Kucingililwa Kwa Yanaci—Vino Baibo Yalandapo
Umu nsi yonsi, anaci alino na akazyana aingi yakucuziwa. Uzye vikwene ivikumucitikila namwe kwene? Manyini umulandu uno ukucingililwa kwa yanaci kwacindamila kuli Leza alino na vino alacita pali vino anaci yakacuziwa.
Ya Madhu,a aaku India yalanzile ukuti: “Lino nali umwance, tatalenzi wancuzyanga muli vino walandanga alino na vino wacitanga. Lino natwazilwe, yamanguvyala alino na yatatavyala nayo kwene yancuzyanga sana. Yansunganga wa muzya. Cii calenzile ntandike ukwelenganya pa kuikulika.”
Kulingana na vino kaungwe kamwi (World Health Organization) kalanzile “Anaci aingi ndakai yakuyacuzya sana.” Kaungwe kaa kalondelizye nu kuzana ukuti cikaloleka kwati apali anaci yatatu ale pali wenga uwatala wacuziwapo nanti ukupatikiziwa ukucita uzelele.
Ndi cakuti vya musango uu vyatala vyamucitikilapo, limwi mungaelenganya ukuti konsi kuno mwaya, yamwi yangamunena mazwi aipe, kumucuzya nanti ukumupatikizya ukucita uzelele. Nupya cii cingalenga mwaelenganya ukuti antu aingi yakalola ukuti ‘anaci yatacindama.’ Nomba, uzye anaci yacindama kuli Leza?
Leza akalonda anaci ukucingililwa
Uzye Leza Akalola Uli Anaci?
Ilembo: “[Leza] wayaumvile umonsi nu mwanaci.” —Utandiko 1:27.
Vino Cikapiliula: Leza waumvile umonsi nu mwanaci. Akalola ukuti yonsi yacindama. Nupya akalonda ukuti umonsi aatemwa “muci wakwe,” asi ukumupoka untungwa nanti ukulaomvya amazwi aipe nanti ukumucuzya. (Efeso 5:33; Kolose 3:19) Ukwaula nu kutwisika Leza akalonda anaci ukucingililwa.
Ya Maria, aaku Argentina yalanzile ukuti: “Lino nali umwance, ya lupwa yane yalalanga nani pa maka. Lino nali ni myaka 17, yano naombangako incito yanenyile ukuti yamanzinga incito ndi cakuti nakana ukulala nayo. Lino nakuzile, yawane, avyazi, alino na inamupalamano yatancindike. Lyene nizile insambilila pali Yeova,b Kaumba wa vintu vyonsi uwacindika anaci. Ukumanya vii kwalenzile nsininkizye ukuti wantemwa nu kuti nacindama umu manso yakwe.”
I Vyani Ivingamwazwa Ukuta Kusakamala?
Ilembo: “Yacuza yamwi yaluta nu kulemana kwa lupwa.”—Mapinda 18:24.
Vino cikapiliula: Cuza uwa cumi angamutungilila. Munganenako yamwi yano mwataila pali vino mukuyuvwa ndi cakuti mukulola ukuti ukucita vivyo kungamwazwa.
Ya Elif, aaku Türkiye yalanzile ukuti: “Apa myaka 20 ntatazile inenapo umwi ukuti kwali yano yalalanga nani pa maka. Cii calenzile ukuti ntaya ni nsansa alino nu kuya na masakamika. Nomba lino nanenyileko yamwi vino vyancitikilanga, nuvwile ningo sana.
Ilembo: Mwasumbila “amasakamika inu pali aliwe, pano wene akamusakamala.”—1 Petulo 5:7.
Vino cikapiliula: Leza akauvwa ndi cakuti mwapepa kuli aliwe. (Masamu 55:22; 65:2) Pano wamwikako mano nupya angamwazwa ukumanya ukuti mwacindama.
Ya Ana, aaku Belize yalanzile ukuti: “Ukusambilila pali Yeova kwangazwile ukuleka ukuya na masakamika. Lyene ndakai ningapepa kuli Leza nu kumulondolwela vyonsi vino nkuyuvwa. Waya wakwe cuza aakauvwikisya vino nkuyuvwa.”
Uzye Leza Alatala Alenge Ukuti Antu Yaleke Ukucuzya Anaci?
Ilembo: Yeova alacitila “ana asyale na yao afyengwa ivya ulungi pakuti antu avyalwa umu nsi yatakatale yayofye nupya.”—Masamu 10:17, 18.
Vino cikapiliula: Likwene sile Leza wasya ace asisyepo ulufyengo, alino na antu aakacuzya anaci.
Ya Roberta, aaku Mexico yalanzile ukuti: “Ukumanya ukuti likwene sile Leza wasya asisyepo antu aakacuzya anaci alino na ana akazyana kukalenga nauvwa ningo sana. Nupya kwalenga ukuti inje nu mutende wa mu melenganyo..
Nga mukulonda ukumanya vino Baibo ikapeela upaalilo, umulandu uno mungatailila malayo Alino na vino ya Nte Yakwe Yeova yakaazwa antu ukuomvya Baibo, lengini ukuti yace yamutandalile, ukwaula ukumulipilisya.
a Asi mazina yao acumi cumi.
b Yeova ali zina lyakwe Leza. (Masamu 83:18) Lolini Cipande icakuti “Uzye Yeova A Weni?”