Uzye ya Nte Yakwe Yeova Yakalenga Indupwa Ukupaatukana Nanti Ukuya Izilemane?

Swe ya Nte Yakwe Yeova, tukalemanya indupwa zitu kumwi ni zya yantu yanji. Twacindika Leza uwalenga ukuti indupwa ziyeko. (Utandiko 2:21-24; Efeso 3:14, 15) Muli Baibo mwaya ivisinte vino Leza akatusambilizya ivyavwa antu umu nsi yonsi ukuya ni vyupo ivikome nupya ivya nsansa.

Vino ya Nte Yakwe Yeova Yakakomya Indupwa

Tukaezya na maka ukulondela ukusunda kwa muli Baibo, pano kukatwazwa ukuya ya iya asuma, aci yasuma nupya avyazi yasuma. (Mapinda 31:10-31; Efeso 5:22–6:4; 1 Timoti 5:8) Amano aaya muli Baibo yakaavwa ni indupwa umwaya aakapepa ukupusane. (1 Petulo 3:1, 2) Lolini vino asi ya Nte yalanzile yano yawao izile iyaya ya Nte Yakwe Yeova:

• “Mu myaka ya kutandikilako 6 umu cupo citu mwali sile ukulemanila nu kusosyanya. Nomba lino Ivete wizile aya Nte Wakwe Yeova, wizile aya sana nu kutemwa nupya umuteekele. Ukusenuka kwakwe Ivete kwacingilila icupo citu.”—Ya Clauir, aku Brazil.

• “Nakaanyanga ya wane ya Chansa lino yatandike ukusambilila Baibo na ya Nte Yakwe Yeova, pano nelenganyanga ukuti ya Nte yakaonona indupwa. Ukufuma lilyo kwene nailolela ukuti Baibo yavwile icupo citu.”—Ya Agness, amu Zambia.

Lino tukusimikila, tukalanga antu yanji vino ukulondela amano aaya muli Baibo kungayazwa

• Ukusoolola ningo uwa kutwalana nawe

• Ukucingilila icupo cao umu mwaka wa kutandikilako

• Ukuvwana ningo na aku ukwi

• Ukuomvya ningo impiya

• Ukuta ukulemanila

• Ukumanya ivya kwelela

• Ukusambilizya ana

Uzye ndi cakuti umwi watandika ukupepa kuuze cikalenga umu cupo muye intazi?

Kwene insita zimwi cikaleta intazi. Ilyasi lya mu 1998 lino akampani kano yakaama ukuti Sofres kalondelizye, lyalanzile ukuti icupo conga pa vyupo 20 muno wenga pa yatwalane wali aa Nte Wakwe Yeova i cakweti intazi izipisye pa mulandu wakuti wenga pa yatwalane watandike ukupepa kuuze.

Yesu wasoowile ukuti aakalondela ivisambilizyo vyakwe yali nu kucuziwa kuli ya lupwa yao pa nsita zimwi. (Mateo 10:32-36) Will Durant uwasambilila ilyasi lya mpiti walanzile ukuti umu nsita ya uteeko wa ina Loma, “aina Klistu yayapeelanga umulandu wa kumala ivyupo,”a nupya ukwene uli mulandu uno yakapeela ya Nte Yakwe Yeova yamwi ndakai. Nomba uzye cii cikupiliula ukuti ya Nte Yakwe Yeova yakaleta intazi umu vyupo?

Lino yapingulanga pa mulandu uno antu yakapeela ya Nte Yakwe Yeova uwa konona indupwa, Icilye Icikalamba Icikalolekesya pa Nsambu Zya Yantu (European Court of Human Rights) calanzile ukuti ilingi ya lupwa aasi ya Nte aakaleta intazi pa mulandu wakuti “yasizumila nu kucindika upefi wakwe ya lupwa yao uwa kukwata untungwa wa kuomvya vino yakasambilila kuno yakapepa.” Icilye calanzile nu kuti: “Intazi yii yaseeka sana uku yatwalane yonsi aakapepa ukupusane nupya vikacitikila na ya Nte Yakwe Yeova kwene.”b Nomba nanti icakuti ya Nte Yakwe Yeova yakakwata intazi yii, yakaezya ukulondela ukusunda ukwaya muli Baibo ukwakuti: “Mutawezezya uyi pa uyi. . . . Ndi cakuti cingacitika, mwaezya apapezile amaka inu ukuya amutende ku yantu yonsi.”—Loma 12:17, 18.

Umulandu uno ya Nte Yakwe Yeova yazumila ukuti yalinzile sile ukutwalila nanti ukutwalilwa umu upefi wao

Ya Nte yakalondela vino Baibo ikalanda pa kutwalila sile “umu Mwene,” kuli kuti, ukutwalana nu muntu uwakwata ivizumilo ivili vimwi nayo. (1 Kolinto 7:39) Isunde lii lyaya muli Baibo nupya likaazwa. Icipande cimwi ica mu 2010 umu lupapulo lumwi (Journal of Marriage and Family) calanzile ukuti “atwalane akuti yakapepa ukuli kumwi, ukucita ivili vimwi, nu kuzumila ivili vimwi” yakauvwana ningo umu vyupo vyao.c

Lelo ya Nte yasikomelezya yano yakapepa nayo ukupaalukana na ya wao asi ya Nte. Baibo ikati: “Ndi cakuti umwina wakwata umuci aatataila nupya umuci akulonda ukwikala nawe, atalinzile ukumusya; nupya ndi cakuti umwanaci wakwata iya aatataila nupya umonsi akulonda ukwikala nawe, atalinzile ukumusya.” (1 Kolinto 7:12, 13) Ya Nte Yakwe Yeova yakalondela isunde lii.