Inengu 12

Aina Izlaeli yaafumile uku Mwamba wa Sinai iyapita umulwanga lwa Palani iyaya ku Kandesyi. Yeova wanenyile Mose ati: ‘Tuma aonsi 12, kufuma muli cila mutundu, ukuti yakalole impanga iya Kenani ino indi nu kupeela Aina Izlaeli.’ Mose wasoolwile aonsi 12 nu kuyanena ukuti: ‘Yangini ku Kenani, mukalole ndi cakuti mpanga iisuma iya kulimamo ivyakulya. Mukalole ndi cakuti antu yaakwata amaka nanti foo nupya mukalole ndi cakuti yakaikala umu matenti nanti umu misumba.’ Inengu 12 apali Yoswa na Kalebu zyaile ku Kenani.

Lino papisile amanda 40, inengu zyawezile ala izisenda, amasamvu, ama mapomegilaneti, na matingi. Inengu zyalanzile ukuti: ‘Impanga iisuma nomba antu ayako aamaka sana nupya yakaikala umu misumba iyakwata amalinga aatali.’ Lelo Kalebu watile: ‘Tungayacinvya. Twapiteni likwene.’ Uzye watumanya umulandu uno Kalebu walandiile vivyo? Pano wene na Yoswa yataile muli Yeova. Lelo inengu zyuze 10 zyalazile ukuti: ‘Awe! Antu aya kuuku aamaka, wa vipombolo. Twalolike sile wa vipaso kuli aliyo.’

Aina Izlaeli yuvwile intete. Yatandike ukuilizyanya nu kulanzyanya iyati: ‘Lekini tusoolole umuntu muze uwa kututungulula nu kuswilila ku Ijipti. U mulandu ci uno tungaila uku mpanga ii ukuti tukamfwe?’ Yoswa na Kalebu yalanzile ukuti: ‘Mutezya ukukanauvwila Yeova, nupya mutuvwa intete. Yeova alatucingilila.’ Lelo Aina Izlaeli yatuvwilile. Yalondanga nu kukoma Yoswa na Kalebu.

I vyani vino Yeova wacisile? Waneenyile Mose ati: ‘Usi mulandu na vyonsi vino naacitila Aina Izlaeli, yasikunguvwila. Acino yalikala umulwanga pa myaka 40, nupya yalafwila mu kwene. Lelo ana yao, na Yoswa, na Kalebu aliyo yalikala umu mpanga ino nalavile ukuyapeela.’