Yesu Waswilila Ukwi Yulu

Yesu waloline na alondezi yakwe uku Galili. Lyene wayapeezile isunde ilicindame ilyakuti: ‘Yangini mukapange antu aa mu nko zyonsi ukuya asambi. Mwayasambilizya ukulondela vyonsi vino namuneenyile, nupya mwayabatizya.’ Lyene wayalavile ati: ‘Namayanga namwe manda yonsi.’

Pa manda 40 pa cisila ica kutuutululwa, Yesu walolike uku yasambi yakwe aingi umu Galili nu mu Yelusalemu. Wayasambilizye masambililo acindame nupya wacisile ni vizungusyo ivingi. Lyene Yesu wakomanyile na atumwa yakwe pa muku wa kusyalikizya, pa Mwamba Uwa Miolivi. Wayanenyile ati: ‘Mutwalilile ukwikala umu Yelusalemu, mukaalolela vino Tata wamulaya.’

Atumwa yakwe yatuvwikisye muno Yesu walozizye. Lyene yamuzizye iyati: ‘Uzye ukuya Umwene uwa Ina Izlaeli likwene?’ Yesu wayaneenyile ati: ‘Insita ino Yeova akalonda ukuti inje Umwene itatala yafika. Likwene sile umupasi uwa muzilo uli nu kumupeela amaka, nupya mulaya inte zyane. Mulasimikila umu Yelusalemu, mu Yudeya, mu Samaliya, nu mu ncende izya kutali.’

Lyene Yesu wasenzilwe umwi yulu nupya makumbi yamuvimvile. Asambi yakwe yatwalilile ukulola ukwi yulu, nomba ala atapita.

Asambi yakwe yafumile uku Mwamba Uwa Miolivi nu kuya uku Yelusalemu. Insita izingi yakomenkananga umu muputule uwa papela nupya yapepanga. Yalolelanga ukuti Yesu ayanene ivyakucita na vyuze.