Mulandu Uno Cacindamila Ukumanya Ukuti Kwaya Kaumba

U mulandu ci uno cacindamila ukumanya nga kwaya kaumba? Pano ndi cakuti mwamanya ukuti Leza wa maka yonsi akuno waya, cilalenga ukuti mwalondesya ukuzana usininkizyo ukalangilila ukuti amazwi aya muli Baibo yafuma kuli aliwe. Nupya ndi cakuti mwataila vino Baibo ikalanda, mulaipakizya ivyalondelelapo:

Mulaya ni insansa mu umi

BAIBO IKATI: ‘Leza wamucitiile ivisuma, wamupeezile imvula ni nsita ya kuzombola, alino ni vyakulya ivingi nupya walenzile imyenzo inu ukuya sana ni nsansa.’—Milimo 14:17.

VINO CIKAPILIULA:Vintu vyonsi vino mukaipakizya muno nsi u wila kufuma kuli Kaumba. Mulataizya sana pa vintu vivyo ndi cakuti mwamanya vino uwamupeela ivintu vivyo wa mwikako amano.

Mulazana ukupanda mano ukusuma ukungamwazwa ndakai

BAIBO IKATI: “Umamanyanga ivintu visuma ivilungame ivyampomvu, umamanyanga na vino uli nu kucita.”—Mapinda 2:9.

VINO CIKAPILIULA: Vino Leza aali Kaumba winu, wamanya ivingalenga muye ni nsansa. Ndi cakuti mukubelenga Baibo mulasambilila ivintu vingi ivingamwavwa mu umi winu ndakai.

Mulazana amasuko ku mauzyo yano mwakwata

BAIBO IKATI: ‘Ulazana vino ukumanya Leza kwaya.’—Mapinda 2:5.

VINO CIKAPILIULA: Ndi cakuti mwamanya ukuti Kaumba akuno waya, cilamwavwa ukuzana amasuko ku mauzyo acindamisye wakwe: U mulandu ci uno twayeelako? U mulandu ci uno tukaculila? I vyani ivikacitika uku muntu nga wafwa? Mungazana amasuko muli Baibo.

Mungataila ivilacitika uku nkoleelo

BAIBO IKATI: “‘Pano nimanya vino mpanzile ukucita pali mwemwe, i vyalanda Yeova. Napanga ukumuletela umutende asi uyi foo, nu kumupeela umi usuma uku nkoleelo alino nu upalilo.’”—Yelemiya 29:11, NWT.

VINO CIKAPILIULA: Leza walaya ukuti alafumyapo iviipe vyonsi, kucula ni imfwa kwene. Ndi cakuti mwataila amalayo yaa yano Leza walaya cilamwavwa ukulazizimizya intazi zino mukakwata ndakai.

VINO UKUTAILA UKUTI KWAYA KAUMBA KWAZWILIZYE YAMWI

Ya Cyndi, aa ku U.S.A yalanzile ukuti: “Nkauvwa ningo sana ndi cakuti nalola vino Leza akatwavwa mu umi witu, wakwe akatwavwa ukumanya vintu vicindamisye mu umi, vya kuvwana na antu yanji, alino na vino tungaya ya cuza yakwe.”

Ya Elise, aa ku France yalanzile ukuti: “Ukuzumila ukuti kwaya Kaumba kukangavwa ukuya nu umi usuma nu kulaipakizya. Kufuma pano namanyiile Leza nsiuvwa citendwe pano nakwata ivingi vyakusambilila pali aliwe, pa uumbo wakwe na pi Izwi lyakwe.”

Ya Peter, aa ku Netherlands yalanzile ukuti: “Kuomvya vino Kaumba witu akatusambilizya muli Baibo kukalenga naaya sana ni nsansa, kukangavwa ukukanalondelezya iviipe muli yauze, ukwika sana mano kuli vino nkacita, alino nu kuteeka umwenzo. Nupya kwangavwa ukuya umuvyazi musuma.”

Ya Liz, aa ku Estonia yalanzile ukuti: “Lino ntaatala nasambilila pali Leza nikaanga sile mano ku kulya nu kulaala nupya cantalilanga sana ukuomba milimo mu nsita. Ntaipakizyanga umi! Lyene nkalola ukuti umi u wila usuma sana uno tulinzile ukulaipakizya nu kucindika.”

Ya Adrien, aa ku France yalanzile ukuti: “Nkasakamikwa sana nomba ukumanya ukuti iviipe vyonsi, ulufyengo, nu kucula vilasila, kukaangavwa ukuzizimizya.”