Yakulamba Uluzi Lwa Yodani

LOLA aina Izlaeli yakulamba Uluzi Lwa Yodani! Nomba, uzye amanzi yaaya kwi? Pa nsita ii iya mwaka, imvula ikatoonya sana, fwandi mwali amanzi aingi cuze umu luzi kwene luu lino aina Izlaeli yatatala yatandika ukulaamba. Nomba paa, amanzi yati-yakama! Nupya aina Izlaeli yakulamba apa musili uume wakwe vino yaalamvile Yemba Muyenzu! Uzye lyene amanzi yaiile kwi? Leka tulole.

Lino insita yafisile iyakuti aina Izlaeli yalambe Uluzi Lwa Yodani, Yeova waneenyile Yoswa ukuneena antu ukuti: ‘Yasimapepo yafwile ukusenda imbokosi ya upangano nu kutukoleelela. Lino yalalyata sile umu manzi ya Luzi Lwa Yodani, papokwene sile amanzi yalata ukupita.’

Lyene yasimapepo iyasenda imbokosi ya upangano, nu kukoleelela antu yonsi. Lino yaafisile apa Luzi lwa Yodani, yaalyasile umu manzi. Amanzi yaali sana nu mukuku nupya paali apazike cuze. Nomba, lino yasimapepo yalyasile umu manzi, amanzi yaatiile ukupita! Icintu cii caali i cizungusyo! Yeova wimiike amanzi ukupela ya luzi. Fwandi i caleenzile ukuti pakasita sile akanono amanzi yakame umu luzi!

Yasimapepo aasenzile imbokosi ya upangano yaaile iimilila apakasi ka luzi ulwakamile. Uzye watuulola yasimapepo kwene yaayo apa cikope cii? Lino imiliile paapa, aina Izlaeli yonsi kwene yaatandike ukulamba Uluzi Lwa Yodani!

Lino yonsi yaalamvile, Yeova waneenyile Yoswa ukuneena aonsi 12 aamaka ukuti: ‘Yangini umu luzi paapa pano yasimapepo yaimi ni mbokosi ya upangano. Munyenyemule amawe 12, nu kuyatuulika pano mwensi kwene mumalaalilila ilelo. Lyene uku nkoleelo, lino ana inu yalaauzya ndi yalola amawe kwene yaa, muce mwayaneena mukuti amanzi yaatiile ukupita lino kwali ukulamvya imbokosi ya upangano yakwe Yeova. Amawe kwene yaa, yalaamwiusya icizungusyo kwene cii!’ Yoswa nawe atuulika amawe pano yasimapepo 12 imiliile pansi ya luzi.

Lyene alino Yoswa aiza aneena yasimapepo aaseenzile imbokosi ya upangano ukuti: ‘Fumini umu Yodani.’ Lyene lino yasimapepo yaafumile, papokwene amanzi iyatandika ukupita nupya.