Miomvezye ya Mpiya
Antu aingi yacefyako intazi zya mpiya kupitila mukuomvya ningo ivisinte vya muli Baibo.
MWATANTIKA NINGO
CISINTE CA MULI BAIBO: “Amapange ya muntu wino watekela yakamuletela umuzano, lelo yayo akazakantika mu kuomba kwao, yasikwata ivivule.”—Mapinda 21:5.
VINO CIKUSENULA: Mulinzile kutantika ningo nu kulondela vivyo kwene vino mwatantika. Fwandi mulinzile ukutantika ningo lino mutatala mwakala vimwi. Mwaiusya ukuti mutange mukale vyonsi vino mukalonda. Fwandi mwaomvya ningo impiya zinu.
VINO MUNGACITA:
Mwalondela vino mwatantika. Mwalembela limwi ivintu vino mukulonda kukala. Lyene mwapingulapo impiya zino mulaomvya pa vintu vivyo. Ndi cakuti mwaomvya impiya uku cintu cimwi ukuluta pali zino mwapingwilepo, mulinzile ukuomvya zino mwali nu kukalila icintu cuze. Wakwe, nga mwaomvya impiya zyakukalila usu ukuluta pali zino mwapanzile ukuti mulaomvya, mungatola zino mwisile izya kuomvya pa vintu ivisi vicindame—wakwe, izyakusenda pa kuya umu kucina kumwi.
Mutaakongola na patalinzile. Nga mungakwanisya, mutakongola. Cingazipisya ndi cakuti mukusunga impiya ukulingana ni vintu vino mukulondekwa. Ndi cakuti mwasenda ivintu ivyakulipila pa mpela ya mwezi, mwasininkizya ukuti mwalipila zyonsi pakuti mutakalundepo na zuzye kuluta pali zino mwakongwile. Nga muli ni nkongole, tantikilini limwi lino mulawezya, nupya mwaezya na maka ukucita vivyo kwene.
Masambililo yamwi yakati ndi cakuti umuntu wakala ivintu pa nkongole kuomvya kadi ya ku Banki yakaiza yakulipila impiya izingi. Fwandi nga mwakwata kadi ya ku Banki mwaiomvya mu nzila isuma.
MWATALUKA KU MIYELE IIPE
CISINTE CA MULI BAIBO: “Umukasu asyalima apa nsita isuma. Acino apa insita ya uzombozi, ndi wene waya umu calo, pasi cino angazana.”—Mapinda 20:4.
VINO CIKUSENULA: Ukasu ungalenga umuntu ukuya umupiina. Fwandi mwaombesya, nupya mwaezya ukuomvya ningo impiya pa kuti mukakwate vino mukalonda uku nkoleelo.
VINO MUNGACITA:
Mwaombesya. Ndi cakuti mukuombesya nu kuya acisinka pano mukaombela cilalenga ukuti akalamba yancito yamutemwe nupya yalalondesya ukuti mwayaombela.
Mwaya ni cisinka. Mutalinzile ukwiila amwingizya incito. Nga musi na ucisinka cilalenga izina linu ukononeka nupya cilamutalila lino mulaalonda ukwingila incito kuze.
Mutaya apunuke. Kutemwisya impiya kungonona umi na ucuza winu na antu yauze. Mwaiusya ukuti ulupiya asi ali cintu cicindamisye umu umi wa muntu.
VISINTE NA VYUZE IVYA MULI BAIBO
Welengini Baibo pa intaneti, mu ndimi izingi sana pa jw.org
MUTAONONA INSITA NI VIKWATWA VINU UKU VINTU IVYA SILESILE.
“Umukolesi wensi pamwi nu mupunuke, yakaisumba aeneco umu ulanda. Ukupunuka nu kulala ilolo vilalenga kuti usizye.”—MAPINDA 23:21.
MUTASAKAMIKWA SANA PA MPIYA.
“Mutasakamala pali vino mumalya pakuti muye nu umi, nanti pa vizwalo vyakuzwika imili inu.”—MATEO 6:25.
MUTAYA NU MUVIMBILA.
“Amanso yamakumbukila yakalondelela ivyuma, ukwaula nu kumanya ukuti upina ulayalondelela.”—MAPINDA 28:22.