Apa Mwamba Wa Miolivi

WII, a Yesu pa mwamba wa Miolivi. Aonsi yani (4) yano ali nayo aatumwa yakwe. Pali Andeleya na Petulo umwinakwe, na Yakobo na Yoane umwinakwe. Lyene icikuulwa cino ukulola akatalamukila i ng’anda yakwe Leza iya kupepelamo umu Yelusalemu.

Papita amanda yaili ukufuma pano Yesu wingiliile umu Yelusalemu ala watakwela pali punda. Lyene a pali Ciili. Uwanda kwene uu akatondo Yesu wali apa ng’anda ya kupepelapo. Lino wali paapa, yasimapepo yaalondanga ukumulema pakuti yamukome. Nomba, yaatiinyile ukucita vivyo pano antu yaatemilwe sana Yesu.

Yesu waneenyile yasimapepo kwene yaaya ati: ‘Nzoka mwe, nupya mwemwe yana ya nzoka!’ Lyene Yesu walanzile ukuti Leza wali nu kufulula yasimapepo yaaya pa mulandu ni vicitwa vyao iviipe vino yaacitanga. Ukufuma papo, Yesu waile uku Mwamba wa Miolivi, na atumwa yani yano ukulola paa yaatandiike ukumuuzya amauzyo. Uzye watuumanya vino yamuuzyanga?

Atumwa yuzyanga Yesu pa vintu ivyali nu kucitika uku nkoleelo. Yaamanyile ukuti Yesu alasisyapo ivintu vyonsi iviipe umu nsi. Nomba, yaalondanga ukumanya lino Yesu wali nu kucita vivyo. Uzye Yesu alawela lilaci ukwiza-teeka insi?

Yesu wamanyile ukuti alondezi yakwe amu nsi yataali nu kumulola ndi wiza nupya. Cali nu kuya vivyo pano wali nu kuya umwiyulu, nupya yataali nu kumulola kuuku. Lyene Yesu waneenyile atumwa yakwe ivintu vimwi-vimwi ivyali nu kucitika umu nsi ndi waya Umwene nu kutandika ukuteeka umwiyulu. Uzye i vintu vya musango ci vimwi-vimwi ivyali nu kucitika?

Yesu walanzile ukuti, kwali nu kuya inkondo iziipisye, antu aingi cuze yalaalwala, nupya kulaya inzala sana, kulaya upondo uutatala uyako, nupya kulaya ivilundumusi. Yesu walanzile nu kuti ilandwe lisuma apa wene wakwe Leza lilakosolwa umu nsi yonsi. Uzye tukalola ivintu kwene vii vikucitika ndakai? Ee, tukavilola! Fwandi tufwile ukusininkizya ukuti Yesu akuteeka ukwiyulu ndakai. Likwene sile wasya afumyepo iviipe vyonsi ivikacitika umu nsi.