Mipasi Asi Antu Atazile Yaya Pano Nsi nga Alino Iiza Yafwa

Kwaya angeli aingi! Yamwi aasuma, yauze nayo aaipe. Uzye angeli kwene yaa aantu atazile yaya pano nsi ngalino iiza yafwa?

Awe, asi avino caya. Umuntu ndi wafwa, asiiya uku ncende yuze, wakwe vino antu aingi yakaelenganya. Twamanya uli vii? Twamanya, pano a vino tukasambilila muli Baibolo. Baibolo i buku lya cumi ilyafuma kuli Leza, wino izina lyakwe a Yeova. Yeova u waumvile antunze, fwandi aliwe wamanya ningo icikacitika ndi yafwa.—Masamu 83:18; 2 Timoti 3:16.

Baibolo ikati Leza wapanzile Adamu, ‘ukuomvya ulukungu.’ (Ukutendeka 2:7) Leza wamwiisile umu Paladaise, umu calo ca Edeni. Adamu atwalilila ukuvwila isunde lyakwe Yeova, nga ataafwile; nga akuno waya na likwene. Nomba, lino Adamu watamile isunde lyakwe Leza uku mufulo, Leza wamunenyile ati: ‘Ulaswilila uku musili pano akuno waumvilwe. Pano wewe lukungu, nu ku lukungu akuno ulaswilila.’—Ukutendeka 3:19.

Uzye cii cilozile mwi? Tale elenganyini, uzye Adamu wali kwi lino Yeova atatala wamu-umba ukufuma uku lukungu? Pasi kuno wali. Ataali ukwiyulu. Ataali nu umi. Fwandi, lino Yeova walanzile ati Adamu wali nu ‘kuswilila uku musili,’ walozizye umu kuti Adamu wali nu kufwa. Atasangwike umupasi. Lino Adamu wafwile, watiile ukuya nu umi, kuli kuti ataaliko. Imfwa kuli kuti pasi umi.

Nga antu yauze afwa, yene caya uli? Uzye nayo kwene yatayako? Baibolo ikati:

• ‘Yonsi [kuli kuti antu ni nyama] yakaya ukuli kumwi kwene. Yonsi yaumvilwe ukuomvya ulukungu, nupya yakaswilila uku lukungu.’—Lukala Milandu 3:20.

• ‘Afwe . . . yatamanya nanti cimwi.’—Lukala Milandu 9:5.

• ‘Ukutemwa kwao nu lupato lwao nu uzuwa wao vikalowa.’—Lukala Milandu 9:6.

• ‘Kutaya ukuomba nanti amapange nanti ukumanya nanti amano uku malindi, kuno ukuya.’—Lukala Milandu 9:10.

• ‘[Umuntu] akaswilila uku musili; umu wanda kwene uwo akaata ukwelenganya.’—Masamu 146:4.

Uzye cikamutalila sana ukuzumila vino amalembelo yaa yakalanda? Ndi cikamutalila, elenganyini pali cii: Umu ndupwa izingi, umonsi aakalonda impiya zya kwazwilizya ulupwa lwakwe. Lino umonsi wafwa, ulupwa lwakwe lukacula sana. Limwi-limwi umuci na ana yasikwata impiya izya kukalila ivyakulya. Limwi alwani ya monsi wiya yangaayacuzya. Nomba muyuzye mwe-eneco muti: ‘ndi icakuti umonsi wiya wasangwike umupasi, u mulandu ci uno asitwalilila ukwazwa ulupwa lwakwe? I cani cino asitwalilila ukucingilila ulupwa lwakwe?’ Pano vino amalembelo yakalanda i vya cumi. Umonsi wiya asi nu umi, atanga acite nanti cimwi.—Masamu 115:17.

Uzye cii cikupiliula ukuti afwe yatalatala yaye nu umi? Awe, asi amuno cilozile. Tuli nu kulanda pa kututuluka kwa yafwe. Nomba, icisinka i cakuti afwe yasimanya vino mukucita. Yatanga yamulole, ukuvwa vino mukulanda, nanti ukumuvwanzya. Mutafwile ukuyatiina. Yatanga yamwavwe, nupya yatanga yamucuzye.—Lukala Milandu 9:4; Ezaya 26:14.