Inengu 12

LOLA ivizao vino aonsi yaa yasenzile. Lola icimukungo ca myangazi cino yasenzile. Cati-cifina icakuti aonsi yaili aliyo yati-yacipinga. Nupya lola amaku na ma pomegeleneti. Uzye ivizao ivisuma vii yavifumizye kwi? Yavifumizye uku mpanga ya Kenani. Iusya ukuti uku mpanga ya Kenani akuno Abulaamu, Isaki na Yakobo iikalanga. Nomba, pa mulandu ni cipowe icaponyile kuuku, Yakobo nu lupwa lwakwe yaakukiile uku Eguputo. Nomba paa, lino papita imyaka 216, Mose akutungulula aina Izlaeli ukuswilila uku mpanga ya Kenani. Iyafika apa ncende ino yaka-ama yakuti Kadesyi iyaya umu lwanga.

Umu Kenani mwikalanga antu aipe cuze. Lyene Mose watumile inengu 12, nupya waneenyile yano watumile ati: ‘Kalondelezyini mumanye ndi cakuti kwaya antu aingi kuuku, nu kulola ndi cakuti yaakwata sana amaka. Muce mulole ndi cakuti impanga kwene ii yaya nu muvundo. Nupya mutaca-mwilile ukuleetako iviseekwa.’

Lino inengu zyawezile, zyaneenyile Mose ukuti: ‘I mpanga iisuma cuze.’ Na pakusininkizya vivyo, zyalanzile Mose iviseekwa. Nomba inengu 10 zyene zyalanzile ukuti: ‘Antu aakaikala kuuku a malamba nupya yaakoma cuze. Yalatumoola ndi cakuti twaya umukupoka impanga iiya.’

Lino aina Izlaeli yuvwile amazwi kwene yaa, intete zyayalemile. Yaalanzile yati: ‘Nga caziifile itufwila uku Eguputo nanti sile ukufwila mukwene umu lwanga. Yalatumoola ndi twaya umu kulwa inkondo, nupya yalalema yamama itu na ana. Lekini tusoolole intunguluzi yuze, iyakuti ipyane Mose, muleke tuswilile uku Eguputo!’

Nomba inengu ziili zyene zyataaile Yeova, nupya zyeziizye ukuteekezya antu. Amaziina ya nengu ziili kwene zii a Yoswa na Kalebu. Aonsi yaa yalanzile yati: ‘Mutoopa. Yeova ali naaswe. Citalatutalila ukupoka impanga.’ Nomba, antu yaakanyile ukuvwa. Yaalondanga nu kumoola Yoswa na Kalebu.

Cii, calenzile ukuti Yeova asoke sana, nupya waneenyile Mose ati: ‘Antu yonsi ali ni myaka ukutandikila pali 20 ukuya apapela yataliingila umu mpanga ya Kenani. Yaalola ivizungusyo vino nacisile umu Eguputo nu mu lwanga, nomba yatantaaila ukufika na ndakai. Fwandi yalaalulumba umu lwanga pa myaka 40 ukufika lino yonsi kwene yalafwa. Aalingila umu Kenani a Yoswa na Kalebu casila.’