Yeova Wasoolwile Yoswa

Mose wali mupiipi nu kufwa, pa cisila ica kutungulula Aina Izlaeli pa myaka ingi. Yeova wamuneenyile ati: ‘Asi wewe ulingizya Aina Izlaeli umu Mpanga ya Ulayo. Nomba ndaleka ukuti ulole impanga iyo.’ Mose waneenyile Yeova ukuti asoolole muze uwa kutungulula antu. Yeova nawe waneenyile Mose ati: ‘Yanga kuli Yoswa ukamuneene uti, ali wino insoolola.’

Mose waneenyile Aina Izlaeli ukuti wali mupiipi nu kufwa nupya Yeova wasoolwile Yoswa ukuyatungulula nu kuingizya umu Mpanga ya Ulayo. Lyene Mose waneenyile Yoswa ati: ‘Utuvwa intete. Yeova alakwazwa.’ Pa cisila cakwe vii, Mose waile papela ya Mwamba wa Nebo, pano Yeova wamulangiilile impanga ino walavile Abulahamu, Isaki, na Yakobo. Mose wafwile ni myaka 120.

Yeova waneenyile Yoswa ati: ‘Lamba Uluzi Lwa Yodani, uye uku Kenani. Ndakwazwilizya wakwe vino nazwilizye Mose. Wasininkizya ukuti ukubelenga Masunde yane cila wanda. Utuvwa intete. Usipe. Yanga kacite vino inkuneena ukucita.’

Yoswa watumile inengu ziili uku musumba uwa Yeliko. Mwi lyasi ililondelilepo, tulasambilila ivingi ivyacitike kuuku. Lino inengu zyawezile, zyalanzile ati yaali insita isuma iya kuti yaye uku Kenani. Uwanda uwalondelilepo, Yoswa waneenyile Aina Izlaeli ukuti yaipekanye ukutandika ulendo. Lyene watumile ya simapepo aasendanga imbokosi ya upangano kuti yakolele uku Luzi Lwa Yodani. Uluzi lwazuzile. Nomba lino ya simapepo yalyasile sile ingazo mu manzi, amanzi aali mu luzi luu yatiile ukupita, iyakama nu kukama. Ya simapepo yaile iimilila pakasi ka luzi apali apume mpaka Aina Izlaeli yonsi iyalamba. Uzye ukwelenganya ukuti cizungusyo cii icacitike caiwisye vino Yeova wacisile pali Yemba Muyenzu?

Aina Izlaeli ingiile umu Mpanga ya Ulayo pa cisila ca myaka iingi. Yali nu kukuula mang’anda ni misumba. Nupya yali nu kukwata ivyalo mwa kulima matingi, vizao, ni vintu vyuze. Yaali impanga isuma nupya ivunde.