Yesu Waliisya Antu Aingi Cuze

KULI icintu cimwi iciipisye icati-cicitika. Yoane Kawatizya yati-yamukoma. Elodia umuci wa mwene, ataatemilwe Yoane. U walenzile ukuti umwene atume antu ukuya-putula Yoane umutwe.

Lino Yesu uvwile vii, wizile-aya sana nu ulanda. Waiile uku ncende imwi ukutaali umuntu nanti umwi. Nomba antu yaamulondiile. Lino Yesu waweni amaumba ya yantu, uvwile sana uluse. Lyene watandike ukuyasimikila pa wene wakwe Leza, nupya wapozizye na alwale.

Uwanda kwene uuwa amanguzi, asambi yakwe Yesu izile kuli aliwe nu kumuneena yati: ‘Kwafiita, nupya kuno tuli u kutali ni mizi. Nena antu yapite pakuti yakakale ivyakulya uku mizi iiliko apiipi.’

Yesu waswike ati: ‘Awe foo, yatafwile ukupita. Yapeelini ivyakulya.’ Lyene Yesu uzizye Filipo ati: ‘Uzye aekwi kuno tungazana ivyakulya ivingi ivyakuliisya antu yaa?’

Filipo waswike ati: ‘Pamalondeka impiya izingi sana pakuti tukale ivyakulya ivyakuti antu yonsi yalyeko sile akanoono.’ Andeleya walanzile ati: ‘Umulumendo wii uwatatusendela ivyakulya watakwata sile imikate isano (5) ni inswi ziili. Nomba, antu yati-yavulisya, twakulya twaceepa.’

Yesu walanzile ati: ‘Neniini antu ikale apisote.’ Lyene wataizye Leza pa vyakulya, nu kutandika ukuputoola inswi nu kumokoola umukate. Lyene asambi yakwe yatandika ukupeela antu. Paali aonsi 5,000, na anaci aingi sana na ana. Yonsi kwene yaaliile iikuta. Nupya lino asambi yakwe Yesu yaakolonganiike ivyakulya ivyasiileko, yaazuuzizye ya basiketi 12!

Lyene Yesu na asambi yakwe yaakwezile uwato nu kutandika ukulamba yemba wa Galile. Uwanda kwene uuwa usiku, kwizile imvula ya cimuza, na maimbi yaakatwike pali yemba nu kutandika ukusunkanya sana uwato. Asambi yakwe Yesu yuvwile sana intete. Lyene usiku pakasi, asambi yakwe Yesu yaaweni umuntu umwi akupita pa manzi watayalungama. Yuvwile intete nu kupunda sana, pano yataamanyile umuntu kwene wiyo uwayalungiime.

Yesu wayaneenyile ati: ‘Mutatiina. Aneene!’ Nomba yataazumiile ukuti wali a Yesu. Lyene Petulo walanzile ati: ‘Ndi cakuti, i cumicumi awewe Mwene, uneene mpite apa manzi nize kuno uli.’ Yesu wamuneenyile ati: ‘Iza!’ Petulo wafumile umu wato nu kupita apa manzi! Lyene Petulo uvwile intete nu kutandika ukutuwila umu manzi, nomba Yesu wamupuswisye.

Ukufuma papo, Yesu nupya waliisizye antu aingi cuze. Apa nsita ii, waomvizye imikate 7 nu tuswi utunoono sile. Nupya kwene ivyakulya vyavuzile sana icakuti yonsi kwene iikuta. Uzye vwile asi icintu icisuma sana cino Yesu wacisile, ukusakamala antu? Lino alaateeka insi, patalaya nanti cimwi ica kutusakamika!