwemwe ya nte yane . . . nene indi Leza.’ Lyene wanenyile aali umwi iumba ati: ‘Imikini icimanyililo icakuti antu yalola.’ Antu sile yano yangakwanisha ukusimikila pali Yeova, a yayo yano akaazwa nu mupasi wakwe pano antu yakwe.”—Eza. 43:12; 62:10.

Pa cisila cakuti umwina Rutherford walanda ilyasi, wabelenzile mazwi yano yalemvile pa kapepala akatangi “Message of Hope,” akalandanga pa Wene wakwe Leza ukuti ali Wene uulalenga “tukaye nu mutende, ukukwata vyonsi vino tukalondekwa, umi usuma, untungwa, alino nu kuya ni nsansa izya manda pe.” Ivyeo vii vizile ivisenulwa umu ndimi izingi nu kupulintwa muli tulakiti. Nupya yapeezile antu matulakiti yaa makopi 40 milyoni.

Asambi yakwe Baibo yataasenwile izina pakuti yaamwa ukuti Ya Nte Yakwe Yeova pa myaka iingi iyalondelilepo. Lelo yatandike ukuvwikisha umulandu uno cacindamile ukulasimikila pali Yeova.

KUSWILILA KULI YANO YALONDANGA UKUSAMBILILA

Lino Asambi yakwe Baibo yayanga yakuvulilako sile umu nsi yonsi, aina aakatungulula yayakomelizye ukuswilila kuli yano yazumile ukupoka ulupapulo nupya alondeshanga ukusambilila. Pa cisila cakwe kampeni ya kusimikila ukuomvya tulakiti yakuti Message of Hope, kapepela kakuomvya pa kulonganaa katiile: “Swililini uku yantu yano mwasimikiile, lelo muye kuli yano yaposileko tulakiti yakuti Message of Hope.”

Kapepela kakuomvya pa kulongana aka mu Januwale 1925 kalanzile pali vino Umusambi wakwe Baibo umu Plano, ku Texas walanzile, ukuti: “Twali ni sana nsansa pali vino yano twasimikileko pa muku wa kutandikilapo yatupokelile lino twaswilileko. Twasimikile umwi tauni ilinono ilyali umu ncende itu pa miku 5 umu myaka 10. . . . Patalengile ukufuma pano nkazi Hendrix na ya mayo yasimikile uku ncende yii nupya yapeezile antu aingi mabuku ukucila vino yayapeezile pa miku yonsi lino yayasimikilanga.”

Painiya umwi walanzile pa yantu amu mpanga ya Panama ukuti: “Antu aingi aakananga ukukutika ukwi lyasi lisuma pa muku wa kutandikilapo, izile iyasenuka lino twaswilile pa muku wakwe ciili na citatu. Umwaka uwafumako naomvile sana mu mulimo wa kusimikila lino naswililanga kuli yano nasimikile pa muku wa kutandikilapo nupya naipakizye ivisuma kuli yamwi yano nasimikilangako.”

KWIKA MANO UKU VYA KU NKOLEELO

Uku kusila kwa mwaka wakwe 1925, umwina Rutherford walembiile ya painiya nu kuyalondolwela vino umulimo wa kusimika waomvilwe umu mwaka uwa na vino yali nu kuomba umu mwaka uwalondelelapo. Watiile: “Umu mwaka uwafumako mwakweti ishuko ilya kuteekezya yayo aali nu ulanda. Umulimo uu iulenga ukuti muye ni nsansa . . . Umwaka ukwiza umalenga mukwate mashuko aakusimikila pali Leza na pa Wene wakwe nu kulangilila ukuti mwemwe ya kapepa yakwe acisinka. . . . Fwandi lekini tutwalilile ukukatusha izwi nu kwimba ulwimbo ulwa kulumbanya Leza witu nupya Umwene witu.”

Uku kusila kwa mwaka wakwe 1925, aina yatantike ukuti yakuzye Bethel iya mu Brooklyn. Fwandi umu 1926 yali nu kutandika ukuule ukalamba uno iuvi litatazile licitepo.