Kaanini Ukupepa kwa Ufi; Mwapepa Leza umu Cumi

1. I vyani vino tulinzile ukusoolola pa vya mipepele?

YESU walanzile ati: “Wino wensi aakumpazya ala asi nani.” (Mateo 12:30) Swensi kwene cila-muntu twakwata wino tukaombela, Yeova nanti Satana. Antu aingi yakaelenganya ukuti yakaombela Leza umu cumi, nomba Baibolo ikati Satana ‘akaponzya amu nsi yonsi.’ (Umbwilo 12:9) Antu aingi cuze yakati Leza ali wino yakapepa, nomba icisinka i cakuti uno yakapepa a Satana Ciwa! Antu yonsi yafwile ukusoolola uwakuombela, nampo nga a Yeova, ‘Leza wa cumi,’ nanti Satana, ‘isi wa usomvi.’—Masamu 31:5; Yoane 8:44.

Senkini uku Mipepele ya Ufi

2. Iinzila ci ino satana akaomvya ukukaanya antu kupepa Yeova?

² Ukupingulapo ukuti tumaombelanga Yeova cili ca mano cino tungacita, pano ukucita vivyo kulalenga ukuti Leza atutemwe. Nomba Satana asiuvwa ningo nga umuntu akuombela Leza; nupya yonsi aakaombela Leza akayacuzya. Inzila yonga ino akatucuzizyamo, u kuomvya antu yano yakatuseka nanti ukutukaanya pali vino twazumilamo, ni vyuza kwene na yalupwa limwi yangacita vivyo kwene. Yesu walandiile limwi ati: “Amu ng’anda ya muntu yalaya ali anisi yakwe.”—Mateo 10:36.

3. Uzye mulacita uli ndi cakuti amu lupwa nandi ya cuza inu yatandika ukumukaanya ukupepa Leza?

³ Uzye mwemo ndi icintu cii camucitikila, mulacita uli? Antu aingi yamanya ukuti imipepele yao itazipa, nomba yasilonda ukusenkako. Yakaelenganya ukuti ukucita vivyo ala umuntu wata ukuya uwa cisinka kuli ya lupwa. Uzye ukwelenganya kwa musango uu kwaya sile ningo? Ndi cakuti umwi wamunenyile ukuti amu lupwa lwinu yakaomvya imilembo iipisye, uzye mutanga muyanene ukuti milembo iyo ingayumoola? Mutanga mutemwe ukutandika ukuomvya imilembo kwene iyo, asi avivyo?

4. I vyani vino Yoswa wanenyile aina Izlaeli pa vya mipepele?

⁴ Yoswa wanenyile aina Izlaeli ukusenka uku vicitwa viipe ivya mu mipepele, ni ntambi zya vikolwe vyao. Wayanenyile ati: ‘Fwandi mwaopa Yeova nu kumuombela umu nzila ya mpomvu nu mu cumi, kupya sumbini tuleza tuno ivikolwe vinu vyaombelanga uku mbalama ya Luzi nu mu Egupito, nupya mwaombela Yeova.’ (Yoswa 24:14) Yoswa wali uwa cumi kuli Leza, nawe Yeova wamupoleliile cuze. Nafwe ndi twaya acumi kuli Yeova, alatupolelela.—2 Samwele 22:26.

Sumbini Vyonsi Ivikaomviwa umu Mipepele ya Ufi

5. Umulandu ci uno tufwile ukusumbila tonsi utwa malele?

⁵ Ukusenka uku mipepele yaufi cikapiliula nu kuti tufwile ukusumba utuntu tonsi utwa malele ndi cakuti twakwata tumwi, ivili wa ivizimba, ncilizi, mpinga, ukasi wa milembo, na vyonsi ivyakolana na vii. Cacindama sana ukucita vivyo pano ala tukulanga ukuti twataila sana Yeova.

6. Uzye Aina Klistu yakutandikilapo yacisile uli na mabuku ya malele?

⁶ Elenganyini vino Aina Klistu yakutandikilako yacisile lino yapingwilepo ukutandika ukupepa Leza umu cumi. Baibolo ikati: “Aingi muli yano acitanga malele yaleta impapulo zyao apalipamwi yazyoca pa manso ya antu.”—Milimo 19:19.

