Mungacita Uli pa Kuti Mumanye Upefi wa Cumi?

1. Uzye vwilini upefi wa cumi waya sile onga?

Yesu wasambilizye alondezi yakwe upefi wa cumi onga sile. Upefi uwo waya kwati u museo uno ukatwala uku umi wa pe. Yesu walanzile ati: “Antu akauzana anono sile.” (Mateo 7:14) Leza wazumilizya sile upefi uno ukasambilizya ivyaya muli Baibolo. Yakapepa ya cumi yonsi yalemana, napya yataila ivili-vimwi.—Welengini Yoane 4:23, 24; 14:6; Efeso 4:4, 5.

Tambini vidyo ya kuti Uzye Leza Akazumilizya Mipepele Yonsi?

2. Uzye Yesu walanzile ukuti Aina Klistu yaufi yaya uli?

Yesu walandiile limwi ukuti yakasesema yantumpu yalonona Uwina Klistu. Kunzi kwene yakaloleka uti akapepa ya cumi. Na macalici yao kwene yakaitaka ukuti Aina Klistu. Nomba mungayalolela sile ku miyele yao. Uzye i miyele ci iyo? Upefi wa cumi onga mpo a wuwo uwakwata Aina Klistu aaya ni miyele isuma ino na antu yonsi yakalola.—Welengini Mateo 7:13-23.

3. Mungamanya uli yakapepa ya cumi?

Vintu visano (5) vino mungayamanyilako aivi:

• Yakapepa ya cumi yacindika Baibolo pano Izwi lyakwe Leza. Yakalemasya pa kuti yakoonka masunde aaya muli Baibolo. Fwandi upefi wa cumi wapusana ni mipepele iingi ino ikasambizya masunde ya antu. (Mateo 15:7-9) Yakapepa ya cumi yakacita vivi kwene vino yakasambilizya auze.—Welengini Yoane 17:17; 2 Timoti 3:16, 17.

• 

  Alondezi yakwe Yesu acumi yakacindika izina lyakwe Leza, lya kuti Yeova. Yesu wanenangako antu pi ziina lyakwe Leza pano wacindiike sana izina lilyo. Wasambizye antu kumanya Leza, kapya wayasambizye nu kulapepa ukuti izina lyakwe Leza liye ilya muzilo. (Mateo 6:9) Uzye kuko kuno mwikala, upefi ci uno mungati uliwo ukasambilizya antu izina lyakwe Leza?—Welengini Yoane 17:26; Loma 10:13, 14.

• Aina Klistu acumi yakakosoola pa Wene wakwe Leza. Leza watumile Yesu ku kusimikila ilyasi lisuma ilya Wene. Uwene wakwe Leza uliwo sile uulazifya ivintu pa kuti antu yakaikala ningo. Yesu wasimikanga pa Wene uu mpaka ni mfwa yakwe. (Luka 4:43; 8:1; 23:42, 43) Walanzile ukuti na alondezi yakwe yalakosoola pa Wene uu. Uzye vwilini nga mwalola umwi akumusimikila pa Wene wakwe Leza, mungati akaapepa kwi?—Welengini Mateo 24:14.

• Alondezi yakwe Yesu yene yatayamo umu vya munsi. I cangupale ukuyamanya, pano yene yasicitako ivikanza vya miteekele ya mpanga nanti ukucitako ivyongo mu muzi. (Yoane 17:16; 18:36) Nakapya, yasicitako iviipe vino aikala-nsi yauze yatemwa ukucita ivingayaletela na mavya.—Welengini Yakobo 4:4.

• Aina Klistu acumi yatemwana wakwe cimwi. Yakasambilila muli Baibolo ukuti yalinzile ukucindika antu a mitundu yonsi. Mipepele ya ufi yatemwa ukukomelezya antu ukuya uku nkondo, nomba yakapepa ya cumi yene yasilonda ukucitako vivyo. (Mika 4:1-3) Aina Klistu a cumi yene yakaombesya pa kuti yangaazwilizyako nu kukomelezya antu yaunze.—Welengini Yoane 13:34, 35; 1 Yoane 4:20.

4. Uzye lyene, mwamanya upefi wa cumi?

Upefi ci uno ukasambilizya antu ivyaya muli Baibolo? Upefi ci uno wacindika izina lyakwe Leza, kapya uno ukasimikila ukuti Uwene wakwe Leza uliwo onga sile ulazifya ivintu? Aakapepa ci atemwana sana, kapya aasiya uku nkondo? Aleni ilandilini mweineco, upefi ci?—Welengini 1 Yoane 3:10-12.