LINO IVINTU IVIPISYE VIKUCITIKA MUNO NSI

2 | Mwacingilila Ivintu Vinu

UMULANDU UNO CACINDAMILA

Cila wanda antu aingi yakacula sana pakuti yakwate vino yakulondekwa. Ica ulanda icakuti, ni vintu iviipe ivikacitika muno nsi vikalenga citalileko. U mulandu ci?

Ndi cakuti umu ncende imwi mwacitika intazi, cikalenga ukuti ivintu ivili wa vyakulya nu mwakwikala, ukukoma imitengo.
Iviipe vimwi nga vyacitika, vingalenga ukuti yamwi incito zisile nanti ukuyacefezyako impiya zino yakafola.
Mazanzo yangalenga ukuti mabizinesi, mang’anda, ni vintu vyuze vino antu yakwata vyononeke, na cii cingalenga yaye apiina.

Vino Mulinzile Ukumanya

Ndi cakuti mukuomvya ningo impiya, cilalenga mukaye aipekanye nga kwacitika uzanzo.
Mwaiusya ukuti ivintu vino mwakwata; wakwe impiya ni vintu vyuze, vingata ukuomba.
Impiya zitanga zikale insansa nu mutende pa ng’anda.

Vino Mungacita

Baibo ikati: “Fwandi nga tukweti ivyakulya ni vyakuzwala, twateeka imyenzo kuli vivyo kwene.”—1 Timoti 6:8.

Ukuteeka imyenzo kuli vino tukweti, cikapiliula ukuya ni nsansa ku vintu kwene vino tukweti. Nupya ukucita vii kwacindama sana na lino tukweti impiya izinono.

Pakuti mumanye vino mungateeka umwenzo kuli vino mukweti, limwi mungalondekwa ukusambilila vino mungacefyanya ivya kukala. Ndi cakuti lyonsi mukulonda ukukala ivintu vino mutanga mukwanisye, cingalenga mwakwatilako intazi.

VINO MUNGAZIZIMIZYA Kupanda Mano Ukungamwazwa

Mungaicingilila uku viipe ndi cakuti mukulondela vii

KUCEFYANYA IVYA KUKALA

Kucefyako Ivya Kukala

Mutakala ivintu vino musikulondekwa na sana. Mwayuzya ukuti: ‘Uzye umu cumi nkulondekwa ukukala motoka? Uzye ningalimako ka gadeni?’
Lino mutaatala mwakala cimwi mulinzile ukuyuzya ukuti: ‘Uzye nkulondekwa icintu cii? Uzye namakwanisya ukukala?’
Mwalenga uteeko nanti kaungwe kuti yamwazwe ndi cakuti ku mpanga iyo yakacita vivyo.

Ya Gift yalanzile iyati: “Twikazile pansi nga ulupwa itulola vino tukaomvya impiya nu kufumyako nanti ukucefyanya ivya kuizanzya ivikatusendela ulupiya. Nupya twatandike nu kulakala ivyakulya ivilinge.”

KULEMBA VINO MUKULONDA UKUKALA

Kulemba Vino Mukulonda Ukukala

Baibo ikati: “Amapange ya muntu wino watekela yakamuletela umuzano, lelo yayo akazakantika mu kuomba kwao, yasikwata ivivule.” (Mapinda 21:5) Ndi cakuti mukulemba vino mukulonda ukukala cilamwazwa ukuti mutapitilila pa mpiya zino mukweti.

Ica nkoleelo, mwalemba ulupiya luno mukwenekela ukukwata pa mwezi.
Alino mulemba impiya zino mukaomvya cila mwezi nu kulola ivintu vino mukaomvezyapo impiya zizyo.
Lyene mulinganya icipendo ca mpiya cino mukweti pa mwezi ku cipendo cino mukaomvya cila mwezi, nu kulola nga mungacefyako vimwi nanti kufumyapo pakuti cilingana ni impiya zino mukweti.

Ya Kalosi yalanzile ukuti: “Cila mwezi tukalemba impiya zino tukakwata na vino tukulonda kukala. Tukaezya ukusungako ulupiya lumwi ulwa kuomvya kuli vino vingacitika ukwaula ukwenekela alino ni zya kuomvya ku kukalilako vimwi vino tukulonda ukukala uku nkoleelo. Ukucita vii kukalenga tutasakamikwa sana pano tukamanya vino tulaomvya impiya zizyo.”

MUTAKONGOLA / MWASUNGA IMPIYA

Mutakongola / Mwasunga Impiya

Mwatantika ningo pakuti mutakongola sana. Nga cingacitika mutakongola sile. Lelo mwaezya ukusunga ulupiya ulwa kukalila vino mukulondekwa.
Mwasunga kapiya kamwi pambali cila mwezi kakuomvya ukukalilako vino mukulonda ku nkoleelo nanti kano mungaomvya kuli vino vingacitika ukwaula kwenekela uku nkoleelo.

MWAOMBESYA / MWATEMWA INCITO IINU

Baibo ikati: “Ukuombesya kukawezezya umuzano pee.”—Mapinda 14:23.

Mwaombesya / Mwatemwa Incito Iinu

Mwatemwa incito ino mukaomba. Nanti icakuti incito iyo asi ino mwalondanga, ikamipeelako kapiya kakuomvya.
Mwaombesya nupya mwatailwa. Ukucita vii kungamwazwa ukutwalilila ukuomba incito ino mukaomba, nupya incito nga ingasila cingamwangukila ukuzana yuze.

Ya Dimitili yalanzile ukuti: “Nkaomba incito yonsi ino yaloleka nanti icakuti incito iyo ntaitemilwe nupya kalupiya kakufola a kanono. Natailwa nupya nkaomba ningo incito kwati sile incito yane ino nkuomba.”

Ivingamwazwa ukuzana incito . . .

Mwaipelesya ukulonda incito. Mwauzya makampani yamwi nga yakweti incito ino mungaomba nanti yatalanzile ukuti yakulonda ancito. Nupya mwanenako ni vyuza na ya lupwa ukuti mukulonda incito.
Mwazumila incito yonsi iyaloleka. Limwi mutanga muzane incito ingakwata vyonsi vino mukulonda.