Uzye Namwe Mwakwata KAPATULULA?
Kapatulula kaya wa kazizi akakaleta ulwale. Kakaleta sana intazi ku yantu nupya yatanga yamanye nu kumanya ati iyalwala.
Antu yasiya sile na kapatulula ku yantu yano yapusanayo impanga, mutundu, nanti akavwanga ululimi lupusane, lelo yakaya na kapatulula nu ku yantu yano yapusana nayo mipepele, nanti yano yapusana nayo ivyuma. Antu yamwi yakapingula iviipe pa yantu yauze pa mulandu nu musinku, masambililo, kulemala, nanti sile vino yakaloleka. Nomba ala yacili yakwelenganya ukuti yatakwata kapatulula.
Uzye namwe mungaya na kapatulula? Sweingi tungalola kapatulula mu yantu yauze. Nomba cingatutalila ukumanya ukuti naswe twakwata kapatulula. Icisinka icakuti swensi kwene twakwata kapatulula nanti sile kanono. Uwasambilila sana pa mikalile ya antu David Williams walanzile ukuti: Ndi cakuti antu yakaelenganya iviipe api iumba limwi ilya yantu, lyene yakomenkana na antu yamwi amwi iumba kwene lilyo, “yakacitila ivintu ivisuma antu yayo nupya munzila isuma, ukwaula nu kumanya ati avino iyacita.”
Wakwe, ya Jovica aakaikala ku mpanga ya Balkan kuno kwaya iumba limwi ilya antu yano aingi yapata, yalanzile iyati: “Nelenganyanga ukuti mwi umba lii mutanga muye umuntu musuma. Nomba ntamanyile ukuti nakweti kapatulula, pano nelenganyanga ukuti vino namanyile ivyacumi.”
Mauteeko aingi yakaikako masunde pakuti yamale kapatulula ka kanda alino na kapatulula ka misango yuze. Nanti ciye vivyo, kapatulula katwalilila ukuyako. U mulandu ci? Pano masunde yayo yakalanda sile pali vino umuntu akacita. Yatanga yasenule vino umuntu akaelengaya na vino akayuvwa. Nupya kapatulula kakatandikila mu mwenzo wa muntu. Uzye tungacimvya kapatulula? Uzye kwaya icingafumyapo kapatulula?
Ivipande ivilondelilepo vimalanda pa visinte 5 ivyavwa antu aingi ukuta ukuya na kapatulula mumelenganyo alino nu mu myenzo yao.