ISAMBILILO 02

Baibo Yalaya Ukuti Ivintu Vilazipa Uku Nkoleelo

Vino Mungapulinta

Antu umu nsi yonsi yakakwata intazi izikalenga yauvwa ulanda, kusakamikwa alino nu kuwaika. Uzye mwatala mwakwatapo intazi iyalenzile muyuvwe wakwe vii? Limwi mukucuula pa mulandu nu kulwala nanti limwi wino mwatemwa watafwa. Mungayuzya mweineco muti, Uzye umi ulatala uzipe? Baibo ikaasuka iuzyo lilyo.

1. I vyani vino Baibo yatulaya ukuti i vilacitika uku nkoleelo?

Baibo ikatulondolwela umulandu uno umu nsi mwayela sana intazi, nupya ikatunena ni lyasi lisuma ilyakuti likwene sile Leza wasya asisyepo intazi kwene zyonsi zii. Malayo ya muli Baibo yangamupeela “umi usuma uku nkoleelo alino nu upalilo.” (Belengini Yelemiya 29:11, 12, NWT.) Malayo yayo yakatwazwa ukuzizimizya intazi, ukuya ni nsansa ndakai alino nu ku nkoleelo.

2. Uzye Baibo yatulaya ukuti umi ulaya uli uku nkoleelo?

Baibo ikalanda ukuti “kutalaya imfwa nupya. Kutalaya kulosya nanti kulila, nanti kuvwa kuwaika.” (Belengini Kusokolola 21:4.) Intazi izikalenga antu ukucuula ndakai, izili wa nzala, ulufyengo, ukulwala nu kufwa zilafumiziwapo. Baibo yatulaya ukuti antu yalaipakizya umi amanda pe umu Paladaise pano nsi.

3. Mungasininkizya uli ukuti malayo amuli Baibo yalafikiliziwa?

Antu aingi yakaenekela ivintu ivisuma ukucitika, nomba yatasininkizya ndi cakuti vintu vivyo vilacitika. Vino Baibo yalaya vyapusanako. Tungataila vino Baibo ikalanda ndi cakuti ‘tukulondelezya sana umu malembelo.’ (Milimo 17:11) Lino mukusambilila Baibo, mulaaisoolwela mweineco ndi cakuti mulinzile ukuzumila vino ikalanda pa vilacitika uku nkoleelo.

LONDELEZYINI NA VYUZE

Sambililini pa vintu vimwi vino Baibo yalaya ukuti i vilacitika uku nkoleelo. Lolini na vino malayo aya muli Baibo yakwazwa antu ndakai.

Vikope ivipusanepusane ivili pa cikope conga: Vikope viili vipusane, conga cikulangilila vino ivintu vili ndakai, cuze cikulangilila vino ivintu vilaya lino malayo amuli Baibo yalafikiliziwa. Ivikope kwene vii vili na pisika.

4. Baibo yatulaya ukuti tulikala manda pe ukwaula ukucuula

Lolini malayo alondelelapo aya muli Baibo. A malayo ci yano mwatemwa sana? U mulandu ci uno mwayatemelwa?

Belengini malembelo aali pa ulayo onga na onga, alino mulanzyanye mauzyo yaa:

Uzye mukulola ukuti malembelo yaa yangamwazwa? Uzye yangazwa ya lupwa inu na ya cuza inu?

Elenganyini ukuti mukwikala umu nsi muno:

KUSI ALIWENSI . . .	ANTU YONSI YALAIPAKIZYA IVINTU VII . . .
aalauvwa ukuwaika, kucepelwa amaka pa mulandu nu ukote nanti ukufwa.—Ezaya 25:8.	yalalola atemwikwa yao afwa, aalatuutuluka nu kuya nu umi pano nsi.—Yoani 5:28, 29.
aalauvwa ukulwala nanti ukulemala.—Ezaya 33:24; 35:5, 6.	yalaya nu umi usuma na maka.—Yobo 33:25.
aalafyengwa.—Ezaya 32:16, 17.	yalakwata ivyakulya ivingi, mang’anda asuma alino ni ncito isuma.—Masamu 72:16; Ezaya 65:21, 22.
aalacuula pa mulandu ni nkondo.—Masamu 46:9.	yalaikala umutende.—Masamu 37:11.
aalacula pa mulandu na melenganyo nanti ukwiusya ivintu iviipe ivyacitike mpiti.—Ezaya 65:17.	yalikala manda pe ukwaula ukucuula.—Masamu 37:29.

