Yesu Waliisya Antu Aingi

Lino yacili ukutandika ukuzevya Ucilo uwaliko umu mwaka wa 32 C.E., asambi yawezile kuno yaile umu kusimikila. Yatonsile sana, fwandi Yesu wakwezile nayo umu wato iyaya uku Betisaida kuti yakapuuze. Nomba lino yafisile umu nkumba yakwe yemba, Yesu wazanyile antu aingi yakuyalolela. Nanti cakuti Yesu walondanga ukuya sile na atumwa yakwe, wapokelile ningo antu yaya. Wapozizye alwale nu kutandika ukuyasambilizya. Yesu wayasambilizye apa Wene Wakwe Leza uwanda onsi. Lino cafisile manguzi, atumwa yaile kuli Yesu nu kumuneena iyati: ‘Antu yafwile yali ni inzala. Uzye utanga uyaleke yaye yakalonde ivyakulya?’

Yesu nawe watiile: ‘Yatafwile ukupita. Yapeelini vimwi ivyakuti yalye.’ Atumwa yuzizye iyati: ‘ Uzye ukulonda tuye tukayakalile ivyakulya?’ Filipi walanzile ati: ‘Nanti cakuti twakweti impiya izingi tutanga tukwanisye ukukala ivyakulya ivyakuti antu yonsi yaa yakumane.’

Yesu uzizye ati: ‘Uzye ivyakulya vino tukweti vivuzile uli? Andeleya waswike ati: ‘Tukweti mikate 5 ni inswi ziili. Vitanga vikumane.’ Yesu nawe wamuneenyile ati: ‘Ndetele imikate kwene iyo ni inswi.’ Alino aneena antu ukuti ikale pa masote mu maumba, yamwi 50 na yamwi 100. Yesu watoozile imikate ni inswi nga alingamila ukwi yulu nu kupepa. Lyene wapeezile ivyakulya vivyo ukuyatumwa, nayo yapeezile antu. Aonsi 5,000 alino na anaci na ana yaliile mpaka iikuta. Na pa cisila atumwa yakwe Yesu yakolonganike ivyasileko pakuti yatonona ivili vyonsi. Nupya vino yakolonganike vyazuzile imise 12. Uzye citaali icizungusyo cii?

Antu yatemilwe sana icakuti iyalonda nu kuti Yesu aye umwene wao. Lelo Yesu wamanyile ukuti insita ino Yeova walondanga ukuti Yesu aye umwene itali ifike. Fwandi waneenyile antu ukuti yapita nu kuneena atumwa yakwe ukuti yaye uku mbalama yuze yakwe Yemba uwa Galili. Atumwa yakwezile uwato, Yesu nawe waile papela ya mwamba. U mulandu ci? Pano walondanga ukuti akapepe kuli Isi. Usi umulandu na vino Yesu wapamviwe, wasyangako insita iya kupepa.