7. Uzye tungacita uli ndi cakuti iviwa vyatuzanza?

⁷ Yamwi aakatandika ukuombela Yeova, aali umu vya ulozi, ivya wanga, nanti vya malele, yangaazanzwa ni viwa. Ndi cakuti ivyamusango uu vyatandika ukumucitikila, mwapepa kuli Yeova ala mukupunda, ukuomvya izina lyakwe. Alaamwazwa.—Amapinda 18:10; Yakobo 4:7.

8. Uzye Aina Klistu yakalola uli iviluwi, ivinkolanya, ni vikope ivikaomviwa umu mipepele yaufi?

⁸ Aakaalonda ukuombela Yeova yatafwile ukusunga iviluwi, ivinkolanya vyakwe tuleza, nanti ivikope ivikaomviwa umu mipepele. Aina Klistu acumi yakaikala “umi wakutaila, usi uwa pali vino tukalola.” (2 Kolinto 5:7) Yakacindika sana amasunde yakwe Leza aakalesya ukuomvya ivinkolanya apa kupepa.—Ukufuma 20:4, 5.

Mwalongana Pamwi na Antu Yakwe Yeova

9. Uzye Baibolo ikatuneena ukuti tufwile ukucita uli pakuti tuye aamano?

⁹ Baibolo ikati: ‘Wensi aakapitila pamwi na amano alaya uwa mano.’ (Amapinda 13:20) Ndi cakuti tukulonda ukuya aamano, tufwile twapitila pamwi nandi ukulongana na ya Nte Yakwe Yeova. Aali yantu aakapita umu nzila iikatwala uku umi.—Mateo 7:14.

10. Uzye ya Nte Yakwe Yeova yangamwavwa umu nzila ci pa kuti mwaombela Leza?

¹⁰ Ya Nte Yakwe Yeova yakasakamala sana antu. Umulimo uno yakaomba u kwavwa antu aakalondesya ukusambilila icumi icaya muli Baibolo icikatungulula uku umi wa pe. Aliyo yangamwavwa ukuvwikisya icumi ca muli Baibolo ukwaula ukulipila. Yalaasuka mauzyo yano mwakwata amuli Baibolo nu kumulanga vino mungacita pa kuti mwaomvya vino mukusambilila muli Baibolo kwene.—Yoane 17:3.

11. Uzye nga mukuya uku kulongana kwakwe ya Nte, mulasambilila vyani?

¹¹ Ndi mwaca mwaya uku kulongana nayo, apa ng’anda ya Wene, mulasambilila ivintu ivingi pali Yeova. Yalamukomelezya ukuti mwapepa Leza umu cumi. Nakupya, mulasambilila ivyakusambizya antu yauze icumi ca muli Baibolo.—Ayebulai 10:24, 25.

12. Uzye ipepo lingamwazwa uli ukuombela Leza?

¹² Nga mwatwalilila ukusambilila ivingi pali vino Leza akaalonda, alino mulaataizya sana pali vino akaomba. Nupya, mulinzile ukutwalilila ukucita ivintu ivikamuzanzya, asi kucita ivintu ivikamusosya. Mutailila ukuti mungavwanzya Yeova umwipepo nu kuleenga kuli aliwe ukuti aamwavwa ukucita ivya mpomvu, nu kusenka uku viipe.—1 Kolinto 6:9, 10; Filipi 4:6.

13. Mungacita uli pakuti muzanzye Yeova?

¹³ Ndi mwatwalilila ukulunduluka, i cumicumi mulatandika ukulondesya ukuipeela kuli Leza nu kuwatiziwa pakuti muye Inte yakwe Yeova. Namwe nga mwaca mwaya aomvi yakwe Yeova, alatemwa. (Amapinda 27:11) Mulaya pamwi na antu ansansa yano Leza akati: ‘Ndikala pamwi na antu yaa nga nu kupita pamwi nayo. Ndaya Leza wao, nayo yalaya antu yane.’—2 Kolinto 6:16.