Akalumendo akali kalwale ikapola nupya kakukuukula ya nyina.

Uwali umukombe lyene umulumendo nupya akweti amaka akupisya na wiluba umuli umusaalu.

5. Malayo amuli Baibo yangazwa umuntu ukusenuka

Antu aingi yakatoovoka nanti sile ukusoka pa mulandu ni ntazi zino yakakwata. Yamwi yakaezya na maka ukusenula ivintu pakuti vizipe. Lolini vino ulayo wa muli Baibo uwakuti ivintu vilazipa ukwazwa antu ndakai. Tambini VIDYO, alino mulanzyanye mauzyo atiyalondelelapo.

VIDYO: Nalondanga Ukulesya Ulufyengo (4:07)

Vikope ivipusanepusane ivili pa cikope conga: Vikope ivya muli vidyo yakuti ‘Nalondanga Ukulesya Ulufyengo.’ 1. Cikulangilila ya Rafika yakuzombola kotoni na antu ankanda ili imwi ni yao ala yacili a kakazyana. 2. Ya Rafika yali ni nsansa pa kulola antu ankanda izipusanepusane yakuvwana lino yaya uku ukongano wakwe ya Nte Yakwe Yeova pa muku wa kutandikilapo.

Wakwe vino twatamba muli vidyo, u lufyengo lwa musango ci luno ya Rafika yatatemilwe?
Nanti cakuti ulufyengo lulo lutafumiziwepo, uzye Baibo yayazwile uli?

Vino Baibo yalaya ukuti i vilacitika uku nkoleelo vingatwazwa ukukanatoovoka nu kuzizimya intazi. Belengini Mapinda 17:22 na Loma 12:12, alino mulanzyanye mauzyo yaa:

Uzye vino Baibo ikalanda pa vilacitika uku nkoleelo vingamwazwa uli ukusenula umi winu ndakai? U mulandu ci uno mwalandila vivyo?

YAMWI YAKALANDA UKUTI: “Vino Baibo yalaya pa vilacitika uku nkoleelo vitange vicitike.”

U mulandu ci uno icicindamila ukuti mulondelezye mweineco pakuti mumanye icisinka?

VINO TWASAMBILILA

Muli Baibo mwaya malayo aingi aakalanda pa vilacitika uku nkoleelo na cii cikalenga tutaile ukuti ivintu vilazipa nu kuya ni nsansa ndakai.

I Vyani Vino Mwasambilila?

U mulandu ci uno antu yalinzile ukumanyila malayo yakwe Leza?
Uzye Baibo ikalanda ukuti i vyani vilacitika uku nkoleelo?
Uzye ukutaila ukuti ivintu vilazipa uku nkoleelo kungamwazwa uli ndakai?

Ezyini vii

Mungamanya malayo amuli Baibo ndi cakuti mukubelenga malembelo ali umwi sambililo lii.

Vyuze:

vyuze vino vino mungezyako

LONDELEZYINI

Sambililini vino malayo amuli Baibo yangamwazwa ndi cakuti mwakwata intazi.

“Mungacita Uli Pakuti Mutaile Ivilacitika Uku Nkoleelo?” (Zyukini!, Epuleo 22, 2004)

Sambililini vino ukutaila ivilacitika uku nkoleelo kungazwa yano yalwala ulwale uwipisye.

“Uzye Baibo Ingamwazwa Ndi Cakuti Mwalwala Ulwale Uwipisye?” (Cipande ca pa intaneti)

Lino mukutamba vidyo ii ya nyimbo, elenganyini ukuti mwemo nu lupwa lwinu mukuipakizya umi umu Paladaise ino Baibo yalaya.

Elenganyini Umi mu Nsi Ipya (3:37)

Belengini pali vino umi wa muntu umwi uwalwisyanga ukuti vintu visenuke wasenwike lino wasambilile pali vino Baibo ikalanda pa vilacitika uku nkoleelo.

“Ndakai Nsiyuvwa Ukuti Ningasenula Insi” (Lupungu Lwa Mulinzi, Julai 1, 2013)