Mwapanga Ivyuza Na Antu Apusanepusane

Intazi Iyayapo

Ndi cakuti tukutaluka antu aya umu maumba yano tutatemwa, tungaya na kapatulula. Nupya ndi cakuti tukupanga sile ucuza na antu aya wakwe sweswe, tungatandika ukulola kwati sweswe sile tukaelenganya ningo, ukuyuvwa ningo, nu kucita ningo.

Cisinte ca Muli Baibo

“Yulini myenzo inu kuno tuli.” —2 KOLINTO 6:13.

Uzye icikomo cii cikutusambilizya cani? “Mwenzo” witu ungalozya kuli vino tukaelenganya. Ndi cakuti tuli sile nu kutemwa uku yantu aya wakwe sweswe, tungaatemwa sile antu yayo kwene casila. Pakuti vii vitatucitikila, tulinzile ukuitemelwa ukupanga ivyuza uku yantu yano tutakolana nayo.

Vino Ukupanga Ivyuza na Antu Apusanepusane Kukaazwa

Nga twamanya ningo antu yamwi, tukazana umulandu uno yakacitila ivintu vimwi vino swemo tusicitako. Nupya ndi cakuti twayatemwa, tukailila nu kuti twapusana nayo. Tukatandika ukuyalola ukuti yacindama, nupya tukaya sana na mizu kuli aliyo.

Lolini ivyacitikile ya Nazaré. Pa nsita imwi yali na kapatulula ku yantu afumanga uku mpanga zyuze. Yalondolwile icayazwilizye ukuta ukucita vivyo, yatile: “Natandike ukuzanwa alino nu kuomba na antu afumile uku mpanga zyuze. Nazanyile ukuti antu yaa yapusine sana na vino antu ya ku mpanga itu yalandanga pali aliyo. Ndi cakuti wamanya antu akwata intambi zipusaneko, kukaya ukuzana ukuti antu yayo yataya icilicimwi, nupya ala umatandika ukuyatemwa nu kuyacindika wenga na wenga.”

Vino Mungacita

Mwaezya ukukwatako insita yakulanda na antu afuma uku mpanga zyuze, akwata inkulilo yuze, nanti aya umwi iumba lya yantu yano mutakolana. Mungacita vii

Mungayanena ukuti yamulondolweleko panono pali aliyo.
Mungayama ukukulila pamwi ivyakulya
Mwakutikisya lino yakumulondolwela pa umi wao, nupya mwaezya ukulola vimwi ivicindame sana kuli aliyo.

Ndi cakuti mwamanya ivyayacikila, cingalenga mumanye cino yakacitila ivintu vimwi, na cii cingalenga muyatemwe alino nu kutemwa antu yauze aku ncende yao.

IVYACITIKILE YAMWI IVINGATWAZWAYa Kandasamy na ya Sookammah Aku Canada

“Twakuliile uku South Africa lino kwali sana akapatulula ka nkanda. Yapatikizyanga antu ankanda iliimwi ukulaikala sile uku ncende yonga, na cii calenzile ukuti kuye sana kapatulula ka nkanda. Tutali azungu, nupya twapasile azungu pa mulandu wakuti yamwi yatucitiile iviipe. Pa nsita imwi, twalolanga kwati tutali na kapatulula, lelo twizile ituzana ukuti twali na kapatulula.

“Twaombisye pakuti tuzifye imiyele itu nupya twapanzile ivyuza na antu yano twapusine inkulilo. Lino twatandike ukuvwana na azungu, twazanyile ukuti kwali iviingi vino twakoline nayo. Twapitanga umu vintu ivili vimwi umu umi nupya twakwata intazi zili zimwi.

“Alino twamileko na azungu yamwi atwalane ukuti twaikala nayo umu ng’anda itu pa nsita imwi. Twamanyine ningo nayo. Lino papisile insita inono twatandike ukuyalola ukuti ivyuza vitu nupya twali icili cimwi. Lyene twatandike ukulola ukuti azungu yonsi yaya ningo sana.”